Ахын дайдаар урасхалтай болор шэлдэл сэбэр уһа голнууд, мүнхэ саһата Саяан уулын мундаргануудай ялбаан, һалхинай эшхэрээн, зуугаад наhатай мододой һаршаганаан, тэнгэриин аянга, үдын наранай халуу шатаан, талын жэргэмэлэй жэнгирээн эдир хүбүүнэй зүрхэ сэдьхэлдэ шэнгэн, бэлигэйнь дали дэгжээгээ бэшэ аа гү? Нара гаража мүндэлhэн үдэр бүри тэрэ хүбүүхэн эхэ нютагтаа, түрэл арадтаа, эжыдээ, бурхан багшын һургаалай гэгээн толондо зорюулһан ута гэгшын аялга аман соогоо гүнгэнэн ябаа. Эхэ эсэгэ хоёрһоо дамжан хүгжэмшэнэй түрэлхиин һонор шэхэн хүбүүндэ үгтэһэн. Эдир үльгэршэнэй дээрэһээ заяатай бэлигые тэрэнэй багшанар ба Соном Дугаровай нэрэмжэтэ Бүрэнголой дунда һургуулиин захирал хододоо дэмжэжэ байдаг юм. Гүржаб үшөө морин хуураар наадажа һураха, бүхэ барилдаагаар абарга болохо эрмэлзэлтэй, тиихэдээ юрэл жаргалтай хүн болохо хүсэлэнтэй ургажа ябанал даа.
Гүржаб 2012-2013 онуудай республикын болон Уласхоорондын хэмжээнэй “Баатар” гэһэн урилдаануудай лауреат, “Угайм эрдэни”, “Будамшуу-2013”, “Буряад хүнэй нэгэ үдэр-2014” гэhэн мүрысөөнүүдэй Гран-при шагналда, мүн тиихэдэ XII Бандида Хамба лама Даша-Доржо Этигэловэй үндэр нэрэдэ зорюулагдаһан “Арбан эрдэниин үргэл” гэһэн арадай оюун ухаанай болон уран бүтээлнүүдэй Уласхоорондын ехэ нааданай Гран-При шагналда хүртэһэн габьяатай.
