Улас түрэдөө мэдээжэ сэтгүүлшэ Серафима Очировагай бүтээhэн ехэ захата – түбэд эмшэн, уран зохёолшо, уран дархан, элдэб шэглэлнүүдээр хэрэглэгдэжэ болохо оньhон түхеэрэлгэнүүдые ухаалан зохёогшо байhан, арадаймнай гайхалтай хүбүүдэй нэгэн Галдан Ленхобоев тухай «YРШӨӨЛТЭ ХУБИ ЗАЯАН» гэжэ «Буряад-Монгол ном» хэблэлээр гаргагдаhан ном энэ жэлэй эгээл эрхим ном гэжэ нэрлэгдээ. Энэ сэгнэлтын үнэ гэбэл – Хүндэтэ үнэмшэлгэ дээрэ 25 000 түхэриг мүнгэн шагнал зохёогшодо барюулагдаа.
«Буряад хэлэн дээрэ эрхим ном» гэжэ нэрлэгдэhэн заабарида Санджэ-Сурун (Галина) Раднаевагай гурбан ботиhоо бүридэhэн «Суута хүнүүдэй ажабайдалhаа» гэhэн ниитэ гаршаг доро «Новапринт» хэблэлээр гараhан хүдэлмэри илажа гараа. Шагналынь 15 000 түхэриг.
«Хүүгэд болон эдиршүүлдэ зорюулагдаhан эрхим ном» гэжэ нэрлэгдэhэн заабарида «Табан хушуу малай зурагламал буряад-ород тайлбари толи» нэрлэгдээ. Энэ үндэhэн хэлэеэ үзэхэ, шудалхада туhа болохо зорилготой, зурагуудаар шэмэглэгдэhэн толи «Бэлиг» хэблэлээр гараа, шагналынь 10 000 түхэриг.
«Хэблэлэй аргануудые эрхимээр хэрэглэн шэмэглэгдэhэн эрхим ном» гэжэ нэрлэгдэhэн заабарида «Буряадай хиидүүд» гэжэ ном оробо. Энэ номые Бельгаев В.Г., Конечных С.М., Урбазаев С.М., Олоев Д.Т. гэгшэд бүридхэн, Буряадай Эрдэмэй түбэй хэблэлээр гаргаhан байна. Шагналынь 10 000 түхэриг.
«Һуралсалай онол аргануудые зааhан эрхим ном» гэжэ нэрлэгдэhэн заабарида Буряадай Ехэ hургуулиин «Улаан-Yдын гудамжанууд – түүхын хүшөөнүүд» гэжэ дэлгэрэнгы тайлбаритай толиин түхэлөөр хэблэгдэhэн ном нэрлэгдээ. Шагналынь 10 000 түхэриг.
Энэ жэлэй номой дугыланда ушарhан үшөө нэгэ hонирхолтой зүйл гэхэдэ, буряад уран зохёол уншаха, шагнаха дуратай зондо шэнэ бүтээл болохо «Соносохо номой һан» табигдаhан байгаа. (Найруулагша – Баярма Владимировна Жалцанова). Миндаhан дээрэ бэшэгдэhэн зохёолнууд арад зоноймнай ёhотой баялиг эрдэни гээшэ, булагай эхин мэтэ ариг сэбэрээр бурьялhан буряад уран зохёолойнгоо дээжэтэй, түрэлхи түүхэтэеэ танилсан, арад олонойнгоо уран бэлигээр шагнагшаднай һонирхохо бэзэ гэhэн этигэлтэй «СD, DVD дээрэ бүтээгдэhэн эрхим ном» гэжэ нэрлэгдэhэн заабарида энэ бүтээлөө дурадхажа, энэнь энэ нэрлэгдэhэн заабаридаа эрхим ном гэжэ тодорбо. Шагналынь 10 000 түхэриг.
Тиихэдэ «Буряад Уласай жэлэй эрхим ном» гэhэн мүрысөөндэ hайшаагдажа, тусхай шагналнуудта хүртэhэн хэблэлнүүдые нэрлэбэл:
– «Уланай hургуули: зуун жэлнүүдые ото». Гармаев С. В., Очирова Е. Б., Хамарханова Т. Ш.
– «Хойто-Байгалай аймагай түүхэ». «Новапринт» хэблэл.
