Үнгэрһэн хаһамнай ехэ һониноор, гоёоршье гээ һаа болохо, эхилээ бэлэй. Харагшаднай һанана бэзэ, “Алтан сэргэ” гэжэ уласхоорондын фестивалиин туг доро нээгээ һэмди. Тиихэдэ Москвагай Евгений Вахтанговай нэрэмжэтэ театр ерэжэ, манай болон ород театрнуудай тайзан дээрэ зүжэгүүдээ табяа бэлэй... Һониншье, баяншье үнгэрһэн хаһадамнай фестивалиин хэб соо «Ромео Джульетта хоёр» гэһэн зүжэгэй туршалга табигдажа, тэрэмнай буряад хэлэндэ оршуулагдаад, тэрэ хаһымнай премьерэ боложо үгөө. Тэрэ хаһаяа дурсабал, үшөө “Үнгэрһэн сагай һэбшээн” гэжэ Саян Жамбалов Басаа Валера хоёрой зүжэг. Театр шэнжэлэгшэ Анна Степанова апрель һарада Улаан-Үдэ ерэхэдээ, энэ зүжэг хараад, онсо тэмдэглэһэн юм. Зүжэгөө табиха бүхэндэмнай, ехэ олон харагшад суглардаг байгаа. Шэтэ хотодо, Агын тойрогто табигдаа, Монгол орондо “Гэгээн Мууза” гэһэн фестивальда амжалтатай хабаадажа ерээ бэлэй. “Үнгэрһэн сагай һэбшээн” гэһэн зүжэг табихын урда тээ бүлэг артистнарнай Шэнэхээн нютаг экспедицидэ гаража, энэ ябадалай нүлөөн доро үрэ дүнтэйгөөр энэ зүжэг табигдаа. Тэрэ сагай үйлэ хэрэгүүдэй тохёолдоһон газартай танилсажа, түүхын гэршэнүүдтэй уулзажа, хөөрэлдэжэ, тэрэ үеын дуун, заншалта байдал бодото дээрэнь үзэхэдөө, артистна ехэ олон мэдээсэл бэедээ шэнгээнэ ха юм.
Тэрэл гуримаараа баһа Анаа-Хорёор ябажа ерээ бэлэй. Тиигээд лэ амаралтаһаань сугларһан театр шэнэ зүжэг дээрэ хүдэлжэ захалба гээшэ, энэл намартаа харашадтаа дурадхаха байхабди. Энэмнай юун гээшэб гэбэл, угсаата арадаймнай түүхэтэй холбоотой, Дүүмын тайшаа Дамба-Дугар Иринцеев, илангаяа тэрэнэй Шойжод хатанай гүрэн түрын удха шанартай үйлэ үүсхэлнүүд дээрэ үндэһэлэгдэһэн зүжэг болохо байха. Зохёолшод болон эрдэмтэдэй баримтануудһаа һабагшатай зүжэг бүтэжэ байна гээшэ.
Энэ намартаа Ленинградай хоёрдохи студи дүүргэжэ ерэһээр түрэл театртаа таһалгаряагүй ажаллажа ябаһан үүринэр – Россиин арадай артист Михаил Елбонов, Россиин габьяата артист Чингис Гуруев хоёрой наһанайнь ойн баярнуудые тэмдэглэхэ байхабди.
Хожомойнгоо ажабайдалые хараадаа абажа, театрайнгаа мэргэжэлтэдые һургаха уялгамнай ха юм даа, театраймнай уран һайханай хүтэлбэрилэгшэ Эржена Жамбалова Москва ошожо ажал ябуулаад, хэдэн хүнүүдые һургаха арга оложо ерээ бэлэй. Тиигэжэ хоёр уран зураашад болохо хүнүүд, Вахтанговай нэрэмжэтэ театрай дэргэдэхи Щукинска училищида найруулагшын мэргэжэлдэ һурахаяа нэгэ хүн ошохо болоод байна. Энэл училищитай хэлсээ баталжа, 2016 оной һуралсалай жэлһээ 13 залуушуулые артистын мэргэжэлдэ һургаха бологдоод байна. Тиимэһээ энэ һуралсалай жэлдэ Буряад ороной бүхы аймагуудаар болон Агын, Усть-Ордагай тойрогуудаар буряад хэлэтэй бэлигтэй үхибүүдые бэдэрэлгын ажал ябуулхамнай.
Тииһээр саашадаа хараалһан олон түсэбүүднай харагшадайнгаа шүүмжэлгэдэ дурадхагдаха байха, харагша театр хоёрой харилсаан улам лэ бэхижэжэ байхань болтогой. Харагшадайнгаал түлөө ажаллажа байһан театр ха юм даа.
