Түүхэһээ һабагшалхада…
Буряадай телевидениин агаарай долгиндо энэ дамжуулгын аажамхан уряа хүгжэм 25 жэлэй туршада зэдэлжэ байна. Тус дамжуулгын удханииньшье уряа дуундаа адли хододоо арад зоной эльгэ зүрхэ татаһан, сэсэн бодолнуудаар нэбтэрһэн, тиихэ мүртөө үе сагтаяа адли залуухан шэнжэтэй. Дамжуулга соо домоглон харуулагдаһан зониие адаглахада, гол түлэб мүнөө үеын хүн зон болонол даа. Өөһэдынгөө элинсэг хулинсагуудайнгаа ёһо заншалнуудые үргэлжэлүүлэн өөһэдынгөө сусашагүй ажалаар, абьяастай ажабайдалаар түүхэтэ ябуулгануудые бүтээдэг, мүнөөдэрэй орёо жороо байдалай жолоо шадамарар баряад ябадаг, тиихэ мүртөө үглөөдэрэй ажабайдалай үндэһэ һуури зохёон табидаг манай үеын хүнүүд гээшэ.
Буряад хэлэн дээрэ гарадаг эгээл мэдээжэ энэ дамжуулга өөрын баян, алдарта түүхэтэй юм. Тэрэнэй эхиндэ бэлигтэй журналистнууд Зэгбэ Гомбожапов Марина Урбаева хоёр байгаа. Дамжуулгын гол түхэл шарайе режиссернууд Намсалма Цыбжитова Добшима Жаргалова бөөмэйлэн зохёолсоо. Түрүүшын жэлнүүдтэ олон хэһэгһээ бүридэһэн энэ дамжуулга агаарай долгиндо 1 час 30 минутын туршада гарадаг байгаа. Тэрэ үедэ Буряад дамжуулгануудай редакциин бүхы мэргэжэлтэд тэрэниие бэлдэлсэдэг һэн ха.
Тэрэ үедэ дамжуулгын гол үндэһэн һуури боложо табигдаһан ёһо заншалаар буряад арадай ёһо гурим, заншал заршамые болон арадуудай хоорондохи хани барисаае хүгжөөлгэдэ ехэ анхарал хандуулагдана, тэрэшэлэн гол шухала асуудалнуудаар Буряад ороной нэрэтэй хүндэтэй хүнүүдэй һанамжа сэгнэлтэнүүд бүхы улад зондо хүргэгдэнэ ха юм. Мүнөө «Буряад орон» теле-дамжуулгатай Буряад ороной хүн зонһоо гадна спутнигай аргаар Агын болон Усть-Ордын Буряадай тойрогуудай, Монгол ороной, Үбэр Монголой харагшадай танилсажа эхилһээр хэдэн жэл үнгэржэ байна. Тэрэшэлэн Интернедэй аша туһаар, тодорхойлбол, Фейсбук, Ютуб, Твиттер, ВКонтакте, bgtrk.ru сайтнуудаар бүмбэрсэг дэлхэйн ямаршье хубида ажаһуудаг буряад хүн энэ дамжуулгые хүлеэн абажа, түрэл хэлэн дээрэ һүүлэй үйлэ хэрэгүүдые хараха, дуратай дуушадайнгаа хангюурдаһан дуунуудые шагнаха баһал аргатай.
Энэ дамжуулгые 20 гаран жэлэй туршада журналистнууд Дарима Жамсоева Баир Дамбаринчинов хоёр хүтэлжэ ябана. Булаг мэтээр бурьялжа байдаг элдэб үүсхэл бодолнуудтай, агаарай долгиндо нилээд «ута наһа» эдлэжэ ябаһан дамжуулга хүтэлэгшэдтэй хамта хорёод жэлэй туршада Буряад Республикын соёлой габьяата хүдэлмэрилэгшэ Зэгзэма Самбуева режиссёроор хүдэлһэн байна. Һүүлэй 5 гаран жэлэй туршада найруулагшын жолоое бэлигтэй режиссёр Туяна Ламажапова найдамтайгаар барижа ябана. Энэ ехэ хугасаа соо «Буряад орон» дамжуулга элдэб үнгын шагналнуудта хүртөө. Журналистнуудай хүдэлмэринүүдэй «Хамаг Буряад орон-2009» гэһэн Президентын конкурсын лауреат, Бүгэдэ Буряадай «Алтаргана-2012» гэһэн уласхоорондын нааданай Алтан дипломдо хүртэһэн гэхэ мэтэ.
«Буряад орон» мүнөөдэр:
ДАМБАРИНЧИНОВ БАИР ЦЫРЕНЖАПОВИЧ дамжуулгануудые хүтэлэгшэ, телевиденидэ 1992 онһоо хүдэлнэ. «Тайзан» дамжуулгын автор. Буряадай Журналистнуудай холбооной Ярослав Гашегай нэрэмжэтэ шангай лауреат, Буряадай болон Агын Буряадай автономито тойрогой соёлой габьяата хүдэлмэрилэгшэ.
ЖАМСОЕВА ДАРИМА БАЛДАНОВНА. Телевидениин мэдээсэлэй таһагай даргын орлогшо, телевиденидэ 1991 онһоо хүдэлнэ. «Мүнхэ зула», «Будда бурханай һургаалнуудһаа», «Хүдөөгэй ажабайдал», «Баатар сэрэгшэд» гэһэн дамжуулгануудай автор. Бүгэдэ Буряадай «Алтаргана-2008» гэһэн уласхоорондын нааданай лауреат, Буряадай болон Агын Буряадай автономито тойрогой соёлой габьяата хүдэлмэрилэгшэ, Буряад Республикын медальнуудаар шагнагданхай.
ЛАМАЖАПОВА ТУЯНА БАЯРТУЕВНА. Телевиденидэ 2003 онһоо хүдэлнэ. «Мүнхэ зула», «Будда бурханай һургаалнуудһаа», «Хүдөөгэй ажабайдал», «Баатар сэрэгшэд» гэһэн дамжуулгануудай режиссер. «Тайзан» дамжуулгань «Байкальская волна-2012» гэһэн Бүхэроссин «Үндэһэн ёһо заншалнуудые үргэн дэмжэһэнэй түлөө» гэжэ тусхай дипломоор шагнагдаа.
Хүндэтэ харагшаднай, майн 31-дэ дамжуулгынгаа ойн баярай наада Буряад театр соо 15 сагhаа үнгэргэхэбди, баярыемнай хубаалдахяа буужа ерэбэлтнай баяртай байхабди.
