Жэлдээ нэгэ дахин үнгэргэгдэдэг энэ хэмжээ ябуулга hайндэр боложо тэмдэглэгдэдэг заншалтай болонхой. Энэ жэлэй hайндэртэ хабаадалсахаар уран зохёолшо Анна Берсенёва (үнэн нэрэнь Татьяна Сотникова, Горькийн нэрэмжэтэ уран зохёолой дээдэ hургуулиин багша, хэлэ бэшэгэй эрдэмэй кандидат), найруулагша, уран зурааша Солбон Лыгденов болон бусад России болон Буряад орон соогуураа мэдээжэ болоhон уран зохёолшод, уран зураашад, гэрэл зураг буулгагшад, хэблэлшэд хабаадаха гээд хүлеэгдэнэ.
Үндэhэтэнэй номой hан дээрэ нэрлэгдэhэн айлшадтайгаа уулзалгануудые үнгэргэхынгээ хажуугаар олон тоото номууд болон түлэбүүдые харагшад, уншагшадтаа дурадхаха юм.
Нюур нээлгын баярта Ородой уран зохёолшодой холбооной уран шүлэгэй «ПаровозЪ» гэhэн суглуулбари харагшадай анхарал татаха байха. Эндэ Москвагай, Ленинградай олон шүлэгшэдhөө гадна Казаниин, манай Улаан-Үдын зохёолшодой (Булад Аюшеев, Галина Чеботарёва, Юрий Извеков, Галина Ефремова, Аркадий Перенов) шүлэгүүд болон бөө мүргэлэй дуудалганууд үгтэнхэй. Амарсана Улзытуевай шүлэгүүдые Буряадай Гүрэнэй университедэй оюутад уншаха. Тэрээнhээ гадна энэ дээдэ hургуули Великобританиин дээдэ hургуулитай харилсан ород, англи, буряад зохёолнуудай зэргэсүүлгэнүүдые харуулха юм ха.
Энэ дугыланай гол хэмжээ ябуулга болохо гэбэл, «Бурятика» гэhэн сахим номой hангай, Г. Цыдынжаповай нэрэмжэтэ Оперо болон баледэй театрай «Игорь тайжын» уран шэмэглэлнүүдэй арамнай болохо.
