I. ЮРЭНХЫ ДҮРИМҮҮД
Наада эмхидхэн байгуулагшад болон эмхидхэлшэд:
• Буряад Уласай Толгойлогшын болон Буряад Уласай Засаг Газарай Захиргаан
• Улаан-Үдэ хотын Захиргаан
• Буряад Уласай Соёлой яаман
• Буряад Уласай бэеын соёлой ба тамирай талаар түлөөлэлгын газар
• Буряад Уласай арадай уран бүтээлэй түб
• Бүгэдэ Буряадай үндэhэн соёлой эблэл
Буряад Уласай Засаг Газарай Захиралтаар баталагдаһан бүридэлтэй Эмхидхэлэй хороон ниитэ хүтэлбэри бэелүүлнэ.
Наада эмхидхэлгын газар: Буряад Улас, Улаан-Үдэ хото.
Үнгэргэлгын болзор: 2016 оной __________________.
I. НААДАНАЙ УГ ЗОРИЛГОНУУД
Буряад зоной заншалта соёл болон тамирай үндэһэн зүйлнүүдые һэргээхэ, сахиха, хубилгаха хэрэгтэ али бүхы талаһаань туһалха, нүлөөлхэ, урлал, уран зохёол, кино болон тамирта, мүн бүхы ниитын болон ажахын хүгжэлтэдэ туйлагдаһан эрхим амжалтануудые харуулха гээшэ энэ нааданай гол зорилго болоно.
Нааданай гол зорилгонууд:
· Буряад арадай оюун ухаанай нэгэдэлэй үзэл бодолые, угсаатанай үгэеэ ойлголсолгые бүрилдүүлэн нэбтэрүүлгэ, ургажа ябаа залуу үетэниие, арадайнгаа олон зуун жэлэй соёлой болон тамирайёһо заншалнуудай, зүйлнүүдэй үндэһэн дээрэ хүмүүжүүлгэ;
· арад түмэнэй оюун ухаан бодолой үнэтэ баялигуудые сахин хүгжөөлгэ, арадай соёлой эрхим туйлалтануудые, арад зоной ёһо заншалнуудай, гуримуудай, ёһололнуудай гүнзэгы удхые, сэсэн мэргэн байлгые харуулха хэрэгтэ туһалалга;
· арадай олзоборинуудые хүгжөөлгэ;
· нютаг нютагай уран һайханай онсо өөрсэ ёһо заншалнуудые саашадань хүгжөөлгэ;
· уран һайханай бүлгэмүүд, дуушад болон хатаршадай зохёохы ургалта хүгжэлтые урмашуулга;
· тамирай үндэһэн зүйлнүүдые сахин хүгжөөлгэ;
· элдэб наһанай хүнүүдые, илангаяа үхибүүд болон залуушуулые бэеын тамирай соёл дээшэлүүлхэ, тамир эрхилхэ саг үргэлжын хэшээлнүүдтэ элсүүлэн хабаадуулга;
· ниитэ хүн түрэлтэнэй угай баялигуудта, бэеын тамирай ба оюун ухаан бодолой уг зорилгонуудта хүнүүдые хабаадуулга;
· ажахы эрхилэлгын, оюун ухаан бодолой болон бэеын тамирай хүгжэлтэдэ можо нютагууд болон уласхоорондын харилсаа холбоое бэхижүүлгэ;
· Гадаадын аяншалагшадые хабаадуулга.
II. НААДАНДА ХАБААДАГШАД
Yбэр Байгалай хизаарай, Буряад Уласай, Эрхүү можын, Хальмаг Республикын, Тыва Республикын,Орос Холбооной Уласай болон Дулдыданги бэшэ гүрэнүүдэй нүхэсэлэй буряад бүлгэмүүд, Монгол Уласай, Хитадай Арадай Республикын, Япониин, Корейн, Европын нэгэдэлэй, Франциин, Америкын, Австралиин болон дэлхэйн бусад орон нютагуудай түлөөлэгшэд нааданда хабаадаха.
Наада эмхидхэлгэ
Наадан хоёр шатаhаа бүридэхэ
1-дэхи шата Ехэ нааданда хабаадаха тухайгаа мэдүүлгэ үгэhэн можо, нютагай дэбисхэр дээрэ 2016 оной майн 30 болотор үнгэрхэ.
2-дохи (түгэсхэлэй) шата 2016 оной _________ ОХУ-гай Буряад Уласай ниислэл Улаан-Yдэ хотодо үнгэрхэ.
Ехэ нааданда хабаадаха орон, хизаар, можо, аймаг нютагууд (саашадаа «хабаадаха тала» гэгдэхэ) хабаадаха болон хабаадагшад тухайгаа мэдүүлгэ 2016 оной ______________ болотор _______ сахим хаягаар эльгээхэ.
Ехэ нааданай айлшад болон хабаадагшадые зошолжо абаха харюусалгата нюур ____________ , утасын дугаар _________________
III. НААДАНАЙ ЗОХЁОХЫ МҮРЫСӨӨНҮҮД
1. «Буряад хүнэй нэгэ үдэр» гэһэн аман зохёолой бүлгэмүүдэй мүрысөөн;
2. Үльгэршэдэй, магтаал шүлэгүүдые түүрээгшэдэй мүрысөөн;
3. Буряад арадай дуунуудые гүйсэдхэгшэдэй мүрысөөн;
4. Арадай уран һайханай бүтээлнүүдэй үзэсхэлэн;
5. Гоо басагадай «Дангина» мүрысөөн;
6. «Буряад хубсаһан. Ёһо заншал ба мүнөөнэй байдал» гэһэн хубсаhа зохёогшодой мүрысөөн;
7. Буряад арадай заншалта һэеы гэрэй харалга-мүрысөөн;
8. Хүгжэмэй үндэhэн зэмсэг – хуур дээрэ гүйсэдхэгшэдэй мүрысөөн;
Түлэб
«Буряад хүнэй нэгэ үдэр» гэһэн аман зохёолой бүлгэмүүдэй мүрысөөн
Мүрысөө үнгэргэхэ газар:Буряадай, Гүрэнэй Хоца Намсараевай нэрэмжэтэ академическэ драмын театр
Мүрысөөнэй уг зорилгонууд:
• Арадай соёлой эрхим ёһо заншалнуудые һэргээлгэ, сахилга болон хүгжөөлгэ, аман зохёол ёһо руунь хубилгахын тула таарамжатай байдал байгуулгада туһалалга;
• уран һайханай бүлгэмүүдэй гүйсэдхэлгын хэмжээнэй ургалтые урмашуулга;
• Буряад арадай заншал гуримуудые харуулhан арадай үндэhэн уран бүтээл хүгжөөлгэ.
Мүрысөө үнгэргэлгын гол дүримүүд ба гуримууд:
Арадай угсаатанай уг гарбалай (нютагай олондо мэдээжэ бодото аман зохёолой эшэ үндэһэнэй онсо илгаануудые түлөөлхэ ёһотой) талаар хүдэлдэг аман зохёолой бүлгэмүүд (хабаадагшадай наһан 17-һоо дээшэ байха) мүрысөөндэ хабаадаха. Бүлгэмүүд 15-20 хүнһөө бүридэхэ.
Түлөөлгэ бүхэнhөө аман зохёолой нэгэ бүлгэм хабаадаха. Эдэ бүлгэмүүд гэр бүлэнүүдэй ба литын-үйлэдбэриин, арадай һайндэрнүүдэй, залуушуулай наадануудай, зоной һуудал байдалай үзэгдэлнүүдэй хэһэгүүдые үндэһөөрнь шэнэлһэн зүжэглэмэл наада мүрысөөндэ табиха. Арадай аман зохёолой эрхим зүйлнүүд (дуунууд, хатар, хүгжэмэй зэмсэгүүд, магтаал соло түүрээлгэнүүд) эдэнэй түлэбүүдтэ оруулагдаха ёһотой. Хэр угһаа хойшо абажа сахижа ябаһан тоглоо-нааданай хубсаһа хунарта эдэ бүлгэмүүд онсо анхаралаа хандуулха зэргэтэй.
Наадан 20 минутын туршада үргэлжэлхэ зэргэтэй.
Арадай заншалта соёлой элитэ мэдээжэ ажал ябуулагшадһаа бүридүүлэгдэһэн шүүлгын бүлэг (жюри) бүлгэмүүдэй наадые сэгнэхэ.
Сэгнэлтын эрилтэнүүд:
• нааданай өөрсэ тала;
• гүйсэдхэлгын hонин тала;
• нааданай аман зохёолой аутентичность;
• хизаар ороноо шэнжэлхы эли харагдаhан шэглэл;
• тайзанай оршондо тааруулалга;
• заншалта хубсаhан;
• нааданай хэрэгсэлнүүд.
Энэ мүрысөөндэ хабаадахын тула 2016 оной майн 20 болотор баталагдаhан түхэлэй мэдүүлгэ, сахим дэбтэр соо нааданай сагай ба ябасын хубаари 670031, Улаан-Үдэ хото, Красногвардейскэ гудамжа, 32, РЦНТ хаягаар байдаг арадай уран бэлигэй түбтэ ontrcnt@mail.ru гэhэн сахим хаягаар оруулха.
Тиихэдээ нааданай сагай ба ябасын хубаариие шүүлгын бүлэгтэ гэжэ саарhан дээрэ тусагаар гаргаад оруулха.
Асуудалнуудаа 8(301-2)45-53-25 дугаарай хотын тогтомол утаhаар, 60-30-14 дугаарай гар утаhаар холбоо тогтоожо шиидхэхэт.
Түлэб
Буряад арадай дуунуудые гүйсэдхэгшэдэй мүрысөөн
Мүрысөө үнгэргэхэ газар: Буряадай, Гүрэнэй дуун болон хүгжэмэй байшан
Мүрысөөн хоёр шатаар үнгэргэгдэхэ.
1-дэхи шата: Хабаадагша хоорондоо адли бэшэ хоёр дуу абяа тодожо, сахим түхеэрэлгэ руу дамжуулдаг хэрэгсэл (микрофон) үгы дуулаха, тиихэдээ нэгэ дуугаа хүгжэмэй арадай зэмсэг дахажа, нүгөөдэ дуугаа тиимэ зэмсэг үгыгөөр дуулаха.
2-дохи шата: Нэгэдэхи шата дабажа, энэ шатада ороhон хабаадагшад урда сагай уртын дуу дуулаха, тиихэдээ мүнөө үедөө олондо мартагдаhан гү, али үсөөн дуулагдадаг, дуушанай дуу дуулаха онсо шадабариие харуулhан дуун байбал, шүүлгын бүлэгэй hайшаалда хүртэхэ ёhотой. Арадай хүгжэмэй зэмсэг дахажа дуулагшадай хоолойн түрэлхиин шанга хараада абтаха.
Түлөөлгэ бүхэн доро үгтэһэн наһанай дүрбэн бүлэгтэ 1-2 гүйсэдхэгшые табиха эрхэтэй: 10 наhа хүрэтэр, 11-18 наhанай хоорондо, 19-40 наhанай хоорондо, 40 наhанhаа дээшэ.
Мэргэжэлтэ дуушад, тиихэдэ урда жэлнүүдэй мүрысөөнүүдтэ наhанай энэл хугасаа соо илажа гарагшад хабаадуулагдахагүй.
Аялга дуугаа миндаhан дээрэ бэшээд хабаадажа болохогүй.
Түлэб
Үльгэршэд болон магтаал шүлэг түүрээгшэдэй мүрысөөн.
Мүрысөө үнгэргэхэ газар: Уласай хүүхэлдэйн «Үльгэр» театр
Мүрысөөнэй уг зорилгонууд:
• Үльгэршэд болон магтаал шүлэг түүрээгшэдэй гүйсэдхэлгын һургуули сахиха хэрэгтэ али болохоор туһалалга;
• Онсо өөрсэ гүйсэдхэгшэдые, түүрээгшэдые элирүүлгэ, тэдэнэй мэргэжэл шадабариие нарижуулга;
• Айхабтар баян аман зохёолтой танилсуулга, түүрээгшэдэй уран аргые мэдээжэ болгон дэлгэрүүлгэ.
Мүрысөө үнгэргэлгын гол дүримүүд ба гуримууд:
Ганса гансаараа гүйсэдхэн түүрээдэг үльгэршэд, буряад магтаал шүлэг (магтаал, соло, бара) уран гоёор уншагшад (түлөөлгэ бүхэнһөө нэгэ хабаадагша) наhанай хоёр илгаагаар мүрысөөндэ хабаадаха:
1-дэхи бүлэг – 7-hоо 18 хүрэтэр наhанай
2-дохи бүлэг – 18-hаа дээшэ наhанай
Мүрысөөн нэгэ шатаар үнгэргэгдэхэ. Гүйсэдхэгшэ бүхэн нэгэ үльгэрһөө хэһэг уран гоёор, һайхан найруулгатайгаар түүрээхэ (10-15 минуута), тиигээд магтаал шүлэгэй зохёолнуудые өөрынгөө дураар гүйсэдхэхэ (энэнь 3 минуутаһаа дээшэ байха ёһогүй). Тиихэдээ нютаг нютагайнгаа гүйсэдхэхэ ёһо заншалые хараада абаха шухала. Хуур гү, али морин-хуур дээрэ наадажа байгаад үльгэрнүүдые түүрээжэ болоно. Миндаһан дээрэ бэшэгдэһэн аялга хүгжэмые хэрэглэжэ болохогүй.
Хабаадагшадай ээлжээн жээрэб таталгаар тодорхойлогдохо.
Хабаадагшадые урлалай, арадай заншалта соёлой мэдээжэ ажал ябуулагшадhаа, хэлэ бэшэгэй мэргэжэлтэдhээ бүридэhэн шүүлгын бүлэг сэгнэхэ.
Сэгнэлтын эрилтэнүүд:
• Гүйсэдхэлгынгээ уран шадабаряар шагнагшадай анхарал эзэлжэ, тэдэниие үльгэрэйнгөө оршондо оруулга;
• гүйсэдхэлгын өөрсэ ба дабтагдашагүй тала;
• зүжэгшын маяг гаргалга;
• хубсаhан.
Энэ мүрысөөндэ хабаадахын тула 2016 оной апрелиин 25 болотор баталагдаhан түхэлэй мэдүүлгэ 670031, Улаан-Үдэ хото, Красногвардейскэ гудамжа, 32, РЦНТ хаягаар байдаг арадай уран бэлигэй түбтэ rcntbur@mail.ru. гэhэн сахим хаягаар оруулха. Утасын дугаар:(83012) 45-51-35, 45-56-40.
Түлэб
Арадай дархашуулай уран бүтээлнүүдэй үзэсхэлэн-мүрысөөн
Үзэсхэлэн-мүрысөөнэй уг зорилгонууд:
• Евраази түбидэ нэгэ дороо ажаhуудаг элдэб янзын буряад бүлэгүүдэй уран барималнуудай урлалай ба арадай уран бүтээлнүүдэй эрхим заншалнуудые үргэнөөр харуулалга;
• уран барималнуудай урлалай ба арадай уран бүтээлнүүдэй талаар арадай уран дархашуулай шэнэ нэрэнүүдые элирүүлгэ;
• буряад арадай уран дархашуулай согсолбори байгуулга;
• хүршэ можо нютагуудаар ба хари оронооршье ажаhуудаг буряад дархашуулай хоорондоо hаадгүй харилсаанай оршон байгуулга;
• дархашуулай мэргэжэлэй талаар шадабариие дээшэлүүлгэ;
Үзэсхэлэндэ хабаадагшад:
• уран барималнуудай урлалай ба арадай уран бүтээлнүүдэй талаар бэлигтэн;
• уран барималнуудай урлалай ба арадай уран бүтээлнүүдэй талаар зохёохы ажалтай бүлэнүүд;
• уран барималнуудай урлалай ба арадай уран бүтээлнүүдэй талаар зохёохы ажалтай бүлгэмүүд.
Уран һайханай үндэр нэрэ хүндэ, табигдаһан зохёол бүтээлнүүдэй һанаашалга бодолой онсо өөрсэ тала үзэсхэлэн-мүрысөөнэй гол эрхэ нүхэсэл болоно.
Удаадахи гаршагуудаар буряад үндэһэн гар урлалнуудай дархашуулай, бэлигтэнэй зохёолнууд түлөөлгэ бүхэнһөө үзэсхэлэндэ табигдаха гэбэл:
• Модо отолжо, hиилэжэ мүн үйhөөр бүтээhэн уран зүйлнүүд;
• түмэр дабтажа, шудхажа, hиилэжэ бүтээhэн уран зүйлнүүд;
• зөөлэн эдээр бүтээhэн уран зүйлнүүд (булгайр, арhан, hэеы, адуунай hүүл, дэлhэн, бүд);
• урда эртын сагай буряад зураг;
• угсаатанай түхэл шэнжэтэй гарай бэлэгүүд;
Түлөөлгэ бүхэн дэлгэхэ зүйлнүүдээ өөhэдөө шэлэнэ.
Yзэсхэлэн-мүрысөөнэй оршондо түлөөлгэ бүхэндэ уран зүйлнүүдээ харагшын нюдэн дээрэ бүтээхэ арга олгогдохо. Тиихэдээ уран дархан дарханай заншалта хубсаhатай, уран бүтээлээ дархалха өөрын эд хэрэгсэлтэй, зэмсэгүүдтэй, бүтээлээ дэлгэхэ түхеэрэлгэтэй байха ёhотой.
Түлөөлгэ бүхэн үзэсхэлэндэ дэлгэhэн уран бүтээлнүүд тухайгаа хөөрэжэ үгэхэ (5 минуута хүрэтэр).
Yзэсхэлэн-мүрысөөнэй дүнгүүдээр энэ урлалаар ойлгосо-мэдэсэтэй шүүлгын бүлэг мүрысөөнэй янза бүридэ доро доронь 1-дэхи, 2-дохи, 3-дахи шатын илагшадые тодоруулха.
Дээдэ шагнал эгээл hонин мүртөө олон янзын үзэсхэлэн дэлгэhэн, тэрээнээ hонирхолтойгоор хөөрэжэ хамгаалhан можо нютагта олгогдохо.
Түлэб
Гоо басагадай «Дангина» мүрысөөн
Мүрысөө үнгэргэхэ газар: Буряадай, Уласай СССР-эй арадай зүжэгшэн Гомбо Цыдынжаповай нэрэмжэтэ дуури, бүжэгэй эрдэмэй театр
Мүрысөөнэй уг зорилгонууд:
• Буряад арадай заншалта соёл, хэлэ шудалалгада, уран бүтээлдэ, гоё hайханиие сэгнэлгэдэ залуушуулай анхарал хандуулга;
• Зохёохы hэдэбтэй залуушуулай дундаhаа шэнэ нэрэнүүдые тодоруулга;
• Залуушуулай зохёохы эрмэлзэл урмашуулга, гүсэдхэлгын арга шадал hайжаруулга.
Мүрысөө үнгэргэлгын дүримүүд:
Мүрысөөндэ түлөөлгэ бүхэнһөө 17-hоо 23 хүрэтэр наhанай нэгэ басаган хабаадуулагдаха. Буряад хэлэ заатагүй мэдэхэ ёhотой.
Мүрысөө үнгэргэлгын гуримууд:
• 1-дэхи үдэр. 10:00 сагhаа – шэлэн абалгын шата;
• 2-дохи үдэр. 10:00 сагhаа – түгэсхэлэй шата, шагналнуудые гардуулга.
Сэгнэлтын гол хэм хэмжүүр:
• Зохидоор ба өөрсэ маягаар өөрыгөө харуулалга;
• түхэл шарайн зохид тала;
• Буряад арадай хэлэ, ёһо заншалнууд ба гуримуудые мэдэлгэ;
• Оюун ухаан, сэдьхэлэй сэнэг;
• Дуу, хатар гүйсэдхэхэ шадабари.
Мүрысөөнэй түлэб:
1. «Магтан дуулая нютагаа». Өөр тухайгаа, түрэл
нютаг, уг гарбал тухайгаа урлалай элдэб шэглэлнүүдые, тэрэ тоодо буряад дуунай нэгэ бадагые гүйсэдхэлгэтэйгөөр, уран хурса хөөрөөе оруулһан онсо өөрсэ соносхол-урилга. 2 минуутын туршада;
2. «Сэдьхэлэй баяр». Yндэһэн хатар гүйсэдхэлгэ. Тус
номерой миндаһан дээрэ бэшэгдэһэн аялга хүгжэм сахим дэбтэр соо гү, али CD дээрэ үгтэхэ. Сагынь – 3 минуута;
3. Буряад ёһо заншалнууд, ёһолол гуримуудые,
угсаатанайнгаа эдеэ хоол, олзобори ба гар урлалнуудые мэдэлгээр мүрысөөн;
4. «Аялга дуумни». Бага тайзанай маягтай буряад дуу
эрхим һайнаар гүйсэдхэлгын мүрысөөн. Сагынь – 3-4 минуута;
5. «Һаргама толон». Үдэшын гоёлой хубсаһа хунар ба
гоёлтонуудые (мүнөөнэй буряад хубсаһа хунараа, үһэеэ гоё һайханаар заһуулһанаа, гоёолто зүүдхэлнүүдээ) харуулалга.
Эдэ бүхы даабаринуудые жюри 10 баллаар сэгнэхэ.
Мэдүүлгэ үгэхэ болзор
Энэ мүрысөөндэ хабаадахын тула 2016 оной июниин ____ болотор баталагдаhан түхэлэй мэдүүлгэ 670031, Улаан-Үдэ хото, Красногвардейскэ гудамжа, 32, РЦНТ хаягаар байдаг арадай уран бэлигэй түбтэ rcntbur@mail.ru. гэhэн сахим хаягаар оруулха. Утасын дугаар: (83012) 45-57-44, 45-51-35 (факс).
Мүрысөө үнгэргэлгэ тухай мэдээсэл РЦНТ-эйн юртэмсын бусайдаhан соохи www.байкалфолк.рф. буудал соо байха.
Нюур зааhан баримтануудтнай заагдаhан хэм соо сохимол аргаар бүтээгдэhэн байха ёhотой!
Мүрысөөнэй шүүлгын бүлэг:
Соёл, урлалай мэдээжэ ажал ябуулагшадhаа, олондо мэдээсэл тараадаг хэрэгсэлнүүдэй түлөөлэгшэдhөө, уран зураг буулгагшадhаа, соёлой эрхилэгшэдhээ бүридэhэн шүүлгын бүлэг энэ мүрысөөе сэгнэхэ.
Түлэб
«Буряад хубсаһан: Ёһо заншалнууд ба мүнөөнэй үе саг» гэһэн хубсаhа зохёогшодой мүрысөөн
Уг зорилгонууд:
• Буряад зоной заншалта хубсаһа урлаха, эсхэхэ ба оёхо арга шадабарида угсаатанайнгаа онсо өөрсэ ёһо заншалнуудые сахилга ба хүгжөөлгэ, ургажа ябаа үетэн болон залуушуулые арадай соёлой хэдэн зуугаад жэлнүүдhээ нааша ерэhэн заншалнууд дээрэ үндэhэлэн хүмүүжүүлгэ;
• Буряад зоной хубсаһанда хабаатай, зохихо элдэб хэрэгсэлнүүдые, шэмэглэлэй зүйлнүүдые оруулалсан, хубсаhанай түхэлэй мүнөөнэй эрилтээр хубсаһанай эрхим һайн түхэл маягуудые байгуулга;
• Нютаг нютагай буряад угсаата зоной жэлэй дүрбэн сагта үмдэхэ хубсаһанай маяг түхэлые, онсо илгаа шэнжэнүүдые үргэнөөр харуулалга;
• Хубсаһа урлаха, эсхэхэ ба оёхо талаар уран бэлигтэй шэнэ зохёогшодые болон шадамар бэрхэ оёдолшодые элирүүлгэ.
Мүрысөө үнгэргэлгын гуримууд:
Мэргэжэлтэ хубсаhа зохёогшод, хубсаhа зохёон байгуулдаг байшангууд, зохёохы бүлэгүүд, урлалай дээдэ гартан мүрысөөндэ хабаадаха.
Мүрысөөндэ хоёр заабаряар нэрлэгдэhэн хубсаhан дурадхагдаха гэбэл – заншалта буряад хубсаhан, тиихэдэ арадай заншалта болон мүнөө үеын гар урлалай зүйлнүүдээр гоёон шэмэглэгдэhэн мүнөөнэй буряад хубсаhан.
Мүрысөө үнгэргэлгын гол дүримүүд:
Иимэ заабаринуудаар нэрлэгдэhэн мүнөө үеын буряад хубсаhан мүрысөөндэ табигдаха гэбэл:
• Заншалта хубсаhан
• Мүнөө үе сагта тааруулhан хубсаhан
• «Магнай» маягай хубсаhан
Хубсаhа зохёодог «арадай байшангууд» заншалта хубсаhа харуулха. Харин мүнөө үе сагта тааруулhан болон «Магнай» маягай хубсаhа мэргэжэлтэ хубсаhа зохёогшодые, хубсаhа зохёон байгуулдаг байшангуудые, урлалай дээдэ гартаниие хабаадуулхыетнай дурадханабди.
Тусхай шагналнууд байгуулагданхай:
• Эгээл илгаржа тодорhон дүрэ байгуулhанай;
• Эгээл өөрсэ түхэл байгуулhанай.
Мүрысөөнэй шүүлгын бүлэг:
Мүрысөөндэ табигдаhан хүдэлмэринүүдые хубсаhанай түхэл байгуулгын хүдэлөөнэй түлөөлэгшэд, хубсаhанай үнгэрhэн үе саг шэнжэлэгшэд, соёл, урлал шэнжэлэгшэд, хубсаhанай түхэл зохёогшод, тусхай айлшад сэгнэхэ. Шүүлгын бүлэгтэ можо нютагуудhаа нэгэ нэгэ түлөөлэгшэд орохо. Угтажа абаhан тала өөрынгөө түлөөлэгшые шүүлгын бүлэгэй түрүүлэгшэ болгожо томилхо эрхэтэй. Энээнтэй зэргэ Сэгнэлгын зүблэл хүдэлжэ байха. Арсалдаата асуудалнуудай гараа болобол, Сэгнэлгын зүблэл шиидхэхэ эрхэтэй. Шүүлгын бүлэг хубсаhа тусхай ендэр дээрэ хаража, сэгнэлгын дансада оруулжа сэгнэхэ. Сэгнэлгын данса шүүлгын бүлэгэй гэшүүн бүхэнэй гар табилгаар хаагдаха. Мүрысөөнэй дүнгүүдээр Дээдэ шагнал, Илагшын I, II, III шатануудай Yнэмшэлгэнүүд байгуулагдаа.
Сэгнэлгын эрилтэнүүд:
• Хубсаhанай түхэлэй мүнөө үеын дэлхэйн эрилтэнүүдые үндэhэн хубсаhанда шадамараар тааруулалга;
• Хубсаhан оёгдоходоо сэбэрээр бүтэhэн байха ёhотой;
• Үнгэнүүдынь зохидоор таараhан байха;
• Зохид дүрэ байгуулхын түлөө хубсаhанай хэрэгсэлнүүд, малгай, гутал зохидоор тааралдаха ёhотой;
• Мүрысөөндэ табигдаhан хүдэлмэринүүд 10 балл хүрэтэр сэгнэгдэхэ.
Буряад заншалта һэеы гэрые харалга- мүрысөөн
Гол зорилгонууд:
Буряад заншалта һэеы (түхэреэлжэ баригдаhан 6, 8 ханатай модон) гэрэй элдэб зүйлнүүдые үргэнөөр харуулалга;
Буряад заншалта һэеы гэрые нэбтэрүүлгэ ба идхалга;
Буряад һэеы гэр бүтээлгэдэ гар урлалай заншалта элдэб зүйлнүүдые һэргээхэ ба сахиха социальна шэнжэтэй асуудалнуудта олониитын, мэргэжэлтэдэй, гүрэнэй засагай зургаанай түлөөлэгшэдэй анхарал хандуулга;
Буряад һэеы гэр бүтээхэ талаар шэнэ дархашуулые элирүүлгэ.
Юрэнхы гуримууд:
Түлөөлгэ бүхэн нэгэ гэр мүрысөөндэ табижа харуулха. Буряад арадай соёлой бүхы ёһо гуримуудта харюусаһан талаараа, уран һайханаар бүтээгдэһээрээ, онсо өөрсэ шэнжэтэй байһаараа мүрысөөндэ табигдажа харуулагдаһан гэр шалгарха ёһотой.
Мүрысөөндэ харуулагдаха гэрнүүд тамирай талмай дээрэ баригдаха.
Буряад заншалта hэеы гэрэй мүрысөөн эдэ зүйлнүүдээр туршагдан шалгагдаха:
Һэеы гэрэй эзэн болон эзэн эхэнэр хоёрой айлшадые угталгын ёһо гурим. Айлшадые угталгын энэ ёһо гуримай үедэ ондоо хүнүүд байха ёһогүй;
Буряад һэеы гэр тухай хөөрэлгэ;
Буряад эдеэ хоол.
Харалга-мүрысөөнэй дүнгүүдээр эрхим һэеы гэр Илагшын Yнэмшэлгөөр шагнагдаха, мүн тусхай шангууд тогтоогдохо.
Түлэб
«Алтан саг»
сурбалжалагшадай хүдэлмэринүүдэй мүрысөөн
1. Юрэнхы дүримүүд:
1.1. Олондо мэдээсэл тараадаг хэрэгсэлнүүд болон сурбалжалагшадай дунда
«Алтан саг» гэhэн Уласхоорондын мүрысөөн (саашадаа – мүрысөөн) «Алтаргана-2016» гэhэн Уласхоорондын Ехэ нааданай Эмхидхэлэй хорооноор үнгэргэгдэнэ.
1.2. Буряад Уласай Толгойлогшын болон Буряад Уласай Засаг Газарай Мэдээсэлэй-шэнжэлгын хороон мүрысөө үнгэргэлгэдэ харюусалгатай байха.
2. Мүрысөөнэй уг зорилгонууд:
2.1. Буряад арадай хэлэ, соёл, заншал гуримуудые сахин хамгаалха орёо бэрхэтэй асуудалнуудта анхарал хандуулга, олондо мэдээсэл тараадаг хэрэгсэлнүүдэй түлөөлэгшэдэй болон сурбалжалагшадай хабаадалгые хүгжөөлгэ.
2.2. «Алтаргана-2016» гэhэн Бүгэдэ Буряадай Уласхоорондын Ехэ наадан тухай ниитын мэдэсэ дээшэлүүлгэ.
3. Мүрысөөндэ хабаадагшад:
Һонинууд болон бусад хэблэлнүүдэй нюурнууд дээрэ
«Алтаргана-2016» гэhэн Бүгэдэ Буряадай Уласхоорондын Ехэ наадан тухай, буряад арадай соёл, заншал гуримууд, үндэhэн соёлой түбүүдэй ажал хүдэлмэринүүд, олон ондоо шажан мүргэлнүүдэй болон яhатан хоорондын харилсаанууд тухай буряад хэлэн дээрэ сурбалжалагшадай толилуулhан хүдэлмэринүүд мүрысөөндэ хаабадахаар абтаха (зарим нэрлэгдэhэн заабаринуудhаа бусад).
4. Мүрысөө үнгэргэхэ арганууд:
Сурбалжалагшадай хүдэлмэринүүд олондо мэдээсэл тараадаг хэрэгсэлнүүдэй
нюурнууд дээрэ 2014 оной июлиин 1-hээ 2016 оно майн 1 болотор хугасаа соо толилогдоhон байха ёhотой. Олондо мэдээсэл тараадаг хэрэгсэлнүүдэй сурбалжалагшад, үндэhэн соёлой түбүүдэй түлөөлэгшэд болон Оросой Холбооной Уласай, Монгол Уласай, Хитадай Арадай Республикын, бусад гүрэнүүд болон орон нютагуудай дулдыданги бэшэ сурбалжалагшад хүдэлмэринүүдээ мүрысөөндэ табиха эрхэтэй. Нэгэ сурбалжалагша мүрысөөндэ 1-hээ, (2-hоо?,
3-hаа?) дээшэ бэшэ хүдэлмэри дурадхажа болохо.
5. Мүрысөөнэй нэрлэгдэhэн заабаринууд:
= буряад хэлэн дээрэ эрхим хүдэлмэри;
= эрхим баримтата фильм;
= сэнхир дэлгэс дээрэ эрхим дамжуулга (сагай хэмжүүр – 20 минуутаhаа дээшэ бэшэ);
= сэнхир дэлгэс дээрэ эрхим мэдээсэл (сагай хэмжүүр – 3 минуутаhаа дээшэ бэшэ);
= эрхим уранhайханай фильм;
= агаарай длгиндо эрхим мэдээсэл (сагай хэмжүүр – 2,5 минуутаhаа дээшэ бэшэ);
= агаарай долгиндо эрхим дамжуулга (сагай хэмжүүр – 15 минуутаhаа дээшэ бэшэ);
= хэблэлдэ гараhан эрхим хүдэлмэри;
= олондо мэдээсэл тараадаг сахим хэрэгсэлнүүдэй эрхим хүдэлмэри: юртэмсын бусайдаhан соохи буудалда, хубиин буудалда;
= 2014-2016 онуудай туршада хэблэгдэhэн эрхим ном.
«Эрхим уран hайханай фильм» болон «Хэблэлдэ гараhан эрхим хүдэлмэри» гэhэн нэрлэгдэhэн заабаринуудта хүдэлмэринүүд буряад хэлэн дээрэ, тиихэдэ буряад хэлэн дээрэ кирилл үзэгөөр оршуулагдаhан бусад хэлэнүүд дээрэ абтаха.
6. Хүдэлмэринүүдые сэгнэлтын эрилтэнүүд:
= удхыень гүнзэгы ба үнэн талаhаа харуулалга;
= удхыень харуулха зохёохы шадабари;
= хүдэлмэриин ниитэ удха шанар;
= хэблэлэй талаhаа эрхим хангалга (2014-2016 онуудай туршада хэблэгдэhэн эрхим ном гэhэн нэрлэгдэhэн заабарида);
= хүдэлмэриин удха (2014-2016 онуудай туршада хэблэгдэhэн эрхим ном).
7. Мүрысөөнэй дүн гаргалга:
Мүрысөөндэ табигдаhан хүдэлмэринүүдые олоной хүндэдэ хүртэhэн
мэргэжэлтэ сэтгүүлшэдhээ, уран зохёолшодhоо, уран зохёол шэнжэлэгшэдhээ, тиихэдэ можо нютагуудай нэгэ нэгэ түлөөлэгшэhөө бүридэhэн шүүлгын бүлэг сэгнэхэ.
Шүүлгын бүлэгтэ 7 хүнhээ үсөөн бэшэ гэшүүд байха, тэдэнэй 3-ниинь (түрүүлэгшэтэеэ) угтажа абагша ороной гэшүүд гэхэ гү, али Буряад Уласай түлөөлэгшэд байха.
Шүүлгын бүлэгэй гэшүүд ороhон хүдэлмэринүүдые 10 балл хүрэтэр сэгнэхэ. Эрхим хүдэлмэринүүд шүүлгын бүлэгэй гэшүүдэй хамтын баллаар шэлэгдэхэ.
Мүрысөө үнгэргэхэ саг болзор:
1. 2016 оной майн 1 болотор мүрысөөндэ табигдаха хүдэлмэринүүдые абаха;
2. 2016 оной июль hарада мүрысөөнэй дүнгүүд гаргагдаха.
Мүрысөөндэ илажа тодорогшодто Yнэмшэлгэнүүд, үнэтэ бэлэгүүд барюулагдаха.
Хүдэлмэринүүдээ мүрысөөндэ тушааха янза:
1. Хүдэлмэри бэшээшын обог, нэрэ, эсэгын нэрэ;
2. Хүдэлмэриин нэрэ;
3. Хүдэлмэриин тобшо тайлбари (5 мэдүүлэлhээ дээшэ бэшэ)
4. Хаана, ямар хэблэл бэ гэhэн заабари:
= hониндо хэблэгдэhэн хүдэлмэринүүд – hониной нэрэ, ямар гаршаг доро
хэблэгдээб (гаршаг доро hаань), хэблэгдэhэн он, hара, үдэр;
= сэнхир дэлгэсэй хүдэлмэринүүд – нэрыень тусхай зааhан эмхи зургаанайнгаа тамгатай, дамжуулгын нэрэтэй, дэлгэстэ гараhан он, hара, үдэр харуулhан баримта бэшэг. Түхэлынь: avi, dvd.
= Агаарай долгиндо гараhан хүдэлмэринүүд – нэрыень тусхай зааhан эмхи зургаанайнгаа тамгатай, дамжуулгын нэрэтэй, агаарай долгиндо гараhан он, hара, үдэр харуулhан баримта бэшэг.
= олондо мэдээсэл тараадаг сахим хэрэгсэлнүүдэй хүдэлмэринүүд – юртэмсын бусайдаhан соохи буудалай нэрэ, гаршагай нэрэ, толилогдоhон он, hара, үдэр.
5. Мүрысөөндэ заагдаhан хүдэлмэринүүд хуулбаригүйгөөр, үгышье hаа, гар, тамгаар тусхай баримталагдаhан хуулбаринь байха ёhотой, тиихэдээ нэрлэгдэhэн заабаринь заатагүй харуулагдаhан байха.
Мүрысөөнэй үнгэрхэ газар, саг болзор:
Буряад Улас, Улаан-Yдэ хото.
1-дэхи хабсаргалта.
«Алтан саг-2016» гэhэн сурбалжалагшадай хүдэлмэринүүдэй мүрысөөндэ хабаадаха тухай мэдүүлгэ:
1. Хабаадагшын орон түрэ/ Оросой Холбооной Уласай можо, хизаар _________________________________________________
2. Обог, нэрэ, эсэгын нэрэ
3. Мүрысөөндэ табигдаха хүдэлмэриин нэрэ
4. Хүдэлмэриин тобшо тайлбари (5 мэдүүлэлhээ дээшэ бэшэ)
5. Хүдэлмэриин сагай ба талмайн хэмжүүр
6. Хаана, ямар хэблэл бэ гэhэн заабари
7. Хабаадагшын гарын мотор. Гарын утас, сахим хаяг
Түлэб
Буряад ирагуу найруулгаар уласай хэмжээнэй мүрысөөнэй дүрим
Буряад ирагуу найруулгаар мүрысөөн Бүгэдэ Буряадай «Алтаргана-2016» гэhэн Уласхоорондын Ехэ нааданай туг доро үнгэрнэ.
1. Юрэнхы дүримүүд:
o Энэ мүрысөөн буряад хэлэн дээрэ бэшэдэг бэлигтэй залуу уран шүлэгшэдые элирүүлхэ, эрхим зохёолнуудыень хэблэхэ, зохёохы ургалтыень, тиихэдэ мэдээжэ болохо ябадалыень дэмжэхэ зорилготой үнгэргэгдэнэ.
o Мүрысөө эмхидхэн үнгэргэгшэд гэхэдэ Буряад Уласай үндэhэтэнэй номой hан, Буряадай Уран зохёолшодой холбоон.
o Мүрысөөн Буряад Уласай Засаг Газарай, мүн Буряад Уласай Соёлой яаманай дэмжэлгээр үнгэрнэ.
o Мүрысөөн олоной нюдэн дээрэ олоной хабаадалгатай байха. Уридшалан шэлэн абалга эндэ үгтэhэн Дүримэй эрилтээр үнгэрхэ.
o Мүрысөө үнгэргэхэ саг болзор: ________________________________
o Мүрысөөнэй эмхидхэлэй хүдэлмэри ябуулхын, мүрысөө үнгэргэхын тула мүрысөөнэй эмхидхэлэй хороон, тэрэнэй түрүүлэгшэ томилогдохо.
o Мүрысөөндэ хабаадагшадай хүдэлмэринүүд шүүлгын бүлэгөөр сэгнэгдэхэ. Шүүлгын бүлэг эмхидхэлэй хорооной дурадхалаар байгуулагдаха.
o Мүрысөө үнгэргэлгын Дүримүүд тухай мэдээсэл юртэмсын бусайдаhан соо Буряад Уласай Соёлой яаманай болон Буряад Уласай үндэhэтэнэй номой hангай буудалнууд дээрэ табигдажа, уласай болон аймагуудай хэблэлдэ толилогдохо.
2. Мүрысөөнэй шатануудай үнгэрхэ болзорнууд:
o Мүрысөөндэ орохо тухай мэдүүлгэнүүдые абалга:
_________________________
o Уридшалан шэлэн абалга: ______________________
o Мүрысөөнэй дүн, сэгнэлтэ: _____________________
o Соносхолнууд, илагшадта шагналнуудые гардуулга:
3. Мүрысөөнэй нэрлэгдэhэн заабари:
Эрхим шүлэглэмэл зохёол (томо хэмжээнэй зохёол, магтаал, соло г. м.)
4. Мүрысөөндэ хабаадагшадта эрилтэнүүд:
o Буряад хэлэн дээрэ бэшэдэг, уридшалан шэлэн абалгын шата дабажа гараhан Буряадай уран шүлэгшэд мүрысөөндэ хабаадуулагдаха.
o Мүрысөөндэ дурадхагдаhан зохёолнууд 2013 онhоо хойшо бэшэгдэhэн байха ёhотой.
o Шүлэгшэн зохёолоо өөрөө уншаха ёhотой.
o Уридшалан шэлэн абалгада тус Дүримөөр тогтоогдоhон гуримай ёhоор мэдүүлгэ баригшад хабаадуулагдаха.
o Мүрысөөндэ хабаадахын түлөө мэдүүлгэ баригша бүхэн мүрысөөнэй эмхидхэлэй хороондо өөр тухайгаа дэлгэрэнгы мэдээсэл оруулха ёhотой: холбоо тогтоохо утасын дугаар, сахим хаяг, ажаhуудалай хаяг, нэрэ, обог (өөрын дураар далда нэрэеэ), наhанай хэмжүүр, ажалладаг (hурадаг) газар, богонихоноор намтараа.
5. Мүрысөөндэ хабаадаха тухай мэдүүлгэ оруулха гурим:
o Мэдүүлгэнүүд (Хэды оной ямар hарын хэдынhээ) абтаха.
o Мэдүүлгэнүүд konburpoez16@mail.ru гэhэн эмхидхэлэй хорооной сахим хаягаар, тиихэдэ 670000, Улаан-Yдэ хото, Ербановай гудамжа, 4, Буряад Уласай үндэhэтэнэй номой hан, шэнэ онол арагнууд дээрэ үндэhэлэн хүгжэлтын болон ниитэ олонтой холбоо байгуулха таhагта хэблэлдэ гараhан дүримүүдэй ёhоор.
o Зохёогшо бүхэн нэгэнhээ дээшэ бэшэ мэдүүлгэ оруулха эрхэтэй.
6. Зохёолнуудые уридшалан шэлэн абалгын гуримууд:
o Мүрысөөндэ хабаадагшадай зохёолнуудые уридшалан шэлэн абалгые, дулдыданги бэшэ сэгнэгшэдэй сэгнэлтэнүүдые хараада абан, эмхидхэдэй хороон үнгэргэнэ.
o Уридшалан сэгнэлтэ үгэхын тула 3 дулдыданги бэшэ сэгнэгшэhээ бүридэhэн амяараа бүлэг байгуулагдаха.
o Дулдыданги бэшэ сэгнэгшэдые эмхидхэлэй хорооной шэлэн абаhан хүнүүдэй дундаhаа байгуулха.
o Сэгнэгшэ бүхэн тэрээндэ үгтэhэн зохёолые 0-hээ 4 хүрэтэр баллаар уридщалан сэгнэхэ.
o Уридшалан сэгнэлтэдэ зохёолнууд нюусаар (зохёолшын нэрэ обоггүйгөөр) үгтэхэ.
o Эмхидхэлэй хорооной уридшалан шэлэн абалгада хамтын дүн хараада абтаха.
7. Мүрысөө үнгэргэхэ гурим:
o Мүрысөөнэй эсэстэ зохёолнуудые шүүлгын бүлэгэй 5 гэшүүдээр сэгнэлтэ үгтэхэ.
o Зохёолнууд 0-hээ 10 хүрэтэр баллаар сэгнэгдэхэ.
o Мүрысөөндэ шагнаха саг болзорые мүрысөөнэй эмхидхэлшэ нэрлэхэ.
o Илагшадые тодоруулхын тула эмхидхэлэй хороон мүрысөөнэй сэгнэлтын хамтадхаhан дүн хараадаа абаха.
8. Илагшадта шагналнуудые гардуулга
o Мүрысөөндэ илагшадые мүрысөөнэй дүүрэhэн хойно баярай оршондо соносхохо, тэдээндэ шагналнуудые гардуулха.
o Мүрысөө үнгэргэлгэ болон шагналнуудые гардуулгын баярай hара, үдэр, саг, үнгэргэлгын газар мүрысөөндэ хабаадагшадта Буряад Уласай үндэhэтэнэй номой hангай тусхай буудал соо болон холбоо тогтоохо утаснуудаар уридшалан дуулгагдаха.
o Уридшалан шэлэн абалгые дабажа ороhон бүхы хабаадагшадта үнэмшэлгэнүүд, дурасхаалай бэлэгүүд барюулагдаха.
Мүрысөөндэ I, II, III hууринуудые эзлhэн илагшадта барюулагдаха гэбэл: I hууриин түлөө – Бүгэдэ Буряадай «Алтаргана-2016» гэhэн Уласхоорондын Ехэ нааданда хабаадаха эрхэ, II, III hууринуудай түлөө үнэтэ бэлэгүүд байха.
Түлэб
Гэрэл зураг буулгагшадай «Алтаргана» гэжэ
уласхоорондын харалга-мүрысөөнэй дүрим
«Алтаргана» гэжэ харалга-мүрысөөн Бүгэдэ Буряадай «Алтаргана-2016» гэhэн Уласхоорондын Ехэ нааданай хүреэлэн соо үнгэрхэ.
Харалга-мүрысөөнэй уг зорилгонууд
= ОХУ-гай, Хитадай, Монголой гэрэл зураг буулгагшадай хүдэлмэринүүдтэй танилсалга
= Түрэл байгаалиингаа, арадайнгаа түүхын барагдашагүй баялигуудые, ёhо заншалнуудаа, буряад арадай олон шэглэлтэй хүгжэлтые үргэнөөр харуулалга
= Гэрэл зураг буулгалгада өөрсэ, онсо бэлигтэниие элирүүлгэ
Хабаадагшад
Харалга-мүрысөөндэ мэргэжэлтэ гэрэл зураг буулгагшад, тиихэдэ өөрын шадалаар энэ мэргэжэлдэ орожо ябаhашуул уригдана.
Юрэнхы дүримүүд ба мүрысөө үнгэргэхэ гурим
Орос Холбооной Уласай Байгал тойронхи можо нютагууд, Буряад Уласай аймаг, нютагууд, тиихэдэ хабаадагша (Орос, Хитад, Монгол) оронууд арбан хүдэлмэриhөө нэгые гү, али хэдэн нэгэ гү, али хэдэн буулгагшадай хүдэлмэринүүдые табижа болохо. (тэдэнь үнгэтэ гү, али хара-сагаан байжа болохо). Элдэб аргаар заhабаринуудые оруулhан хүдэлмэринүүд мүрысөөндэ абтахагүй.
Зурагууд иимэ хэмжүүртэй байха: 30х40, үгышье hаа 40х60, 300 dpi-hээ доошо бэшэ шадалтай.
Хүдэлмэринүүд шэллэгдэhэн жааз хүреэтэй байха ёhотой.
Сэгнэлтын эрилтэнүүд
= удхынь ойлгосо
= ниитэ удха шанар
= өөрсэ тала, үндэhэтэнэй шарай
Мүрысөөнэй дүн гаргалгын гуримууд
Мүрысөөндэ табигдаhан хүдэлмэринүүдые урлал шэнжэлэгшэдэй, мэргэжэлтэ гэрэл зураг буулгагшадай, соёлой болон урлалай ажал ябуулагшадай хабаадалгатай шүүлгын бүлэг сэгнэхэ.
Эндэ тусагаар шэлэгдэhэн гэрэл зураг буулгагшад Эмхидхэлэй хорооной үнэмшэлгэнүүд болон үнэтэ бэлэгүүдээр урмашуулагдаха.
Эрхим хүдэлмэринүүд Бүгэдэ Буряадай «Алтаргана-2016» гэhэн Уласхоорондын Ехэ нааданда хабаадахаар зууршалагдаха.
Хүдэлмэринүүдээ тэмдэглэхэдээ Обог, нэрэ, эсэгын нэрэ, хүдэлмэриин нэрэ, хэды ондо байгуулагдаhан бэ гэжэ харуулха.
Түлэб
«Алтаргана-2016» гэhэн оршон үеын буряад дуунуудые гүйсэдхэгшэдэй Уласхоорондын мүрысөөнэй дүрим
1. Мүрысөөнэй уг зорилгонууд:
Бага тайзанай үндэhэн дуунуудые Ородой Холбооной болон Буряад Уласай дэбисхэр дээрэ ажаhуудаг арадуудай дунда дэлгэрүүлгэ;
Холын болон дүтын хари оронуудтай соёлой талаар харилсаагаа үргэдхэлгэ болон бэхижүүлгэ;
Зохёохы дүршэлөө халан абалсалга, хабаадагшадай мэргэжэлые дээшэлүүлгэ болон тэдэниие зохёохы шэнэ түлэбүүдые байгуулгада урмашуулга;
Шэнээр бии боложо байhан бага тайзанай үндэhэн дуунуудые гүйсэдхэгшэд болон бүлгэмүүдые дэмжэлгэ.
2. Мүрысөө үнгэргэхэ газар ба болзор:
2.1. Наадан-мүрысөө үнгэргэхэ болзор: 2016 оной ______
2.2. Наадан-мүрысөө үнгэргэхэ газар: Улаан-Yдэ хотын Бэеын соёлой ба тамирай байшан.
3. Хабаадаха арга нүхэсэлнүүд:
3.1. Наадан-мүрысөөндэ Оросой Холбооной можо нютагуудай болон холын ба дүтын хари оронуудай бага тайзанай үндэhэн дуунуудые дуулагшад хабаадажа болохо.
3.2. Наадан-мүрысөөндэ хабаадагшадай наhанай илгаа:
= 12-hоо 18 хүрэтэр наhанай
= 19-hөө 35 хүрэтэр наhанай
= 36 наhанhаа дээшэ
3.3. Нэрлэгдэhэн иимэ гаршагуудаар мүрысөөн үнгэргэгдэхэ:
= Нэрлэгдэhэн гаршаг: Бага тайзанай үндэhэн буряад дуу мэргэжэлтэ гүйсэдхэлгэ;
= Нэрлэгдэhэн гаршаг: Бага тайзанай үндэhэн буряад дуу өөрын арга шадалаар гүйсэдхэлгэ;
= Нэрлэгдэhэн гаршаг: Бага тайзанай үндэhэн буряад дуу мэргэжэлтэ хүгжэм зохёогшод болон дуунай үгэнүүдые бэшэгшэдэй зохёолго (наhанай илгаа үгы);
= Нэрлэгдэhэн гаршаг: Бага тайзанай үндэhэн буряад дуу өөрын арга шадалаар бэшэдэг хүгжэм зохёогшод болон дуунай үгэнүүдые бэшэгшэдэй зохёолго (наhанай илгаа үгы).
3.4. Бага тайзанай үндэhэн буряад дуу зохёолго гэhэн нэрлэгдэhэн гаршагта hүүлэй хоёр жэлнүүдэй туршада бэшэгдэhэн зохёолнууд байха ёhотой.
3.5. Наадан-мүрысөөндэ хабаадагша маяг болон удхаараа хоёр ондоо дуунуудые тушааха ёhотой.
3.6. Дуу гүйсэдхэгшэ болон хүгжэм зохёогшо дуунуудайнгаа аялга болон үгэнүүдэй бэшэлгэнүүдые Finale, Sibelius дээрэ бэшэгдэhэн маягаар тушааха ёhотой.
3.7. Наадан-мүрысөөндэ хабаадагша эндэ дурадхаhан дуунуудаа гүйсэдхэхэ эрхэтэй байhанаа найдуулха ёhотой. Зохёолшодой эрхэнүүдые сахидаг эмхи зургаануудтай гаража боломоор харилсаануудаа өөр дээрээ даажа абаха ёhотой.
3.8. Бүхы хабаадагшад тоглооной хубсаhаар өөрөө байжа гүйсэдхэхэ.
3.9. Наадан-мүрысөөндэ хабаадхын түлөө 2016 оной зургаан hарын 1 болотор иимэ хаягаар мэдүүлгэ оруулха ёhотой (нэгэдэхи хабсаргалта): Буряад Улас, Улаан-Yдэ хото, Илалтын үргэн сүлөө, 17, хотын утаhан: 8 (3012) 20 44 92; гар утаhан: 8 (9021) 61 02 77; 8 (9834) 200-440, сахим хаяг: 03-kol@ mail.ru
3.10. Дуушанай гү, али дууша бүлгэмэй наадан-мүрысөөндэ хабаадаха тухай эсэслэн шиидхэбэри Эмхидхэлэй хороон 2016 оной _______ хойн бэшэ абаха.
3.11. Шэлэн абалгын шата дабажа гараhан хабаадагшад мүрысөөнэй бүхы хэмжээ ябуулгануудта заатагүй хабаадаха ёhотой.
4. Мүрысөө үнгэргэлгын гуримууд:
4.1. Наадан-мүрысөө үнгэргэлгэ хоёр шатаhаа бүридэнэ:
* 1 шата Буряадай аймаг нютагуудай хабаадагшадта шэлэн абалгын шата байха, 2016 оной ________ УлаанүYдэ хотын П. И. Чайковскийн нэрэмжэтэ урлалай дунда мэргэжэлэй hургуулида үнгэрхэ. Мэдүүлгэ, нюур зааhан дансынгаа хуулбариие, уран hайханай маягаар буулгагдаhан гэрэл зурагаа, зохёохы намтараа, гүйсэдхэхэ дуунуудайнгаа сахим дэбтэр оруулhан хүнүүд энэ шатада хабаадаха эрхэдэ хүртэхэ;
* 2 шата мүрысэгшын өөрын хабаадалгатай Улаан-Yдэ хотодо үнгэрхэ: түгэсхэлэй шата – 2016 оной __________ Улаан-Yдэ хотын Бэеын соёлой ба тамирай байшанда үнгэрхэ.
5. Наадан-мүрысөөнэй шүүлгын бүлэг:
5.1. Наадан-мүрысөөнэй шүүлгын бүлэг бага тайзанай мэдээжэ түлөөлэгшэдhөө, Буряад Уласай, бусад можо нютагуудай, холын, дүтын хари оронуудай урлалай мэдээжэ ажал ябуулагшадай дундаhаа Эмхидхэлэй хорооноор байгуулагдаха.
5.2. Наадан-мүрысөө сэгнэлтын эрилтэнүүд:
* гүйсэдхэлгын шадабари;
* гүйсэдхэhэн зохёолойнь өөрсэ болон үндэhэн шэнжэ;
* тайзан дээрэ бэеэ харуулха шадабари, дүршэл.
5.3. Хүгжэм зохёогшодые сэгнэлтын эрилтэнүүд:
* үндэhэн хүгжэмэй баяниие харуулhан, түхэл маягаараа, доторойнгоо аялгаар илгарhан байлга;
* удхатай байлга,тэрээндээ тааралдал;
* дуунай үгэнүүдэй баяниие харуулhан.
5.4. Шүүлгын бүлэг хабаадагшын гүйсэдхэлгые өөрынгөө хаамал зүблөөн дээрэ юрын дуугаа үгэлгын гуримаар сэгнэхэ, энэнь данса бэшэгдэжэ баталагдаха.
5.5. Шүүлгын бүлэгэй шиидхэбэри шэнжэлэл болон шүүмжэлэлдэ оруулагдахагүй.
Эмхидхэлэй хороон
