Хоёр хүгшэд, хоёр үбгэдэй энеэдэ-зугаатай ами-аминдаа наадан манай дура, һонирхол үнинэй татаһан аад, харин энэ намартаал тэрэнь эблэржэ, бэеэ дааhан нэгэ үйлэтэй зүжэг болон ургаба.
Энэ зүжэг хаража, хүн зомнай буурал толгойто төөдэй таабайгаа, түрэлхидөө, хүршэнэр нүхэдөө энхэрэн дурсан, тэдэнэртээ хонходожо, ажабайдалаарнь һонирхожо, үнэн сэдьхэлһээ һанаата болохо зали-забhараа олохо аалам... Хайрата аба эжынэрнай, үбгэд хүгшэднай бэеын үбшэ хабшаниие энеэдэн зугаагаар, хүлгөөтэ байдалай хүшэрые уянгата дуугаар, зүрхэ сэдьхэл шэмшэрүүлһэн хүндэ һанаае маани мэгзэмээр тэнсүүрилжэ, ажамидарха хүсэ шадалтай, тэнюун сэдьхэлдээ һайхан һанаатай байдаг ха юм.
Энэ зүжэгтэ наадаха зүжэгшэд:
Хүгшэд – залуу артистнар Лосолма Протасова, Ольга Ранжилова,
үбгэд – Буряадай габьяата артистнар Бэлигтэ Дамбаев, Болод Динганорбоев,
үшөө тиихэдэ Буряадай арадай артист Баярта Ендонов, Буряадай габьяата артист Дарима Цыденова гэгшэд, артист Ада Ошорова.
