“Энэ үдэр хүүхэлдэйн зүжэгүүд дэлгэгдэжэ, элдэб һонин уулзалганууд үнгэргэгдэжэ, хүүхэлдэйн театрай бүхы мэргэжэлтэд нэгэдэг лэ! Бүгэдэ зон манай һайндэртэ хабаадаг! Бүгэдэ хүн зон манай театрнуудай үльгэр шэдитэ орон руу шунгаг лэ!” - гэжэ уряалһан байха юм.
Буряад ороной “Үльгэр” гэһэн хүүхэлдэйн театр «Унима” гэһэн эмхитэй нягта холбоотой, энэ эмхиин бүридэлдэ ородог Россиин үсөөхэн театрнуудай тоодо оронхой юм. Энэ холбоонтой харилсаһанай болон театрай удха түгэлдэр зүжэгүүдэй ашаар хүүхэлдэйн театрнуудтай харилсаан бэхижүүлэгдэдэг. “Уласхоорондын олон тоото фестивальнуудта “Үльгэр” театр уригдажа, амжалтатай хабаададаг юм.
«2013 ондо “Үльгэр” театр “Театр кукол- XXI век” гэһэн Россиин эблэлэй бүридэлдэ оруулагдаа. Тус эблэлэй түрүүлэгшэ Россиин арадай артист Станислав Железкин: “Танай хамта олониие соёлой хүдэлмэрилэгшэдэй Түб Ордоной тайзан дээрэ 2014-2015 онуудай хугасаада зүжэг наадаяа харуулхыетнай хүлеэжэ байнабди”, - гэжэ тэрэ бэшэг бэшэһэн байна»,- гэжэ Үльгэр театрай найруулагша А.Овчинников хөөрэнэ.
Үльгэр театр жэл бүри өөрынгөө ажал һайжаруулжа, шэнэ бүтээлнүүдые бэлдэжэ, харагшадаа баясуулжа байдаг. Үнгэрһэн 2014 ондо театр ехэ олон шэнэ зүжэгүүдые табиһан байна. Жэшээнь, “Ята Саляагай дуунууд” ( найруулан-табигша - Б. Улзутуева), “Чудесный клад” ( найруулагша - С. Жамбалова), “Сказки дедушки Чуковского” ( найруулан табигша - Э. Жалцанов), Агуу Илалтын һайндэртэ зорюулагдаһан “Пока земля вертится” ( найруулагша А. Овчинников) болон бусад зүжэгүүд табигдаа.
Үхибүүдтэ зорюулагдаһан зүжэглэмэл нааданууд дэлгэгдээ. Энэ хэмжээ ябуулгануудта үхибүүд үлгэсэһөө эхилээд лэ, үльгэрэй онтохон руу шургажа, ошон ошотороо, шэдитэ хүсэндэ абтан байдаг гээшэ. Жэшээнь, найруулагша А. Овчинниковай «Посвящение в театралы»; «Проделки Арлекина и страдания Пьеро»; «Веселый Карлсон- играем в театр - ищу друга” гэһэн нааданууд шэнэ хаһада табигдаа.
2014 оной сентябрь һараһаа “Үльгэр наадан” гэһэн үхибүүдэй зүжэгэй студи ажаллажа эхилээ.
“Эндэ үхибүүдые хара багаһаань бэлигыень хүгжөөхэ, уран һайханай шэглэлээр хүмүүжүүлхэ зорилгонууд табигдана. Үхибүүдэй сэдьхэл зүб мүрөө һалбаруулха, юумэ түргэн хадуужа абахые хүгжөөхэ, соёлой алишье талаар хүгжэнги, элдэб мэдэсэтэй, мүнөө үеын эдиршүүлые хүмүүжүүлхые эндэ оролдодог,- гэжэ “Үльгэр” театрай директор Баирма Дашидоржиева хөөрэбэ.
Октябрь һара соо “Зархайн шэдитэ үльгэрнүүд” гэһэн харалганда Буряад ороной хүүгэдэй һайн дуранай хүүхэлдэйн 24 бүлгэмүүд хабаадаа һэн. Энэ хэмжээ ябуулга һаяхан эмхидхэгдэжэ эхилбэшье, бүгэдэндэ ехэтэ һайшаагдаа. Энэ фестиваль Буряад Уласай Гүрэнэй программаар дэмжэгдээд, мүнгэнэй тэдхэмжэдэ оруулагдаһан. Энэ фестивалиин гол шангуудые – багуудые уран зураашан Зоригто Доржиев бүтээжэ, ямаршье түлбэригүйгөөр бэлэглээ бшуу.
“Үльгэр театрай дэргэдэ үхибүүдэй соёлой болон сүлөө сагай түб байгуулагдаа. Эндэ үхибүүдтэ зорюулагдажа, һонин уулзалга, элдэб нааданууд эмхидхэгдэдэг, үхибүүдтэ амтатай эдеэ хоол дурадхагдадаг.
Байгша 2015 он Уран зохёолой жэл гэжэ тодороо бшуу. Энэ гаршагта зорюулжа, “Үльгэр” театр эдир харагшадтаа элдэб һонин зүжэг наадануудые дэлгэхэ. Бултанай дуратай “Тархайн хүбүүн Зархай” (Ш. Нимбуев), “Хара тахяа болон газар дорохи хүнүүд” (А. Погорельский), “На деревню дедушке. Ванька” ( А.П.Чехов) гэһэн зүжэгүүд дурадхагдана.
Харин мартын 21-нэй үдэр “PUPPET PARTY” гэһэн эстрадна наадан харагшадта табигдаха. Найруулагша Белигма Улзутуева зохёон бэлдэбэ. Энэ үдэр хүүхэлдэйнүүдэй гоё һайхан үдэшэ үнгэрхэ, шэдитэ шаар эрьюулжэ байһан “Һонин зонуудтай” ушархат! Бүмбэгэр шаарай эрьелдэсээр Урда Америкэ, Африка болон Зүүн зүгэй орон руу аяншалхат! Мүн Росси гүрэншье хүрэжэ дахин ерэхэт. Эди шэдитэ аргаар хүүхэлдэйнүүдтэй артистнар яажа ажалланаб, яажа тэдэнэй амидыруулнаб гэжэ харагшадаа һонирхуулха.
