Yнгэрhэн намартаа Буряад театрай үнгэргэhэн «Алтан сэргэ» гэжэ театрнуудай уласхоорондын фестивалиин үдэрнүүдтэ туршалгын бага тайзан дээрэ ябууд табигдажа, театр шэнжэлэгшэдэй үндэр сэгнэлтэдэ хүртөөд, энэ зүжэгые буряад хэлэн дээрэ өөрынгөө тайзан дээрэ үргэн харагшадтаа табиха гэhэн шиидхэбэри абтаhан байгаа. Буряад хэлэндэ оршуулагдаа. Эндэ зүжэгэй удха тайлбарилжа байhанай хэрэг үгы, бүгэдэндэ мэдээжэ байгаа, тиин энэ хоёр үдэшэнүүдэй удаа бүришье hаа мэдээжэ болоо гэхээр, тиихэдээ гол удхань эгээл энэ үедэ гэхэ юм гү, али «зэрлиг» капитализмын үедэ ажаhуужа байhан маанарта «сонхымнай саана үдэр бүри боложо байдаг…» мэтэ харуулагдаба гээшэ. Хүшэгын нээгдэхэдэ танхим сооhоо тайзан дээрэ яhала танил бэлигтэнээ хаража хужарлаха талаан тудаа гэе: буряадай арадай артист Баярта Ендонов, Буряадай габьяата артистнар Бэлигтэ Дамбаев, Сэнгэ Ломбоев, Болод Динганорбоев, Дарима Лубсанова, Надежда Мунконова, Дарима Цыденова-Тулохонова, Жажан Динганорбоева, Галина Галсанова, аха нүхэдэйнгөө хойноhоо бэлигээ мүлижэ ябаhан залуушуулнай – артистнар Алексей Михайлов, Солбон Ендонов, Зоригто Цыбендоржиев, Булад Самбилов, Даша-Нима Доржиев, Ольга Ранжилова, Шэмэд Дондоков, Людмила Тугутова, Ада Ошорова, Номин Цыренжапова, Янжина Ринчинова гээд лэ эгээ энэ үедэ зүжэг бүридэ эрхимээр наадажа ябадаг эгээл бэлигтэй залуушуулнай ха юм.
Зүжэг найруулхада олон мэргэжэлтэд хэрэгтэй байдаг – найруулагшын туhалагша, Буряадай габьяата артист Елена Дамбаева, уран зурааша Геннадий Скоморохов (Москва), гэрэл тааруулагша уран зурааша Сергей Скорнецкий (Москва), хубсаhа зохёогшо уран зурааша Анастасия Шенталинская (Москва). Зүжэгые найруулагша Сойжин Жамбалова Анастасия Дружинина хоёр хүгжэмэй талаар шэмэглээ. Тиигэжэ Буряад театрнай «Зохёолшын нүгэлтэ бодолнуудые зүжэгшэд тэгшэлэн харуулха байха» – гэhэн У. Шекспирэй найдалые харюулба гээшэ ха.
