Тус хэмжээ ябуулгые Буряадай гүрэнэй цирк республикын Соёлой министерствын дэмжэлгээр хоёрдохиёо эмхидхээ гээд һануулая. Энэ удаа фестиваль Буряадһаа, Эрхүү можоһоо, Монголһоо дүн хамта 140 хабаадагшые суглуулаа: Ангарскын “Шари-Вари” болон “Круг надежд” гэһэн арадай циркын бүлгэмүүд, Прибайкалиин аймагай Ильинкын “Подсолнух” гэжэ циркын студи, Северобайкальск хотын “Созвездие” болон “Мы из Крица” циркын студинууд, Северобайкальскын аймагай Шэнэ-Уоянай “Радуга”, Кабанскын аймагай Селенгинскын “Уян Бэлиг” студинууд, Монголой Хадгаа цирк болон Эрдэнэт хотын циркын студи, Чайковскиин нэрэмжэтэ Искусствын колледжын циркын таһаг, Буряадай циркын һургуули.
Эдир ба залуу артистнар олоор сугларһан хүүгэдэй, гэртэхинэйнь урманда бэлиг шадабарияа харуулжа, онсо бэрхэнүүдынь халуун альга ташалганда хүртөө. “Круг надежд” гэһэн Ангарскын циркын уян нугархай басагад түмэр голтой багахан (альганай тухай) модонууд дээрэ орёо номер харуулаа. Чайковскиин нэрэмжэтэ Искусствын колледжын циркын таһагай оюутан Виктория Дамдинова (агаарай гимнастка) үндэр руу агаараар ниидэн, бултанай анхарал татаа. Зүгөөр Монголой циркын һургуули мэргэжэл ехэтэй байһанаа үшөө дахин гэршэлээ. Эрдэнэт хотын циркын студиин басаган уян нугархай бэетэй байхаһаа гадна хүсэ ехэтэйб гэжэ харуулаа. Тэрэ тусхай түхеэрэлгые гансал шүдөөрөө зуугаад, бүхы бэеэ даажа шадана. Харин Улаан-Баатарай циркын басаган моноциклаар (нэгэ мөөритэй велосипед) ябаад, лимбэ дээрэ наадана, моноциклаараа гүйлгэхэ зуураа хүлөөрөө табагуудые өөдэнь шэдэжэ, толгой дээрээ суглуулна.
Буряадай гүрэнэй циркын ахамад администратор Светлана Бадмаевагай хэлэһээр, энэ форум-фестиваль Буряадта цирк хүгжөөхэ зорилготой. Тиин Буряадай гүрэнэй цирк Россиин болон хари гүрэнүүдэй түрүү циркын бүлгэмүүдтэй харилсаа холбоо тогтоохо, регион хоорондын хэмжээндэ гараха түсэбтэй. Энэ хэмжээ ябуулгада хабаадахадаа, циркын артистнар мэргэжэлээ дээшэлүүлнэ, бэе бэетэеэ дүй дүршэлөөрөө андалдана. Юуб гэбэл, фестивальда хабаадагшад харагшадые баярлуулхаһаа гадна клоунада, акробатика, “Каучук” гэһэн онсо жанраар мастер-классуудта ябаа. Тэдэнтэй Калужска областиин арадай уран бэлигэй түбэй директор суута Александр Шелковников, Монголой “АССА” циркын уран һайханай хүтэлбэрилэгшэ Цэнд-Очир Сэлэнгэ хүдэлөө.
