Ажабайдалай элдэб янзын талын гүнзэгы удха зураглан харуулһан, авторай ухамайлан бодомжолһон зохёолнууд бэшэгдэнэ гэжэ тобшолхоор байба. Эдэ зохёолнуудые ехэнхинь дүй дүршэлтэй, өөрсэ шэнжэтэй, маягтай ехэнхинь дээдэ үеын зохёолшод бэшэбэ. Жэшээлхэдэ, эдэбхи ехэтэйгээр бэшэжэ байдаг Дулгар Доржиевагай “Галсама», буряад хэлэнэй баялиг, уран зураглалай аргануудые гүйсэд хэрэглэдэг мэдээжэ зохёолшон Михаил Батоинай “Багша”, Владимир Баторовай «Илалта», Николай Соктоевой «Эжымни, алтамни», Владимир Запхановай «Энэл үдэрые хүлеэгшэ hэм», Бато-Мунко Гончиковай «Үйлын үри», Николай Шабаевай «Хээрын ушарал» гэһэн зохёолнууд һонирхолтой гээд жюриин гэшүүд тэмдэглэбэ. Жаргал Жербаевай «Байгалай дуун», «Уржин Гармаев», Галсан Нанзатовай «Шэдитэ ундан», Эрдэни Жамбаловай «Буряад-монгол айлай нэгэ үдэрэй домог» гэжэ зохеолнууд - хүнэй анхарал татаха hайн талань олон гэжэ хэлэгдэбэ. 26 бүтээлнүүд сооhоо эгээл эрхимүүдые шэлэхэнь хүндэ байгаа. Шэнэ сагай эрилтээр зураглажа, мүнөө үеын шэнжэ шарайда тааруулан, «шэнэ амисхаал, шэнэ шуhа» зохеолнуудтаа оруулха гээшэмнай ехэ хүндэ хүшэр, харюусалгатайшье. Энэ мүрысөөнэй дүнгөөр 3-хи һуури “Буряад үнэн” һониной журналист Цырегма Сампиловагай “Найдалай хүсэн” Эсэгэ ороноо хамгаалгын Агууехэ дайнай 70 - жэлэй ойдо зорюулһан пьесэ, 2-хи һуурида Сергей Доржиевай “Байгалай басаган” гэжэ мүнөө саг зураглаһан пьесэ гараа. Хүлгөөтэ үедэ болоһон үйлэ хэрэгүүд олон зоной хуби заяанда хабаатай, сэдьхэлэй хүбшэргэй дайража шадана. Валерий Дабаевай (псевдоним Басаа) “Хэнзэ ногоон” гэжэ зохёол эрхим гэжэ тоологдобо. Мүнөө үеын драматургиин шанар шэнжэ, урасхалтай тааралдуулжа, автор бэшэжэ шадаһан байна.
Хэдышье һайн зохёол байбашье, тайзан дээрэ ямар режиссёр табихаб, ямар артистнар наадахаб гээд лэ асуудалнууд олон. Эдэ зохёолнуудые Хурумхаанай аймагай Улюнхаанай, Хэжэнгын аймагай Хэжэнгын, Эдэрмэгэй, Баргажанай аймагай Баянголой, Түнхэнэй-Хэрээнэй, Ахын-Орлик һууринай һайн дуранай театрнууд гүрэнэй мүнгэн дэмжэлгэдэ хүртэжэ, зүжэгүүдые арад зондоо харуулха юм. Буряад хэлэмнай бадаржа, шэхэнэй шэмэг, сэдьхэлэй баяр болохонь болтогой.
Харин энэ дэмбэрэлтэй хэрэг иигээд дүүрээ бэшэ, саашаа иимэ мүрысөөнүүд үнгэргэгдэжэ, һайн зохёолнууд бэшэгдэхэ байһаниинь дамжаггүй.
Алтан дохёогой хаһа ерэхэл байха!
