Газар дэлхэйдэ ээлжээтэ түрэлдөө хүмүүнэй бэе оложо мүндэлһөөр арадай хэрэгтэ ами наһаяа зорюулһан, Буддын шажанай хэрэгые хүтэлбэрилжэ, найрамдалай түлөөдэ үдэр бүхэнөө зорюулһан гэгээн түрэлтэ Этигэлэй хамбын үндэр нэрэдэ үргэл бариха хубида манай республикын, хүршэ хото, можонуудай, тойрогуудай, тиихэдэ Монголой уран бэлигтэн нёдондо жэл хүртэжэ, тэрэ наадан үндэр хэмжээндэ үнгэрөө бэлэй. Энэ жэл – хоёрдохи наадан.
Ондоогоор хэлэхэдэ энэ дэлхэйдэ бэлигтэй мүндэлөөд, арад зондоо алба хэжэ ябадаг уран зохёолшод, хүгжэмшэд, дуушад, хатаршад, уран зураашад болон һиилүүршэд, алташа, мүнгэшэ дархашуул, юрэл бүхы уран бэлигтэн өөрынгөө арга шадабариие дээдын заяагаар бэендээ шэнгээжэ мүндэлһэн байха, тиимэһээ Этигэлэй хамбын Эрдэнитэ мүнхэ бэедэ, тэрэнэй үндэр нэрэдэ үргэл бариха гээшэ тэдэнэй бэлигэй далайн дүүрэн байхын тэмдэг юм байна.
Ехэ нааданда хабаадагшадые шэлэн абалга арбан хоёрой үдэр, арбан гурбанай үдэр Ивалгын дасанда Дончод хурал хурагдажа, hүзэгтэн Этигэлэй хамбын мүнхэ бэеые бараалхаха, тиихэдэ уран бэлигтэнэй Ехэ наадан үдэрэй туршада үнгэрхөөр хараалагданхай. Хабаадагшад мүрысөөнэй гуримаар уран бэлигээ дэлгэхэ.
Илажа тодоргшод I, II, III шатын дипломуудаар, мүнгэн шагналаар урмашуулагдаха. Россиин Буддын шажантанай заншалта Сангхын хараалhан шагналай хэмжүүр гэхэдэ, 1-дэхи hууриин түлөө 10 000 түхэриг, 2-дохи hууриин түлөө – 7 000 түхэриг, тиихэдэ 3-дахи hууриин түлөө – 5 000 түхэриг барюулагдаха.
Мүрысөөндэ хабаадаха тухай мэдүүлгэнүүдээ, зохёолнуудаа иимэ хаягаар ябуулаарайт: dditigelov@mail.ru
Энэ ушараар дэлхэйн бүхы һүзэгтэнтэй суг баярлажа байһан манай Буряадай арад түмэн энэ үдэрые агууехэ һайндэр гэжэ тоолоно, тиимэhээ та олоноо үнэн һайхан сэдьхэлһээ амаршалнабди!
