Энэ Буряад Уласай олон яhата арад түмэнэй эдэ наадануудые өөрынгөө мүшэтэ саг мэтэ сэдьхэжэ байһан намарай дунда hарын шэнын 4-дэ – агууехэ Дүйсэн үдэр амида юртэмсын хэрэгтэ ами наһаяа зорюулһан, Бурхан багшын hургаалай гол удхые хүтэлбэри болгон, эб найрамдалай түлөө үдэр бүхэнөө зорюулһан гэгээн түрэлтэ Бодисада Этигэлэй Хамбын үндэр нэрэдэ зорюулагдаһан ээлжээтэ 11-дугаар «Эрын гурбан наадан» заншалта ёhоороо үнгэрбэ. 12 жэлэй саана энэл үдэр Этигэлэй хамбын м¿нхэ бэеэ дасандаа залараа бэлэй даа… Нааданай эмхидхэн байгуулагшад гэбэл Россиин Буддын шажантанай заншалта Сангха, «Сэсэг» гэhэн нюдэнэй шэлнүүдэй хамтарал, Матхановтанай гэр бүлэ байгаа.
Нютаг нугануудайнгаа алдар нэрые үргэжэ байдаг хурдан хүлэгүүдhээ гадна, абарга бүхэшүүл тэмсээндэ гаража, өөр-өөрынгөө шэгнүүрнүүдтэ Зэдын Евгений Гармаев, Хурамхаанай Артём Раднаев, Мухар-Шэбэрэй Баатар Гармаев гэгшэд солоёо дуудуулба, Зэдын аймагай Гэгээтын түлөөлэгшэ hур харбалгаар эрхимлээ.
Һайндэрэй эдэ үдэрнүүдтэ хабаадалсаhан, эхэ зургаан зүйл, хамаг амитанай туhын түлөө мүргэл мэгзэмээрээ орхингүй алба хэжэ байдаг санаартан, анхарал хайраараа орхингүй үргэжэ, хүтэлжэ байдаг албан тушаалтан, нүхэд, айлшад, та олоной үгэ бүхэнөөрөө, алхам бүхэнөөрөө буян үйлэдэжэ, амитан зондоо энэрил хайратай байдаг ябадалтнай юрөөл боложо тодорхонь болтогой!
