Буряадай уран шүлэгшэдэй зохёолнуудые уран гоёор уншалгаар «Дүрбэн тэнгэри» гэжэ мүрысөө эмхидхэн байгуулагшад гэхэдэ Ородой Холбооной Уласай, тиихэдэ Буряад Уласай соёлой яаманууд, Буряад Уласай Һуралсалай болон эрдэм ухаанай яаман, Улаан-Yдэ хотын Захиргаанай Һуралсалай талаар хороон.
Уран зохёолой өөрын маягтай орёо арга болохо шүлэг гээшые бэшэ шадабари хүн бүхэндэ байдаг бэшэ ха юм даа, ушар тиимэhээ хүнэй эды хоморой бэлигые дэмжэхэ, үргэн олондо мэдээжэ болгохо, илангаяа залуу бэшэгшэдые элирүүлхэ зорилготой энэ мүрысөөн эмхидхэгдэнэ. Эндэ Буряадаймнай ажаhуугшадhаа гадна бусад хүршэ (холыншье) можо нютагуудай шүлэгшэд хабаадахаар уригдана, тиихэдэ шүлэгшэдөө түлөөлhэн эмхи зургаанууд, тэдэнэй тоодо юрэнхы эрдэмэй hургуулинууд, мэргэжэлэй дунда болон дээдэ (Ехэ) hургуулинууд хабаадагшад боложо бүридхэгдэхэ.
Мүрысөөнэй нэрлэгдэhэн заабаринууд гэхэдэ:
– шүлэг ганса нэгээрээ уран гоёор уншалга;
– шүлэглэмэл зохёолой найруулга бүлэг-бүлэгөөрөө гүйсэдхэлгэ.
Хабаадагшадай наhанай илгаануудаар бүлэгүүд байгуулагдаха юм ха:
– 5-hаа 10 наhа оруулан;
– 11-hээ 15 наhа оруулан;
– 16-hаа 22 наhа оруулан;
– 23 болон энээнhээ дээшэ наhанай.
Энэ мүрысөөн эгээ түрүүн эхилжэ, 2007 ондо үнгэргэгдэhэн байгаа, энэ удаа мүрысөө үнгэргэлгын үедэ дүй дүршэлөөрөө андалдалга, шүлэгшэдэй болон шүлэгтэ дуратайшуулай уулзалганууд, дүхэриг шэрээнүүд хараалагданхай.
Арбан hарын 16-да үнгэрхэ түгэсхэлэй ехэ тоглоондо мүрысөөндэ илажа тодорогшодhоо гадуур хотын театнуудай зүжэгшэд, тайзанай бага хэмжүүртэ тоглолгын болон сэнхир дэлгэсэй одод хабаадлсаха юм.
Энэ мүрысөө үнгэргэлгын үшөө нэгэ hонирхолтой талань гэхэдэ, мэдээжэ уран зурааша Зоригто Доржиевай ударидалга доро урлалай дунда мэргэжэлэй hургуулиин оюутад И. Калашниковай нэрэмжэтэ хотын номой hантай суг уншагшадай гудамжын наада эмхидхэхэ, «Шүлэгүүд хана дээрэ» гэжэ Московская гудамжын 4-дэхи, Комсомольская гудамжын 24-дэхи, Геологическая гудамжын 14-дэхи гэрнүүдэй ханануудые шэмэглэхэ.
Энэ ехэ хэмжээ ябуулга энэ жэл Орос орон дотор соносхогдоhон Уран зохёолой жэлдэ зорюулагданхай.
Хабаадаха дуратайшуул арбан hарын арбан болотор 20 44 92; 610 277 дугаарнуудай утаhаар холбоо тогтоожо, мэдүүлгэнүүдээ оруулаарайт.
