Тэрэнэй хүтэлбэрилэгшэ Вера Николаевна Борбуева эдэбхитэй залуу зониие бүлгэмдөө суглуулжа шадаа. Бүлгэмэй гэшүүд аймагайнгаа үндэр наһатанһаа урданай дуунуудые, үльгэр домог, ёһо заншал, ямар нэгэн үйлэнүүдэй гурим дүрим болон арадай аман үгын дээжэһээ шэлжүүлэн бэшэжэ абаад, өөһэдынгээ зүжэг наадануудта хэрэглэжэ амжаа. Урданай ёһо заншал, залуушуулай элдэб янзын наадануудые яһалашье олоор зүжэглэн, харагшадай анхаралда табиһан байна: “Баасаганай наадан”, “Бүһэ андалдаан”, “Үүбээдэ оруулган”, “Мүнгэн аяга”, “Мүшэрээнхын наадан” гэхэ мэтэ. Тэдэ зүжэгүүдынь хэдэн үе зоной буурашагүй һонирхол һэдэбынь татажал байдаг лэ.
“Бадма ямбуу” бүлгэмэй хабаадалгагүйгөөр нэгэшье һайндэр үнгэрдэггүй. Уран һайханай тус бүлгэм ёһо гуримай уг залгамжые баримталан, аймагай түбэй үндэр наһатанай “Уулзалга” гэһэн аман зохеолой бүлгэмтэй болон Хара-Хужарай соелой ордоной “Тэрэнги” бүлгэмтэй дүтэ харилсан, суг хамтын түсэбүүдээр ажал хэрэгээ эмхидхэн хүдэлдэг юм.
Аман зохёолой “Бадма ямбуу” бүлгэм хадаа Улаан-Үдэдэ үнгэрһэн Уласхоорондын “Алтаргана-2006”, Эрхүү хотодо үнгэрһэн “Алтаргана-2008” наадануудай дипломант, мүн республикын хэмжээнэй аман зохеолой бүлгэмүүдэй дундахи “Буряад хүнэй нэгэ үдэр-20012” мүрысөөнэй III-хи шатын дипломоор шагнагдаад, “Буряад хүнэй нэгэ үдэр-2014” мүрысөөнэй Гран-при абажа, лауреадай нэрэ зэргэдэ хүртэһэн байна.
