Тэрэ 1986 ондо Захааминай аймагай Сахир тосхондо түрэһэн. Буряадай гүрэнэй ехэ һургуулида политологой мэргэжэлдэ һуралсаа. Гэрэл зурагаар урзанда жэлһээ һонирхожо эхилээд, түрүүшынгээ фотоаппарат абаһан юм. Хахад жэл тухай үнгэрөөд байхада залуу фотограф Буряад ороноо бусажа, саашанхи хуби заяагаа гэрэл зурагтай холбохо гэжэ шиидээ.
Мүнөө тэрэ “Информполисой» хэблэлэй байшанда ажаллана. Энэ хүнэй түрүүшын гэрэл зурагуудһаа эхилэн, тэрэнэй “агшам зогсоохо” шадабари, өөрын онсо хараса, уранай мэдэрэл эли харагдажа, бэлигтэй фотограф болохо байһыень гэршэлээ. Бага балшар наһаяа амяа татан адагламаар уула хадата Захааминдаа үнгэргэһэн ушарынь тэрэнэй зохёохы ажалда үндэһэн шэнжэ оруулһаниинь элитэ. Москва хотодо ажаһуужа, нютагһаа холо ябаһан ушарынь, гэрэл зурагшанай өөрынь хэлэһээр, юунтэйш жэшэшэгүй зурагтай, онсо элшээр бадарһан тоонто дайдаяа, гайхамшаг нютагаархинаа шэнэ нюдөөр анхаран, ямар нэгэ үйлэ хэрэгүүдэй, байгаалиин үзэгдэлнүүдэй бишыханшье хубииень алдангүй мүнхэлжэ ябахыень албадаа. Тэрэ үнэн сэдьхэлһээ баясан, гэрэл зурагуудтань абхуулһан хүнүүдэй шарайнуудаар, гэрэлтэ агшамуудаар харагшадаа танилсуулжа, тэдэниие гайхуулна, һайхашаалгана, омогорхуулна.
