Үни холоһоо тэрэ Дангинын титимдэ хүртэхэ эрмэлзэл бөөмэйлэн ябаа. Гансал сэбэр һайхан байһаараа эрилтэ ехэтэй жюриин гэшүүдэй талархалда энэ басаган хүртөөгүй. Арюна бага наһанһаа эдэбхитэй, һонюуша, зохёохы һэдэбтэй басаган һэн.
Тэрэ һурагша ябаха үедөө Бүхэроссиин хэлэ бэшэгэй эрдэм-шэнжэлгын мүрысөөндэ, “Ерээдүй тээшэ алхам” гэһэн хуралдаанда, Буряадай гүрэнэй ехэ һургуулиин эмхидхэһэн “Байгалай аласын хараа” гэһэн информатикаар мүрысөөндэ хабаадажа, III шатын дипломдо хүртэһэн, мүн “Аяншадые татамаар түрэл дайдын нөөсэнүүд” гэһэн олимпиадада I шатын диплом абаһан юм. Нэгэнтэ бэшэ “Мэдэсэ ба урлал” гэһэн урилдаанай, мүн Байгал шэнжэлгын талаар хизаархоорондын олимпиадын лауреад гэгдэһэн, зүгөөр тон ехээр сэгнэдэг шагналынь гэхэдэ, Улаан-Баатар хотодо үнгэрһэн “Дундада Азиин агууехэ шэнжэлэгшэд” гэһэн Уласхооорондын хуралдаанда хүртэһэн мүнгэн медаль болоно. Буряадаймнай дангина мүн монгол туургатанай Уласхоорондын оюун ухаанай нааданда оролсон, “Логикын бодолгонууд ба түбэгтэй таабаринууд” гэһэн зүйлөөр III шатын шагнал абажа шадаһан габьяатай.
