Шагнагдаһан зоной тоодо манай Буряад Улас дотор бэелүүлэгдэдэг “Буряад орондо үльгэрэй Сагаалган” гэһэн проект оронхой.
Энэ шан “Үльгэрэй Сагаалган” гэһэн хэмжээ эмхидхэгшэдтэ барюулагдаа. Нэгэ миллион түхэригэй мүнгэн шан Сагаан Үбгэндэ барюулагдаа. Сагаан Үбгэниие гүйсэдхэгшэ Дамба-Дугар Бочиктоев засаг түрэдэ аяншалгада анхарал табидаг байһандань баярые хүргэжэ, энхэ элүүрые, ута наһа, удаан жаргал хүсөөд, ”Агууехэ Росси һалбархань болтогой!” гэжэ үреэлээ. Росси гүрэнэй засаг түрын түрүүлэгшэ Дмитрий Медведев: “Эдэ үгэнүүдэй һүүлээр үшөө юу хэлэхэбши даа. Иимэ һайн ажал хэжэ ябаһандатнай баярые хүргэнэб. Иимэ һайхан үльгэрэй газарта байһандаа баяртайбди. Би мүнөө хаана ажалладаг байһанаа мэдэбэб, үльгэрэй орон ха юм”, - гэжэ миһэрээ.
Иимэ тусхай шангууд арбан илагшадта барюулагдаа. Энэ мүнгэн зөөри нютаг нютагай саашанхи хүгжэлтэдэ үгтэнэ.
“Үльгэрэй Сагаалган” гэһэн проектые хүтэлбэрилэгшэ Андрей Измайлов, энэ мүнгэн зөөри хубсаһа хунар оёходо гаргашалагдаха гэжэ хэлэбэ.
- Сагаан Үбгэмнай үбэлэй, зунай хубсаһатай байха ёһотой. Сагаан Үбгэн жэлэй туршада элдэб хэмжээнүүдтэ ходол хабаадалсажа байха бшуу. Этнографическа музейн дэргэдэ байгуулагдаһан Сагаан Үбгэнэй үргөө ходол ажаллажа байха ёһотой. Ажалаа эршэтэй ябуулхабди, -гэжэ гүрэнэй шангай лауреат мэдээсэбэ.
“Үльгэрэй Сагаалган” гэһэн проект Буряад орондо 2007 онһоо эхилэнхэй. Энэ һайндэрэй эгээл шухала нюур, эзэниинь хадаа Сагаан Үбгэн гээшэ. Тэрээндэ айлшаар элдэб арадуудай гол түлэб заншалта үльгэрэй айлшад ерэжэ, Сагаан һараар Буряад ороной арад зониие золгодог, амаршалдаг, наада зугаагаа дэлгэдэг юм.
