2012 онһоо һүүлэй хэдэн жэлнүүдэй туршада үргэн олон хэрэглэгшэдтээ таража ошоһон буряад хэлэндэ һураха сахим ном (эндэ хоёрдохи ном тухай хэлэгдэнэ) илангаяа һургуулинуудта һурагшад болон оюутадай эхэ хэлэеэ шудалха хэрэгтэ айхабтар ехэ түлхисэ болоһон, нэгэтэл “амташаһан” хүнүүдэй һуралсалай талаар бүхы асуудалнуудтаа харюунуудые олодог газар болонхой гэхэдэ оройдоошье алдуу байхагүй. Һуралсалдаа хэрэглэхэһээ гадна, Буряад Республикын үндэhэтэнэй 1-дэхи лицей-интернадта энэ сахим hураха номоор мүрысөөнүүд республикын Һуралсалай яаманай дэмжэлгээр жэл бүри үнгэргэгдэһөөр заншалта болоод байна.
Хүнэй һаадгүй хүнгэн хэрэгтэй асуудалнуудаа олохын түлөө ном хэдэн хубинууд болгогдон хубаагданхай. Жэшээ болгожо харуулхада, “Багшын дүршэлһөө” гэһэн хубида буряад хэлэ бэшэгэй 334 хэшээлнүүд оруулагданхай, сэсэрлигэйшье багшанар болон хүмүүжүүлэгшэдтэ хэрэгтэй хэшээлнүүд байха. “Эхэ хэлэн” гэһэн хубида 164 уншалга дахажа бэшэхэ хүдэлмэринүүд (диктант), 2075 өөрыгөө шалган сэгнэхэ зорилготой хүдэлмэринүүд үгтэнхэй. Хэрэглэгшын һонирхол үүсхэжэ, сэдэб дэмжэхэ “Эхэ нютаг”, “Буряад арад”, “Ёһо заншал” гэһэн хубинуудта 1600 мэдээсэлнүүд ороһон, бүхыдөө сахим ном соо 14 янзын толинууд оруулагданхай. “Уран бэлигэй дээжэ” гэһэн хубида буряад (энэ тоодо Буряад оронһоо гадуур ажаһуугшад), монгол, хальмаг урлалшадай хүдэлмэринүүд, соёл урлалай болон ниитын ажал ябуулагшад тухай дэлгэрэнгыгээр үгтэнхэй.
«Буряад хэлэн» гэhэн сахим номой гол зорилго хадаа мультимедийнэ аргануудые хэрэглэн, hурагшадай хэлэндээ түшэглэхэ нангин мэдэрэлые, буряад хэлэеэ сэдьхэл зүрхэндөө дүтөөр hанаха, мэдэхэ хүсэлые дэмжэлгэ болоно.
Тус зорилго бэелүүлхэдээ багшанар номой арга боломжонуудые үргэнөөр хэрэглэжэ, медодикын талаар хэшээлнүүдээ шэнэдхэхэ, hэргээхэ, үзүүлбэриин материал үргэнөөр хэрэглэхэ зэргэтэй.
«Буряад хэлэн» гэhэн электрон номой үшөө нэгэ ехэ зорилго гэбэл, hурагшадтаа арадайнгаа түүхэ, ёhо заншал, соёл болбосорол ойлгуулха, тэдээнэй түрэл хэлэн дээрээ ямаршье сэдэбээр хөөрөө дэлгэхэ аргые хүгжөөлгэ болоно.
Энэ ном бүтээхэдэ Буряадай Гүрэнэй Ехэ һургуулиин, Эрдэмэй түбэй багшанар болон эрдэмтэд, юрэнхы эрдэмэй һургуулинуудай багшанар, уран зураашад, уран зохёолшод, сэтгүүлшэд эдэбхитэй хабаадаа гэжэ нэмэжэ хэлэмээр.
Ямар нэгэн ушар шалтагаанаар энэ номтой энэ болотор нүхэсөөгүй ябаһан һаа, нүхэсэхэ арагяа бэдэрэгты, нэгэтэл энэ ном хэрэглэн хүдэлжэ захалбал, хамаг ажабайдалайнгаа урагшатай, хүнгэн болоһые ойрын саг соо анхархат даа. Энэ номые хаанаһаа оложо, яажа хэрэглэжэ болохоб гэһэн асуудалда иимэ утаһаар холбоо тогтообол, харюу олохот:
8 (3012) 21-48-57.
