Тимур Батуевич Гомбожапов 1967 ондо Зэдын аймагай Белоозёрск тосхондо түрэһэн намтартай. Уг гарбалаараа Бэшүүрэй аймагай Гутай нютагай хүн. Шэбэртын дунда һургуулида һуража ябахадань, 1979 ондо аба эжынь Улаан-Yдэ хото нүүгээ. Улаан-Yдын 22-дохи дунда һургуули дүүргээд, Зүүн Сибириин Гүрэнэй соёлой болон урлалай академидэ һураа. 1996-1999 онуудта Буряадай Уран зохёолшодой холбоондо уран зохёолой зүбшэл заабариин таhагта ажаллаа. Тимур Гомбожапов залуу уран зохёолшодой 15-дахи бага хуралда хабаадалсаһан байха юм. «Тэнгэриин нохойн дуун» гэжэ нэрэтэй түрүүшынь ном 1997 ондо хэблэгдэжэ гараһан байна. Олохон шүлэгүүд дээрэнь хүгжэм зохёогдонхой. 1998 ондо Россиин Уран зохёолшодой холбооной гэшүүн болоо, «Зүүн зүгэй һэбшээн» («Ветер Востока») гэһэн залуу уран зохёолшодой ном ород, буряад хэлэн дээрэ согсолон бүридхөө. 2013 ондо «Байгал» сэтгүүлэй 3-дахи дугаарта шүлэгүүдынь хэблэгдээ. Бүтээлнүүдынь «Буряад үнэн» сониндо 1987 онһоо эхилээд, саг үргэлжэ хэблэгдэжэ байдаг. 1998 ондо Абакан хотодо Сибириин регион хоорондын Уран зохёолшодой семинарта хабаадаһан юм. Эндэ Тимур Гомбожаповай хэдэн шүлэгүүдтэй танилсагты.
ХУН ШУБУУД
Аажам хабарай агаараар
Аянай шубууд ганганалдаа,
Yүлэн сагаан хадагаар
Yдэһэн дайдань угтаа.
Номин хибэс дэрлэжэ,
Нооһоёо һэбин хүльбэрнэ.
Хүнгэн жэгүүрнүүдээ дэлгэжэ,
Мүнгэн бэеэ сэбэрлэнэ.
Далайн саанаһаа бууһан
Дангина һайхан шубууд,
Эртын домог һануулан,
Элинсэгэйм эхэ дуурдуулба гүт?
Саһан шэнгеэр сайбалзаад,
Сагаан һанаа уряалба.
Дуран шэнгеэр үзэгдѳѳд,
Дуунай аялга түрүүлбэ.
Сэдьхэлни гэнтэ далижаад,
Сэнхир огторгой руу дүүлеэлби.
Уг гарбални дуудаад,
Yльгэрэйнь орон руу ниидээлби.
YЛЬГЭРШЭН
Дурна зүгэй орон дайдаар
Дуулан нүүгээ элинсэгэй
Эртын аялга сэдьхэжэ,
Энхэ һабагша татаһам,
Хэсэ хэнгэрэгэй бүүеэн доро
Хэтын баатаршуулай соло
Хүлэгэй түбэрѳѳндэл соностоод,
Шүлэгэй мүрѳѳр ерэхэдэнь,
Морин хуурни уянгалан,
Монгол гарбални дурсагдаа,
Дүхэриглѳѳд һуугаа нүхэд
Дууряан хамта дабталсаа.
Yүрэй сайхын урда тээ
Yльгэрэй хүлэг үзэгдѳѳд,
Зэбын үзүүртэ гансата
Зэдэлхэдэл гээд, һүлдэмни
Тэнгэри газар хоёрой
Тэмсэл соогуур сахилгаатаа,
Түмэн сэрэгэй хоолойгоор
Түүрээн магтааб илалта!
МҮНГЭНХЭН БУЛАГТАЙ
ГУТАЙМНАЙ
Мүнгэнхэн булагтай Гутаймнай
Мүшэдэй туяанда миралзаад,
Зүүдэндэм аалихан жэнгиржэ,
Зүрхэнэйм утаһа зэдэлгээ.
Дабталга:
Жэнхэниин шугыда шубуудууд
Жэрьелдэн байхадаа шуутайл даа,
Аажамхан Гутайдаа нүхэдүүд
Айдарлан һуухадаа дуутайл даа.
Гутайнгаа баабайда досоогоо
Утынгаа харгыда зальбараад,
Угайнгаа сэргэдэ эрьежэ,
Урданай заншалаар магтаяа.
Абынгаа, эжынгээ захяагаар
Алтанхан тоонтоёо бусажа,
Түрэлхэн нугынгаа ногоон соо
Хүльбэрэн хүсэнһѳѳнь хүртэеэ.
