Тон тиимэ түб-түхэреэхэн дэгтэ дээрэ hангай ажахын hаали байрлаhан, байраhаань урагшаа, добо дорохононь, аршаан, бурьялан гаража горхолоод, холимог ойтой харанхы шэдхэ руу урдажа ошоно… Аршаанай ундалуулжа ургуулhан арьягар томо шэнэhэдэй hүүдэртэ хасууринууд, ойн бог гэгдэдэг хуhад юунhээ хойнтохонь hэм, хоорондуурнь хабшуулдан, үрдилдэн урганад. Олон түрэлэй бургааhад энээхэн ойе үдхэн шэдхэ болгонхой, гэбэшье эдэ мододой ехэнхинь дээгүүр үндэhэтэй, hуури, тогтуури багатай нарhад лэ даа…
Һаалишье hамарганда хамагдаад, ошоhоор үни болоо, үрмэдэhэн доро арай элихэн hууринь лэ харагдана. Аршаанай хойто добо дээрэ дүрбэн томо байшан гэрнүүд hүүлэй жэлнүүдтэ табигданхай, аргалуулха гэжэ ерэгшэдые угтажа байна.
Ивалгын аймагай Хурамша тосхонhоо хойшолжо гараад, 9 модо зайда байдаг нэрлэгдэhэн энэ аршаанаймнай аргалдаг шэдинь гэхэдэ хоолойн, уушханай ханяада болон уушханай бусад үбшэнүүдые болюулдаг юм гэжэ урданhаа нааша хэдэн олон жэлнүүд соо суугаа дэлгэрүүлжэ байдаг. Газар дэлхэйн зон амитад олоороо ерэдэг болоо.
Һүүлэй үедэ нютагай эдэбхитэн, механик мэргэжэлтэй Норбо-Самбу Пагбаевич Пурбуевай оролдолгын ашаар тэрэ дүрбэн байшан гэрнүүд баригдаа, аршаанай эхин сэбэрлэгдэжэ, сорго тодхоогдоо, үнгэрhэн хабартаа Ганжуур лама түрүүтэй Ивалгын дасанай ламанар ерэжэ, Отошо бурха гунгарбаа соо аршаанай эхиндэ залажа арамнайлаа, аргалуулжа байгшадта сэнхир хии хэрэглэн хоолоо буйлуулжа эдихэ арга олгодоо. Хүнгэн hүбэлгэн Норбо-Самбу багадаа түрэлхидэйнгөө hаалида байхада иишэ байлсаhан, тиихэдэ энээхэн газар угайнь урданай буусашье байhан юм ха, hэргээжэ, арад түмэнэй түлөө оролдожо байhаниинь hайшаалтай, гаргашагүй ажал гэжэ байха бэшэ, ганса гаазhаа захалаад, түлеэ залhан, трактор машинын түлишэ, харгы зохид байлгалга гээд лэ гаража байдаг гаргашануудтаа гэжэ аргалуулхаяа ерэhэн хүнhээ сүүдхын 300 түхэриг абадаг юм.
Хэрэглээ hаатнай холбоо тогтоохо арга иимэ байха: +7 924 650 81 08
Амарха, сэнгэхэ газар бэшэ ха юм даа, аргада хэрэгтэй хүнүүд хаанашье hаань хүрөөд ошодог, тиихэдэ энэ Ноолиин аршаан хүрэтэр зам арюун, байха дулаан байратай, аргалуулхын хажуугаар хотын юрьенhээ мултарhан зондо аали номгон оршондо амархашье таатай арга биил байна.
Тиимэл даа, хүндэтэ нүхэд, аргын хэргэтэй hаа, таниие Ноолиин аршаан жэлэй дүрбэн сагта хүлеэжэ байна.
