Зохёогшо энэ ном соогоо ургажа ябаһан эдир үетэндэ анхаралаа хандуулан, уг гарбалаа мэдэжэ, уранаар шүлэглэжэ, үреэл хэлэжэ, зон соо бэеэ абажа ябаха хэрэгтэнь дэмжэн, Гэсэр баатар, дангинанарай мүрысөөндэ хэлэхэ үгэнүүдыень бэшэнхэй. Нарай хүүгэдһээ эхилээд, үндэр наһатан хүрэтэр үргэн арадайнгаа һайн һайхан шэнжыень харуулан магтана.
Хүдөөгэй, һургуулиин тайзанда табигдамаар багахан зүжэгүүдшье, түрэ найрай үреэлнүүдшье эндэ ороо. Аба эжын заяаһан алтан хойморто оршодог арюун нангин шүтээнүүдэй, буряадай олон дасангууд болон Хамба ламанарта зорюулһан магтаалнуудшье хүндэтэй һуури эзэлнэ.
Цырен-Ханда Дарибазарова: “Хүүгэдээр хүдэлжэ ябаһан хүн хадаа иигэжэ хэлэхэ байнаб: үхибүүдтэ ехэ хэмжүүрэй текст сээжэлдүүлхэ айлтагүй, тэдэмнай ямаршье ута зохёол хадууха арга боломжотой юм. Жаахан наһанай хүүгэдтэ заалһаа онтохо хөөрөөд лэ дүүргэхэ гээшэ буруу, тэдэ ажабайдалай бүхы үзэгдэлнүүдтэй танилсаха, муу һайень илгаха шадалтай байха ёһотой.
Мүн зүжэглүүлжэ, хэлыень нугаруулжа, аймхай, эшэмхэй абарииень даража, зон соо ябажа шадахаар, өөдэргэ хёрхыень хүгжөөбэл, үлүү болохогүй. Сэсэрлигэй багашуул гансал «Реэпхэ» мэтэ зохёол ойлгохо гэжэ һанадаг, харин эдэмнай бүри һургуулиин шабинарай үзэхэ зүйлнүүдые ойлгодог, ойлгохоёо тэгүүлдэг байна. Юртэмсын, байгаалиин үзэгдэлнүүд тухай хөөрэжэ, сээжэлдүүлжэ (Жэшээнь, хэды океан, материгууд, манай наранай аймагта хэды гариг юртэмсэнүүд бииб гэхэһээ эхилээд, бүришье орёо темэдэ орожо туршахада яахаб), томошог хүүгэдэй уншамаар «Гэсэр», «Аламжи-мэргэн» гэхэһээ эхилээд, «Робинзон Крузо», «Гулливер», «15-тай капитан», Карлсон тухай туужа гэхэ мэтэ зохёолнуудтай танилсуулхада ехэтэ һонирходог, ойлгодог юм.
Мүн уураг тархиинь бүрилдэжэ байха сагта буянта, нүгэлтэ үйлэнүүдэй илгаае ойлгуулжа үрдибэл, хожомойнь ажаябуулгада нүлөөтэй байхал. Хүүгэдэй сагаан саарһандал арюун сэдьхэлдэ удхатайхан бэшэг тамга үлээхэеэ яараял. Сагнай ондоо болоо гэжэ ойлгожо, хуушарһан программануудһаа холо алад дабхихаар болоо гэжэ һанахаар”.
