Тэрэнэй өөрынь зохёоһон магтаалнуудые, үреэлнүүдые, зүжэглэмэл сэдэбүүдые, аман зохёолой ба ёһо заншалай удхатай наадануудые театрнуудай, аман зохёолой хамтаралнууд хэрэглэжэл байдаг. Энгельсина Дашиевнагай хабаадалгатайгаар “Хадаг табилга”, “Үхибүү үлгыдэ оруулалга”, “Бэриин заһал тушаалга”, “Гал тахилга” гэхэ мэтэ хуушанай заншалта гуримууд һэргээн харуулагдаа.
Энгельсина Дашиевна – олон янзын республикын, бүхэроссиин хэмжээнэй мүрысөөнүүдтэ, ехэ наадануудта эдэбхитэйгээр хабаадаһан: Гэсэриадын 1000 жэлэй ойн баярта, Папа Тушемиловай 100 жэлдэ зорюулагдаһан республикын хэмжээнэй үльгэршэдэй мүрысөөнүүдэй дипломант; “Янжамын сондор” гэһэн Зунай ехэ нааданай I шатын дипломант; республикын хэмжээнэй үльгэршэдэй, магтаалшадай мүрысөөнэй I шатын лауреат.
РСФСР-эй арадай гэгээрэлэй отличник, Буряад Республикын габьяата багша Энгельсина Будзанаева 2007 ондо “Эрхим багша” гэһэн республикын, 2008 ондо “Россиин эрхим багшанар” гэһэн мүрысөөнүүдэй илагшань болон тодороо. Багшын ажалай ветеран Энгельсина Дашиевна хүүгэдые болон залуу үетэниие элинсэгүүдэйнгээ һүлдые үргэжэ, хүндэлжэ ябахаар хүмүүжүүлхэ ба угай үе залгаае бүтэн бүрин үлээхэ хэрэгтэ арадайнгаа үндэһэн соёлой бодото түшэг тулгуури байһыень сүм мэдэрдэг.
