Доржо Норбосампилович драмын театрай талаар мэргэжэлтэн гэжэ мэдэнэбди. Өөрөө бэлигтэй зүжэгшэн байхаһаа гадуур, арба гаран жэлдэ Буряад драмын театрые эрхимээр хүтэлбэрилэжэ, үндэр шатада гаргаһан габьяатай юм. Тэрээнһээ гадуур, уран зохеолтой тон нарин холбоотой ажалладаг. Тэрэнэй хүүгэдтэ зорюулжа бэшэһэн “Гуталгүй гулабхаа”, “Амиды зула” гэжэ номуудынь олоной анхарал татажа, үндэрөөр сэгнэгдээд һургуулиин үхибүүдэй үзэхэ номууд соо оруулагдаһан байдаг. Тэрээнһээ гадуур, “Эртын хабар”, “Амиды зула”, “Алтан бэһэлиг” гэһэн зүжэгүүд, уран зохеолшо Сэнгын Эрдэниин бэшэһэн “Хойто наһандаа уулзахабди” гэжэ роман мүн Жамьян Балданжабонай “Аригуун Бүүбэйн уршагта ябадалнууд” гэһэн туужа тайзанай хэлэндэ оруулжа, Буряад драмын театрай тайзан дээрэ найруулагдаһан намтартай юм. “Эртын хабар” гэжэ зүжэгынь Монгол ороной Дархан хотын театрай тайзан дээрэ амжалтатай найруулагдаад, харагшадай һонирхол татаһан байдаг. Энэ ном дотор оруулагдаһан “Энхэрэл” гэжэ рассказынь Монгол ороной “Монцамэ” гэжэ олондо мэдээжэ һониндо хэблэгдэһэн.
Доржо Норбосампилович зохеол бэшэхэһээ гадуур арба гаран пьесэнүүдые ород, монгол хэлэнһээ оршуулһан байдаг. Мүн, Сэнгын Эрдэниин “Сэрүүн дуганай мүхэл” гэжэ туужа монголһоо буряад хэлэндэ оршуулаад, “Байгал” сэтгүүлэй энэ оной хоердохи дугаарта хэблүүлбэ. Сэдэнэй Намсарайн бэшэһэн “Үхэжэ болодоггүй оршолон” гэжэ уран һайханай баримтата туужа оршуулагдаад, “Буряад үнэн” һониндо хэблэгдэжэ, уншагшадай һонирхол татана.
Доржо Сультимовай “Эхын захяа” гэжэ туужа дотор Эхэ хүнэй захяа заабари, нангин үүргэ, һургаали, үри хүүгэдээ зүб мүрөөр хүмүүжүүлгэ, инаг дуран болон атаа жүтөөн дээрэһээ боложол байдаг зүрилдөөтэ амидарал зураглагдана. Энэ зохеолой гол дүрэнүүд болохо Дондоб хүбүүн Бутид басаган хоерой хоорондохи ореохон харилсаан уншагшадай һонирхол татаха байха. Мүн энэ ном дотор Доржо Сультимовай бэшэһэн рассказуудтай, очеркнуудтай танилсаха аргатайт. 1970 гаран онуудта театрай дээдэ һургуулида нэгэ таһалга соо байжа сугтаа һураһан, удаань Буряад драмын театрта хүдэлһэн Россиин габьяата артист Содном Хажитов, Буряад улсын арадай артист Чимит Ринчинов нүхэд тухайгаа бэшэһэн дурсалганууд һонирхолтойгоор бэшэгдэнхэй.
Түрэлхи хэлэнэйнгээ хүгжэн һалбарха хэрэгтэ горитойхон хубитаяа оруулжа ябаһан Доржо Норбосампиловичые “Эхын захяа” гэжэ шэнэ номоорни хани халуунаар амаршалаад, саашадаашье зохеохы ажалай үндэр амжалтануудые туйлахыень хүсэнэбди!
Энэ ном Үндэһэтэнэй номой сангай киоск болон Полином гэжэ номой магазинһаа худалдажа абаха аргатайт.
