Фильмын гол нюур – наһанай амаралтада гараһан Ирина гэжэ нэрэтэй юрын буряад эхэнэр – мүргэлшэдэй нэгэ бүлэгтэй Энэдхэг ошохоёо бэлдэнэ. Тэндэ Далай ламаһаа сэхэ Калачакрын эртэ урданай һургаалда хүртэхэ байгаа. Нойрсон байһан саһата Сибирьһээ гансата Энэдхэгэй яла-сала эрьюулгэ соо орошоод байхадаа, энэ хариин газар Ирина ба тэрэнэй нютагаархинай сэдьхэлдэ ямар нүлөө үзүүлбэ гээшэб гэжэ бидэ адагланабди.
Фильм соо оройдоол табан түүхэнүүд, буддын шажанта Сибирьһээ ерэгшэдэй табан ондоо Энэдхэг оронууд. Гэрэл зураг буулгагша Вячеслав ба буряад лама Жимбэ гэгшэд, мүн лэ Ирина шэнги Калачакрын һургаал шагнахаяа Энэдхэг руу ерээ. Эгээлэй энэдхэг айлайда байрлаһан тэдэнэй яаралгүйхэн амидарал түрэһэн нютаг тухайгаа бодолоор дүүрэнхэй. Энэдхэгтэхи ажаһуудал тэдэнэй Сибириин байдалһаа ташха ондоо байха бүреэ толи гэрэл соо мэтэ адлиханаар үзэгдэхэ юм. Баярмаа хүүхэн Энэдхэгэй багахан Дармасала хотодо буддын шажанай зурагай һургуули гаража байгаа. Эндэхи орон нютагта айхабтар дуратай байһанайхии, тэрэ хуби заяагаа эндэ ушараа. Залуу эрдэмтэн Николай энэ Энэдхэг орониие гансал шэнжэлхы талаһаа һонирхожо хараагүй юм байна.
Жагарай буддын шажанай эртэ урдын үлгы болохо Наландада тэрэ Энэдхэг ба Сибирь хоёрой хоорондын гүнзэгы барисаанай гэршэ болохо зүйл олоно. Бангалор хотын IT-нэгэдэлэй ажаллагша Дарима басаганда Энэдхэг орон ба буддын шажан хоёр тэрэнэй өөрынгөө “энэ биб” гэһэн үнэн ёһото шэнжые бэдэрхэ замайнь залуур болоо. Эсэстэ, Энэдхэгэй урда захын нэгэ дасанда байраар түбхинэһэн буряад ламанар бүдын шажанай гүн гүнзэгые ойлгохо өөһэдынгээ үзэл хүсэлэй самсаалаар энэ ороной өөрсые нэбтэлэн харана. Иринын саһата Сибирь руугаа бусабашье, шэдитэ Энэдхэг орониинь дурсагдан, тэрэл зандаа нюдэндэнь үзэгдэдэг.
