Буряад арад түмэндэ урданhаа хүндэтэй тамирай эдэ нааданууд «Мааниин магтаал» дуулан уншалгаар эхилхэ. Буряад барилдаан арадай дунда урданhаа нааша дэлгэрэнги, хүндэтэй байhан юм. Галабhаа нааша буряад арад баатар абарганараа хүндэлжэ, алдар солыень дуудажа байгаа, уран зураашад дүрэ зурагыень байгуулха, уран шүлэгшэд, үльгэршэд соло зохёохо, дуудаха дуулаха заншал дэлгэржэ, энэ үе хүрэтэр нангин гамтай хүрэжэ ерээ. Олон зоной хабаадалгатай ямаршье hайндэр, хурал-мүргэлнүүд барилдаашадай наадагүйгөөр үнгэрдэггүй бэлэй. Мүнөөшье тэрэл зандаа.
Нааданай урда буряад барилдаагаар аймагуудай, республикын, Орос Уласай, тиихэдэ Уласхоорондын хэмжээнэй мүрысөөнүүдтэ илажа тодорhон абарга баатарнуудай жагсаал болохо.
Уласхоорондын мүрысөө Россиин Буддын шажантанай заншалта Сангхын Бандида Хамба лама Дамба Аюшеев Буряад Уласай Толгойлогшо Вячеслав Владимирович Наговицын гэгшэд нээхэ
Буряад барилдаан гээшэ өөрын нарин гуримуудтай. Барилдаашад уян нугархай, хүдэлсэ hайтай байхаhаа гадна мэхэлжэ гэнэдхээхэ арга дүрэнүүдые хэрэглэдэг. Абаргын нэрэ зэргэдэ хүртэхын түлөө олон барилдаашад тэмсээндэ бододог, теэд барандань аза талаан тудаха гэжэ байдаггүй ха юм даа.
Энэ барилдаанай ахамад заhуул – республикын хэмжээнэй шүүгшэ Пильчиков Владимир Васильевич; ахамад данса баригша-бэшээшэ – республикын хэмжээнэй шүүгшэ Батуев Анатолий Цыденович. Нааданай гуримаар үшөө хэдэ-хэдэн заhуулнууд нааданай талмай дээрэ хүдэлжэ гараха юм.
Буряадаймнай Хүдөө ажахын Ехэ hургуулиин «Алтан булаг» шуулга эдэ наадануудые бэлигээрээ шэмэглэхэ гээд хүлеэгдэнэ.
