Буряад хэлэн гээшэ
Утаhан шэнги уян,
Алтай гургалдайн аялга шэнги хонгёо,
Далай шэнги баян,
Дэлхэй шэнги үргэн!
Үдэшые хүтэлжэ гаража ерэhэн Буряадаймнай сэнхир дэлгэсэй сурбалжалагша, дамжуулгануудые хүтэлэгшэ Эрдэни Раднаев Буряад театрай зүжэгшэн Дарима Лубсанова хоёрой тайзан дээрэhээ хэлэhэн эдэ үгэнүүдэй hүүлшын абяанаар буряад хэлэнэймнай hүлдэ дуун болоhон Монголой Хэнтэйн буряад Болдын Батхүүгэй үгэнүүд дээрэ Шаравай ая найруулhан «Аялгата hайхан буряад хэлэмни» гэhэн дуу hүртэй, жабхалантайгаар дууриимнай театрай дуушад Билигмаа Ринчинова, Бадма Гомбожапов, Мэргэн Санданов гэгшэд дуулажа, тиигээд лэ эхилжэ тэмдэглэгдэhэнhээ хойшо үнгэрhэн 10 жэлэй ойн hайндэр эхилбэ hэн.
2006 онhоо эхилхэдээ, түрүүшын жэлнүүдтэ, буряад хэлэнэй Үдэрнүүд долоон хоногой туршада үнгэржэ, элдэб мүрысөө-урилдаанууд болодог байhан юм. Мүнөө буряад хэлэнэймнай Үдэрнүүд бүхэли hарын туршада үнгэрнэ. Энэ хугасаа соо үнгэрдэг хэмжээ ябуулгануудшье тоогоороо олошороо, илангая шанарайнгаа талаар, уг удхаараа дээшэлээ.
Буряад хэлэнэй Үдэрые эмхидхэн байгуулагшад гэхэдэ заншалта ёhоороо Буряад Уласай Засагай газар, Буряад Уласай Арадай Хурал, Бүгэдэ буряадай үндэhэн соёлой эблэл.
Республикын Толгойлогшо Вячеслав Владимирович Наговицын, Арадай Хуралай Түрүүлэгшын орлогшо Вячеслав Германович Ирильдеев, тиихэдэ Бүгэдэ буряадай үндэhэн соёлой эблэлэй захирал Владимир Романович Булдаев гэгшэд эндэ сугларhан зоной нюураар республикын бүхы арад түмэниие, хабаадагшадые, тиихэдэ энэ hайндэр эмхидхэн үнгэргэгшэдые амаршалаа.
Буряад Уласай Толгойлогшо В. В. Наговицын буряад хэлэ хүгжөөлгэдэ онсо габьяатай байhан Буряадай үндэhэтэнэй номой hангай мэргэжэлтэн Рыгзема Гомбоевна Батомункуевада, бүхы наhаараа буряад хэлэеэ ургажа ябаа үетэндэ заажа ябаhан, Улаан-Үдэ хотын hуралсалай талаар Хорооной hуралсалай онол аргануудай талаар мэргэжэлтэн Ульяна Ешеевна Мангутовада, Буряад Уласай соёлой яаманай Мэдээсэлэй түбэй захирал Жанна Чимитовна Дымчикова гэгшэд Уласай Засагай Хүндэтэ Үргэмжэлэлөөр шагнагдабад.
Буряад Уласай Арадай Хуралай Түрүүлэгшын орлогшо Вячеслав Германович Ирильдеев амаршалгаын үгэнүүдые хэлээд, буряад хэлэнэй Үдэртэ зорюулагдаhан олон тоото мүрысөөнүүдэй нэгэндэ – Буряад Уласай соёлой яаманай үүсхэлээр Буряадай арадай театрнуудта табигдажа боломоор зүжэгүүдые буряад хэлэн дээрэ бэшэлгээр хоёрдохи мүрысөөндэ шангай hууринуудые эзэлhэн мэдээжэ уран зохёолшо, драматург Михаил Батоин «Бууралхан Буряадтаа бусахаб» гэhэн зүжэгөөрөө нэгэдэхи hуурида,
хоёрдохи hуурида «Шулуун зүрхэн» гэжэ зүжэгөөрөө Дугарма Цыренова, гурбадахи hуурида «Жаргалмаагай жаргал» гэжэ зүжэгөө дурадхаhан Цырегма Сампилова гэгшэдтэ шагналнуудыень барюулаа.
Тайзан дээрэhээ арад түмэнөө үшөө нэгэ эхидхэлшэ – Бүгэдэ буряадай үндэhэн соёлой эблэлэй захирал Владимир Романович Булдаев амаршалаа, «Буряад хэлэн дээрэ хөөрэлдэнэбди» гэhэн хэмжээ ябуулга, үндэhэтэнэй номой hанда уран зохёолой болон хизаар ороноо шэнжэлхы үүргэтэй «Нюуса тобшо» гэhэн мүрысөөндэ түрүүшын hуурида гарагшадта шагналнуудыень барюулаа.
Олон олон шэглэлнүүдээр олон олон hонирхолтой хэмжээ ябуулганууд, мүрысөөнүүд үнгэрөө гэжэ мэдүүлбэбди, тодорхойшогоор ээлжээтэ мэдээсэлнүүд соогоо дуулгахабди.
