Yндэhэн хэлэн дээрээ зүжэг бэшэгшэдые, зүжэг дэлгэдэг урлалые дэмжэхэ зуураа буряад хэлэеэ сахин хамгаалалга – үнгэрhэн энэ мүрысөөнэй гол зорилго иимэ байгаа. Тиигээдшье энэ жэлнай России дотор Уран зохёолой жэл гээд соносхогдоhон бэлэй даа. Буряад Уласай соёлой яаманай ударидалга доро Буряадай арадай уран бэлигтэнэй түбэй эмхидхэhэн энэ мүрысөөндэ 10 хүн хабаадажа, 19 зүжэг харалганда табигдаа. Энэ хоёрдохи, тиихэдэ үнгэрhэн жэл эмхидхэгдэhэн нэгэдэхи мүрысөөнүүд гуурhа барижа, уран зохёолой эгээл хүндэ шэглэл гэгдэдэг зүжэг бэшэлгэдэ дүйтэй байhанаа гэршэлхэ аргатай хүнүүд бии юм ха юм гэжэ харуулба.
Мүрысөөнэй дүн иигэжэ гараа гэбэл:
Михаил Батоин «Бууралхан Буряадтаа бусахаб» гэhэн зүжэгөөрөө нэгэдэхи hуурида гараба. Шагналынь 60 000 түхэриг.
Хоёрдохи hуурида «Шулуун зүрхэн» гэжэ зүжэг зохёогшо Дугарма Цыренова. Шагналынь 50 000 түхэриг.
Гурбадахи hуурида «Жаргалмаагай жаргал» гэжэ зүжэгөө дурадхаhан Цырегма Сампилова. Шагналынь 40 000 түхэриг.
