Хэнзэ ногоон». Орой намартаа сабшалан дээрэ ургаhан ногоон… Уран зохёолшо Цырен-Дондог Хамаевай иигэжэ нэрлэhэн романиие Басаа Валера зүжэгэй маягта оруулжа, үнгэрhэн жэлэй hүүл тээшэ соносхогдоhон зүжэгүүдэй мүрысөөндэ табиhан байгаа. Республикын арадай уран бэлигтэнэй түб буряад хэлэн дээрэ зүжэгүүдэй тон үсөөрhэн, тэдэниие бэшэдэг хүнүүдэй мүн лэ үсөөрhэн байдалые хараадаа абажа, энэ мүрысөө соносхоhон байгаа. «Хэнзэ ногоон» – эндэ ороhон 26 зүжэгүүдэй нэгэн. Эрхимүүдынь шэлэгдэн абтажа, шагнал хайрануудта хүртэhэн юм, тиихэдээ тэдэ зүжэгүүд тайзан дээрэ табигдахаар зууршалагдаа бэлэй. Тиигэжэ энэ зүжэг бэлигтэй найруулагша, Хэжэнгын арадай театртай Балдан Ябжановай «Эхын дуудалга», «Кураж эхэ ба тэрэнэй хүүгэд», «Мүнгэн жолоо» гэhэн зүжэгүүдые табижа, мэргэжэлтэ театрhаа дутуугүй наада харуулжа харагшадаа гайхуулhан Баярма Владимировна Жалцановагай гарта орожо, Хэжэнгын болон Эдэрмэгэй арадай театрнуудай хүсөөр нара хараа. Тайзан дээрэ табигдаhан зүжэгүүд соогоо түрүүшын hуурида гараа.
Зүжэг соо дайнай хойнохи түрүүшын жэлнүүд… Могсохонhоо гарбалтай, Буряадай Ехэ hургуулиин оюутан Ширап Очиржапов, Эдэрмэг тоонтотой Чингис Гонжапов, олон түмэндэ мэдээжэ болоhон Ирина Мункина, Түмэн Танхаев, Цырегма Гомбоева, Сэсэгма Шойнхорова, Владимир Балданов, Билигма Ванзатова, Баира Юмжапова, Рыгзэма Дашиева, тиихэдэ соёл урлалай талаар хамаг бүгэдыень ээм дээрээ үргэжэ ябадаг Сэсэгма Шойдокова гээд лэ харагшадайнгаа урда Буряад театрай хүшэгэ мартын 21-дэ 17 сагта нээхэ гэжэ түхеэржэ байнхай.
