Yнгэрhэн хаhадаа Уильям Шекспирэй «Ромео Джульетта хоёр» гэhэн зүжэг театрай залуу найруулагша Сойжин Жамбалова тайзан дээрээ табижа, тэрэ зүжэгынь театрайнгаа амаралтадаа гаратар амжалтатай, урагшатай ябаа бэлэй. Энэ шэнэ хаhаяа энэл зүжэгөөрөө нээхэ шиидхэбэри абтанхай, энэ hарын 23-да харагшадтайгаа уулзаха талаан хүлеэгдэжэ, театрай зүжэгшэд hэгшэнги.
Тиигээд лэ нэгэтэ нээгдэhэн хүшэгэмнай үдэр бүри тооной сэлигдэжэ байха ха, сентябриин 24-дэ Эрнест Хэмингуэйн туужаар табигдаhан «Yбгэжөөл ба далай», тиихэдэ 25-да Дэвид Берриин зохёолоор табигдаhан «Наhанай намар» гэжэ зүжэг удаа дараалан гараха байха.
«Yбгэжөөл ба далай». Энэ зүжэг анхан табигдаад тайзан дээрэ ябахадаа олон зүжэгшэд (12 хүн) наададаг байhан hаа, энэ удаа энэмнай нэгэ хүнэй наададаг зүжэг болоод байна. Yбгэжөөлэй дүрэ харуулжа наадажа байhан Буряадай габьяата зүжэгшэн Баста Цыденов мүнөө гансаараа наадаха. Манай театрай хандаhан энэ шэнэ hонин арга манай харагшадта hайшаагдаха байха гэhэн бодол байна, хүндэтэ харагшад, хаража сэгнэхэ гээбты даа.
Россиин Театрай ажал ябуулагшадай холбооной түбтэ арбан hарын 1-hээ 14 болотор үнгэрхэ театрнуудай Уласхоорондын V мүрысөөндэ энэ зүжэгэй хабаадаха тухай мэдүүлгэ манай театрhаа ябуулагданхай, тэндэ Италиин, Франциин, Испаниин, Германиин, Польшын, Австралиин, Росиин болон бусад гүрэнүүдэй театрнууд хабаадаха юм ха.
Байгша оной үнгэртэр театртамнай үшөө хоёр шэнэ зүжэг табигдаха байха. Театрай зүжэгшэд арадайнгаа түүхэ уудалжа, Базар Барадин Цырен-Дулма Дондокова хоёр зохёолшодой, тиихэдэ эрдэмтэдэй хүдэлмэринүүд дээрэ үндэhэлжэ Хориин тайшаа Дамба-Дугар Иринцеев, тэрэ үе, арад зануудай, улас түрын харилсаанууд, тиихэдэ тайшаагай хатан Шойжод, тэрэнэй үүргэ тухай зүжэг дээрэ хүдэлжэ байнад. Тиихэдэ жэл бүри тайзан дээрэмнай зүжэгшэдэй хүсөөр мүндэлөөд, харагшадта дуратайгаар хүлеэгдэн абтадаг шог нааданууд дээрэ үндэhэлжэ, «Yбгэд+хүгшэд=» гэhэн зүжэгэй бэлэдхэл мүн лэ зэргэ ябуулагдажа байнхай.
Даб дээрээ иимэл даа. Уулзатараа, хүндэтэ харагшаднай.
