Шэтын хүүгэд гурбан үдэрэй туршада халуун ороной хоорондоо хани халууншье, харша хүйтэншье харилсаатай ан амитадаар, тэдэнэй дунда гэнтын ушараар бии болоhон Мауглитай уулзаха, саашадаа энэ зүжэгнай Агын тойрогой гурбан аймагуудай хүүгэдэй урда дэлгэгдэхэ. Энэ Шэтэ, Агын тойрогоор ябадалдаа манай театр тайзан дээрээ 15 жэлнүүдэй туршада табигдажа байhан «Түрын дүхэриг» («Улейские девушки»), тиихэдэ мэнэ hаяхана Саян Жамбаловай Басаа Валератай суг бэшээд, найруулан табиhан «Yнгэрhэн сагай hэбшээн» гэhэн зүжэгүүд, тэрээнhээ гадна уран бэлигтэнэйнгээ концерт-наада дурадхаха. Театрай болон Yбэр Байгалай хизаарай харагшадай хоорондын харилсаан анханайнгаа заршамаар найдамтай бэхи, энэ уулзалгаhаа хоёр талын сэдьхэлээ жэгнэжэ, эльгэлжэ тарахань мэдээжэ. Эндэ дээрэ хэлэгдэhэн хоёрдохи бүлэгтэ ороогүй артистнар барандаа тооной ябалсана, тиихэдэ Ага найман эсэгын ажабайдалаа түхеэрhэн тойрогhоо гарбалтай Россиин габьяата артист Должин Тангатова, Буряадай арадай артист, найруулагша Саян Жамбалов, Буряадай арадай артист Зоригто Ринчинов, Буряадай габьяата артистнар Сэнгэ Ломбоев, Болод Динганорбоев, артист Галина Галсанова, театрай залуу найруулагша, артист Сойжин Жамбалова, залуу артистнар Зоригто Цыбендоржиев, Номин Цыренжапова, Янжина Ринчинова гэгшэд.
Хоёрдохи бүлэгнай: Россиин арадай артистнар Лариса Егорова, Марта Зориктуева, Людмила Дугарова, Михаил Елбонов, Россиин габьяата артиснар Олег Бабуев, Дамбадугар Бочиктоев, Буряадай габьяата артист Солбон Субботин, артистнар Виктор Жалсанов, Оюна Тудупова. Энэ бүлэг зүжэгшэднай шогтой-зугаатай, дуутай-шуутай тоглолто абажа апрелиин 13-да Ивалгын аймагай Доодо-Ивалгада наадаяа эхилжэ дэлгээд, саашадаа 14-дэ – Хори, 15-да – Хэжэнгэ, 16-да – Улаан-Yдын 29-дэхи hургуули, 17-до – Яруунын түб Нарhата, 19-дэ – Сэлэнгын аймагай Галуута-Нуур (Тамша), 20-до – Шэнэ-Бууса, Асагад (Загарайн), 21-дэ – Харганаа (Сэлэнгын), 22-то – Жаргаланта (Сэлэнгын), 23-да – Шанага, Шэбэртэ (Бэсүүрэй), 24-дэ – Сэлэнгын аймагай Ташар – энэ замаар харагшадтайгаа уулзажа бусаха түсэбтэй гараба.
Юрэдөө, театрай хоёр бүлэг яhалахан hонирхолтой уулзалгануудые эмхидхэжэ бусахань ха гээд хүлеэгдэнэ.
