Хоёр үдэрэй туршада үдэрэй 16.00 сагһаа һүниин 24.00 саг болотор үнгэрхэ энэ нааданда хаа хаанаһаа холын айлшад бууха гээд мэдүүлэеэ. Тэдэнэй тоодо Усть-Ордын, Агын тойрогуудай мэдээжэ "Амар сайн", "Талын аялга" гэһэн дуу, хатарай шуулганууд. "Сэнгүүхэн дайдадаа" гэһэн тоглолто, буряад арадай дуунууд, нааданууд, эдеэ хоол, хубсаһан, олон-олон ондоо элдэб шэглэлтэй сэнгүү зугаатай үйлэ хэрэгүүд үнгэрхэ. Тэдэнэй тоодо ёохордожо шадахагүй зон тусхай багшанарһаа хэшээл абаха арга байха гээд тэмдэглэе.
Мүнөө танай анхаралда суута Лодон багшын буряадуудай тэргэ, түүдэг тойрожо наададаг тухай мэдээсэл:
Зунай сагта һаань тэргэ, үбэл һаань, ехэ түүдэг тойрожо наадагша бэлэй. Хооһон тэргые гэрһээ тээ холошог абаашаад, үбэл һаань, түлеэ обоолжо түүдэг табяад, хэды хэдыгээрээ зэргэлжэ, тэбэрилдэн зэлэ татаад, нэгэ зэлэнь нүгөөдынгөө хойноһоо һубарилдан ябажа, бултаараа дуулалдадаг байгаа. Тиимэ дуун гэхэ юумэгүй, һанаандаа ороһон лэ дуунуудаа дууладаг һэн. Нэгэ үень нэгэ дуу, нүгөөдэнь тад ондоое дуулажа ябаха. Тиигэжэ ябатараа, бултааран ээрэмшээжэ ябажа дуулалдаха. Ээрэмшээхэ гээшэнь иимэ: нэгэ хүлөө үргөөд, нүгөө хүл дээрээ һүрэхэ. Нэгэ ёһондоо энэ наадан хатаршуу байгаа юм.
Ябажашье, ээрэмшээжэшье эсэхэдээ, нэгэ тээ байгаад гү, али һуугаад дуулалдадаг һэн. Ехэшье һонин наадан бэшэ аад, хүнүүд яһалал сэдьхэлээ ханадаг бэлэй.
