Буряад Уласай Толгойлогшын орлогшо В. Э. Матханов баярай үгэнүүдые хэлээд, Буряад Уласай Толгойлогшо В. В. Наговицынай амаршалгын үгэнүүдые айлшадтаа дамжуулба. Буряадай Арадай Хурал амаршалаа, тиихэдэ республикымнай зохёохы ажалтан, уран hайханай бүлгэмүүд барандаа сугларжа, ойро зуурын наада дэлгэжэ, айлшадаа амаршалаа. Удаань айлшад Буряадай дуун болон хатарай үндэhэн «Байгал» театрай «Баруужан Түхэм дайдын сууряан» гэhэн зүжэгөө дууриин театрай тайзан дээрэhээ айлшадта дурадхаба.
Мүнөөдэр, зургаан hарын 19-дэ, сугларhан айлшад угайнгаа дайда нютаг руу – Баргажан шэглэжэ мордобод. Барганарай обоо дээрэ «Агууехэ элинсэгтээ hүгэдэлгэ» гэhэн ёhолол Лугшахаан тосхондо үнгэрхэ, Баргажанай дасан ошолго, Янжама бурханда мүргэл болохо.
Yдэшэлэн «Угтамжа». Ехэ нааданай айлшадые угтамжын зүжэглэмэл ёhолол Хурамхаанай аймагай Барханай аршаанай талмайда үнгэрхэ
Yглөөдэр, зургаан hарын 20-до, «Бархан тахилгын» мүргэл. Хурамхаан тосхондо «Угайм шэдитэ Баргуужан» гэhэн орон hуудалай ба соёлой ехэ наадан.
Саашадаа дуу гүсэдхэгшэдэй, аман зохёолой бүлгэмүүдэй, үльгэр түүрээгшэдэй мүрысөөнүүд, «Баргын хубсаhан» гэhэн үндэhэн хубсаhанай харалга, Хурамхаанай аймагай аяншалгын арга боломжонуудые мэдүүлэн харуулалга, уран зохёолшодтой уулзалга, номой харалга-наймаан, арадай уран бүтээлнүүдэй харалга, бэлэгэй зүйлнүүдэй дэлгүүр гээд лэ олон тоото харалга-мүрысөөнүүд, тиигээд лэ орой тээшээ барганарай заншалта нааданууд харуулагдаха.
Монголой, Хитадай Арадай Республикын Дотор-Монголой барга хушуунуудай зохёохы бүлгэмүүдэй тоглоон хүлеэгдэнэ.
Тиигэжэ барганарай орон hуудалай ба соёлой Уласхоорондын III ехэ наадые баярай оршондо хаалгын хэмжээ ябуулганууд үнгэрхэ.
Зохёохы мүрысөөнүүд ба барганарай заншалта наадануудта илажа гарагшадта шагналнудые барюулалга болоод, Буряад Уласай уран бэлигтэнэй хабаадалгатай баярай тоглоон болохоор хараалагданхай.
Хурамхаанай аймагта арадай хатар гүйсэдхэгшэдэй «Ёохорой hүни» гэhэн уласай хэмжээнэй ехэ наадан, тиигээд лэ баярай ёhолол – үнгэтэ галнуудаар буудалгаар энэ ехэ удха шанартай ээлжээтэ уулзалгынгаа болотор баяр юрөөлнүүдээ хэлсэжэ тараха юм бэшэ аал даа.
