СССР-эй арадай артист Ким Базарсадаевай нэрэмжэтэ энэ мүрысөөн дүрбэдэхи удаагаа үнгэржэ байна. Yнгэрhэн гурбан мүрысөөнүүдтэ бэлигтэй залуушуулай нэрэнүүдые элирүүлээ hэн гэжэ нэрлэхэ hаа – монгол дуушад Б. Баянбилэг, Б. Жаргалсайхан, Э. Анхбаяр, тиихэдэ манай залуу дуушад С. Лубсанов, Д. Шагдуров, Г. Ванданов, Б. Аранжуров гэгшэд. Энэ мүрысөөнэй hонин талань гэхэдэ ганса эрэшүүл хабаадаха юм.
Мүрысөө шүүхэшүүлэй бүридэлдэ хүгжэмэй талаар мэдээжэ мэргэжэлтэд ороо гэбэл – шуулга хүтэлэгшэ Роберто Сольвалио (Итаали-Монгол), Ернар Нуртазин (Казахстан), тиихэдэ Буряадай харагшад-шагнагшадта яhала танил болоhон монгол дуушад А. Дашпэлжээ, Б. Эрдэнэтуяа, Зүүн Сибиириин соёлой академиин профессор О. Огнев, сэрэгэй Баруун тойрогой дуун болон хатарай шуулгын дуушан Саян Базарсадаев, манай театрай дуушад Д. Занданов, Э. Базарсадаева гэгшэд.
М. Глинкын нэрэмжэтэ Бүхэсоюзна харалга-мүрысөөндэ илагша, Буряад Республикын Гүрэнэй шагналтан, дэлхэйдэ мэдээжэ дууриин дуушан, СССР-эй арадай дуушан Ким Базарсадаевай нэрэмжэтэ мүрысөөнэй түгэсхэлэй шата Буряадай дуури бүжэгэй театр соо мүнөөдэр, апрелиин 22-то – Ким Ивановичай түрэhэн үдэр 18 сагhаа эхилхэ.
Асуудалнуудай гараа hаа иимэ утаhаар холбоо тогтоожо асуугаарайт: 21-36-00
