Һуралсал болбосоролой зургаанууд буряад хэлэнэй үдэрлиг угтан ехэ ажал эхилэнхэй. Һурагшад оюутадай, сэсэрлигэй хүүгэдэй дунда уран һайханаар шүлэглэмэл зохёол уншаха конкурс эхилхэ гэжэ байна. Буряад хэлээ һайн мэдэгшэдэй дунда оюун ухаанай тэмсээнүүд болохо. Буряад һургуулинуудай һурагшад найруулга ба диктант бэшэхэ байна. Һургуулинуудта уран зохёолшодтой ба хүгжэм найруулагшадтай уулзалганууд, ирагуу найруулагшадай үдэшэлигүүд, классай сагууд эмхидхэгдэхэ юм.
«Буряадаар ярилдая» гэһэн акци энэ жэл эмхидхэгдэхэ. Октябриин 24-дэ һургуулиин бүхы багшанар хэшээлээ буряадаар мэндэшэлээд эхилхэ юм. Телевидениин мэдээсэлэй дамжуулганууд баһал буряад хэлэн дээрэ мэндэшэлээд эхилжэ байха.
Октябриин 4-дэ уласхоорондын «Эдир Будамшуу» конкурс болохо гэжэ байна. Энэ конкурсые мэдээжэ зүжэгшэн Михаил Гомбоевич Елбонов 10-дахи жэлээ эмхидхэхэ гэжэ байна. Эдир Будамшуу гэжэ урилдаан хүүгэд залуушуулые буряад хэлэндэ һургаха, уран гоёор хэлэжэ һургаха, ерээдүйн зүжэгшэн дуушадые бэлдэжэ гаргаха зорилготой юм.
Буряад Улсын номой санда ехэ юумэн хэгдэхэ. «Үнэр һайхан буряад хэлэн» гэһэн тэмээр найруулга бэшэлгээр урилдаан болохо, буряад номуудай үзэсхэлэн дэлгээгдэхэ, поэдуудтэй уулзалганууд эмхидхэгдэхэ.
Хотын һургуулиин хүүгэд «Оюун бэлиг» гэһэн урилдаанда бэлдэжэ байна. Энэ урилдаан 29-дэхи Буряад гимназида болохо.
Буряад хэлэн дээрэ пьесэ бэшэхэ урилдаан арадай театрнуудай дунда үнгэрхэ.
Октябриин 24-дэ Буряадай драмын эрдэмэй театрта Буряад хэлэнэй үдэрлигэй баяр ёһолол болохо, тэндэ дуу бүжэгэй ехэ тоглолто байха ба республикын тэмсээнүүдтэ шалгарһан хүнүүдтэ бэлэгүүд гардуулагдаха.
Буряад хэлэнэй үдэрлигые хаа хаанагүй амьдардаг буряад үндэһэтэн дэмжэжэ байна. Эдэ үдэрнүүд соо Үбэр Байгалай хизаарта, Эрхүү можодо үргэнѳѳр тэмдэглэхэ гэжэ байна. Москвагай, Санкт Петербургын, Томскын, Яхадай, Новосибирскын,Улаан-Баатарай буряадууд баһал элдэб арга хэмжээ эмхидхэхэ, эхэ хэлээ магтан түүрээхэ юм.
