Дуушадай олон тоото уласхоорондын мүрысөөнүүдтэ (тэрэ тоодо заншалта болоhон Һасаран Линховоиной нэрэмжэтэ) илан тодорогшо, тиихэдэ ерэхэ Сагаалган багаар нара хараха гурбан диск гаргаhан театрай дуушан Ольга Жигмитова харагшад болон шагнагшадтайгаа энэ hарын 19-дэ уулзаха гэжэ, энэ үедэ бэлэдхэлэй хүдэлмэринүүд ябуулагдажа байна.
Дуунай энэ уулзалгые манай Оперын театр 75 жэлэйнгээ ойн hайндэртэ зорюулна.
Yдэшын туршада харагшад мэдээжэ оперонуудhаа ааринуудые, урданай романснуудые, тиихэдэ П. Чесноковой шажанай зохёолнуудые шагнаха, Эржена Батудаева, Елена Огай, Ольга Бесфамильная, Валентина Полонова, Дарья Коркина гэдэг мүнөө үеын зохёогшодой дуу хүгжэм анха түрүүшынхиеэ зэдэлхэ.
В. Волчанецкийн хүтэлбэри доро симфоническэ, В. Ткаченкын хүтэлбэри доро ород арадай зэмсэгүүдэй оркестрнүүд наадаха, Ольга Жигмитовагай концертдэ дуушад Ариунбаатар, Цыренчунд гэгшэд, тиихэдэ дууриин театрай найрал дуушад хабаадалсаха.
Юрэдөө, hонин лэ үдэшэ болохоор хүлеэгдэнэ, асуудалнуудай гараа hаа, 21-36-00, 21-36-72 гэhэн дугаарнуудтай утасаар холбоо тогтоожо асуугаарайт.
