Энэ зүжэгые буряад хэлэндэ Цырен-Дулма Дондогой оруулhан юм. Россиин Федерациин соёлой габьяата хүдэлмэрилэгшэ Джемма Баторова табина, хубсаhанай талаар уран зурааша Елена Демидова.
Дэлхэйн бүхы шахуу театрнууд 400-гаад жэлнүүдэй саана бэшэгдэhэн энээхэн зүжэгые мянга гаран дахин табиhан байдаг.
Ажабайдалай юрын бэшэ асуудалнуудта харюунуудые зоболонто бэдэрэлгэ, тиихэдээ Гамледэй «Байха гү, али үгы гү?» гэhэн гол асуудалда харюунуудые Россиин габьяата артистнар Должин Тангатова, Олег Бабуев, Буряадай арадай артистнар Зоригто Ринчинов, Баярта Ендонов, Буряадай габьяата артистнар Бэлигтэ Дамбаев, Болод Динганорбоев, Сэнгэ Ломбоев, Надежда Мунконова, залуу артистнар Ольга Ранжилова, Людмила Тугутова, Булад Самбилов болон бусад бултадаа шахуу тайзан дээрэ бэдэрхэ байха.
Энэ зүжэг 12-hоо дээшэ наhатанда хараалагданхай.
«…Байха гү, али үгы гү?
Баhал гайтай асуудал.
Хуби заяандаа наншуулан, нэрбүүлэн,
Хубхай тэсэжэл ябаха гү, али
Үер далайдал эбхэрэн ерэhэн зоболониие
Үhэрин бодожо тэмсээд лэ,
Үгы болошохо гү?
Үхэшэхэ.
Нойрсошохо. Тиигээд лэ дүүрээ.»
