Артист гэжэ хэн бэ? Огторгойн одо мүшэд мэтэ оройн үндэртэ, тэнгэриин бурхашуултай адли яла-сала, ямба хүндын дээжые хаман шүүжэ абагшад лаб ха. Зоболонто газар гэшхэн буухадаа хүгжэм дуутай, зугаа наадатай, эди шэдитэй һүрөөтэй зохид түби юртэмсэ асарһандал болодог. Юрын оршон тойронхиие һэргээхэ, бэрхэтэй хүшэр бодолнуудые хуряан холодуулха хүсэ шадал олгуулха бэлиг шадабаринь хүнэй зүрхэ сэдьхэл буляангүй яалайб? Олонхи зон иимэл бодолһоо театрай танхим дүүргэдэг ха.
Буряад драмынгаа театрта арад зомнай дуратайл даа. Зүжэг наадыень сэдьхэн хужарлагшадынь тоолошогүй. Зүгөөр зариман «Елбоновто» гэжэ зорюута ерэдэг. Михаил Елбонов ямарш харагшын анхарал гансата эзэлхэ онсо оньһотой. Ажалша абаринь, алиш тээшээ тэгшэ бэлигынь хэдыш хүндэ орёо рольнуудые – зүрхэ дайрама трагедиин гү, али шог ёгто комеди, водевиль хүрэтэр – үнэншэмэ мэргээр гүйсэдхэхэ арга олгуулдаг агша.
Залуу һүрэг зүжэгшэдэй үндэр ехэ тайзан дээрэ гараха замынь эгээл эхиндээ арадай театрнуудһаа һабагшатай. Олохониинь лэ Михаил Гомбоевичай наада ажаглаһандаа энэ мэргэжэлээ шэлэһэн байжа магад. Зарим нэгэниинь ойлгоогүйдөө һажаахыеш эрмэлзэхэ. Буряад драмтеатрай мэтрэй роль буйлуулха оньһон, арга маяг хаа хаанагүй шэнжэлэгдэдэг.
Һайн дуратанай зүжэг табиха хүдэлөөнэй жагсаалда 6 000 шахуу хүн мүнөө сагта оролсоно. 34 театр «Арадай», «Жэшээтэ» гэһэн нэрэ зэргэтэй, тэдэнэй 18-ниинь буряад хэлэн дээрээ наададаг. Одоо эндэл жэнхэни түрэл хэлэнэймнай бүхы баялиг тобойн гаража харагдадаг. Хэжэнгын, Оорлигой, Хурамхаанай, Баянголой, Хэрэнэй арадай театрнуудай тайзан дээрэһээ Елбоновай жэшээ баримталагшадай дуу шуун, хатар наадан, юрэдөө, шаналал гашуудалта, үгы гэбэл, эльгэ хатама образ дүрсэнүүд бүтээгдэн, харагшадай һанаа бодол эзэлнэ. Буряад Уласай арадай уран бэлигэй түб арадай театрнуудай гуламтануудые залируулхагүй гэжэ оролдожо, эдир Будамшуунуудые элирүүлжэ, саашанхи һургуулидань арга мүрөөрөө туһалалсаха үүргэеэ тон шухалада тоолодог.
Михаил Гомбоевич Елбонов эдэ үдэрнүүдтэ 70 наһаяа гаталба. Хэр тиигэбэшье хурса ухаатай, омог дорюун, наада зугаатай, бэе хүнгэн зандаа. Зүжэгшын табисуур иимэ юм гү? Сагай эрьесын үндэр дабаануудые дабаха шадал улад зондоо олгуулха изагуурынь дабхар-дабхар тэнхээ хүсэ үгэнэ гээшэ ха.
Гуниглагты, уярагты, сэдьхэлээ хүлгөөн, эрмэлзэхын ехээр эрмэлзэгты, үндэһэн арадайнгаа абари зан, ёһо заншал нангинаар сахижа, уянгата һайхан хэлэеэ хүгжөөжэ зүжэг наадануудта эдэбхитэйгээр хабаадалсажа байгыт, нүхэд.
