Энэ хүн тухай, тэрэнэй үшөө мэндэ байхада, ехээр бэшэгдэhэн байдаг.Түб hонинууд, эрдэмэй шэглэлтэй сэтгүүлнүүд, Буряад ороной hонин хэблэлнүүд, номууд соо яhала дэлгэрэнгы мэдээсэлнүүд ушардаг байгаа. Элдэб оньhон түхеэрэлгэнүүдэй түхэл байгуулдаг хүдэлмэришэн, РСФСР-эй габьяата ухаалан зохёогшо, СССР-эй уран зураашадай холбооной гэшүүн, хизаар ороноо шэнжэлэгшэ, СССР-эй географическэ нэгэдэлэй бодото гэшүүн, тиихэдэ түбэд эмнэлгээр мэдээжэ аргашан. Энэ хүн тухай фильмнүүдые буулгаhан байха, шүлэгүүдшье зохёогдоо. Тэрээн тухай уран зохёолшод, эрдэмтэд, зүжэгшэд, ниитын ажал ябуулагшад хөөрэлдэдэг байгаа. Энэ номдо ороhон мэдээсэлнүүд тэрэ хүн тухай бэшэгдэhэн зохёолнуудай багахан хубинь болохо. Ном уншаад байхадаа Галдан Ленхобоевай эрдэмэй, уран hайханай, гүн ухаанай, бэлигэй талаар Буряадай эрдэм болон соёлдо оруулhан хубита айхабтар ехэ, үшөөшье хүсэндөө хүрэхөөр сэгнэгдээгүй байhаар гэжэ ойлгохо байхат.
Шухала, баян, тон хэрэгтэй дотортой энэ ном бүтээхэдэ хабаадагшад Серафима Очирова, Дыжит Батуева, Шарайд О. Галсан, Сергей Ильин, Татьяна Гиргушкина, Намжилма Бальжинимаева, Гэсэгма Доржиева, Жаргал Бадагаров гэгшэд харюусалгата редактор Жанна Дымчиковагай хүтэлбэри доро оролсобо гэжэ онсолон хэлэхэ хэрэгтэй.
Дамба-Даржа Заяевай нэрэмжэтэ Буддын шажанай «Даша Чойнхорлин» гэжэ Ехэ hургуули, Буряадай үндэhэтэнэй номой hан, Буряад Уласай үндэhэтэнэй, түүхын музейнүүд, Ивалгын аймагай Гэльбэрын дунда hургуули, тиихэдэ Галдан Ленхобоевай гэр бүлынхид хамhалсажа туhалба.
«Буряадай соёл» гэhэн Буряад Республикын Гүрэнэй түлэбэй ёhоор оролсоhон Буряад Уласай соёлой яаманай мүнгэн туhаламжаар энэ ном хэблэгдээ.
