19-дэ бултадаа нэгэ хүн шэнги амаралтаhаа бусажа, түрүүшын суглаан үнгэрөө, энэ жэл соёл болон урлалай академи дүүргэжэ, дүрбэн залуушуул театрай артистнарай тоо нэмэбэ, нэрлэбэл, Эрхүү можоhоо Константин Осодоев, Ярууна нютагай Алдар Базаров, Агын басагад Номин Цыренжапова Янжина Ринчинова хоёр. Тиихэдэ театрай найруулагшадай бүлэгтэ мүн лэ шэнэ, залуу хүсэн нэмэжэ оробо гэбэл, Москвагай ГИТИС мүнөө зундаа дүүргэжэ гараhан Сойжин Жамбалова.
Юhэн hарын нэгэнhээ долоон болотор театраймнай анхан эмхидхэжэ эхилhэн «Алтан сэргэ» гэhэн үндэhэн театрнуудай фестивалиин хоёрдохи уулзалга эхилхэ. Энэ жэлэй фестиваль өөрын онсо талатай, нэгэдэхи фестивальhаа тад ондоо маягаар үнгэрхэ юм. Хальмаг, Тыва, Татар, Саха, Монгол театрнуудhаа хэдэ хэдэн зүжэгшэд, найруулагшад ерэжэ, эндээ хамтараад, гурбан бүлэг боложо шэнэ зүжэгүүдые найруулан табяад, харагшадай анхаралда дурадхаха, тиихэдээ манай залуу найруулагша Сойжин Жамбалова «Ромео Джульетта хоёрые», Саха театрай С. Потапов Москваhаа ерэhэн найруулагша хоёр үшөө нэгэ нэгэ зүжэг табиха.
Энэ фестивалиин ябажа байха үедэ хэдэ хэдэн уулзалганууд болохоор хараалагдана, үндэhэн театрнууд мүнөө үедэ яажа ажаллаха, хаанаhаа зүжэгүүдээ олохо ёhотойб гэhэн хөөрэлдөөндөө Москвагай театр шэнжэлдэг мэргэжэлтэн В. Б. Фёдорова бүхы зүжэг бэшэгшэдыемнай урина.
Фестивалиин тусхай айлшад боложо Москвагай Е. Вахтанговай нэрэмжэтэ театрай зохёохы бүлэг барандаа 8 зүжэгтэй буужа ерэхэ, Ород болон Буряад хоёр театрнуудай тайзанууд дээрэ табигдаха эдэ зүжэгүүдэй соносхол амяараа үгтэбэ, тэдэ зүжэгүүдтэ орохо билеэдүүд үнинэй наймаалагдажа захаланхай.
Тииhээр, айлшадаа үдэшөөд лэ, театрнай ээлжээтэ 83-дахи хаhаяа арбан hарын тэн багаар нээхэ байха.
