Бүгэдэ буряадай уласхоорондын 2016 оной XII Ехэ нааданай эхин түрүүшын хэмжээ ябуулга болгон, Буряадай улас түрын харьяата арадай уран бэлигтэнэй түб арбан нэгэн һарын 6-да эдир үльгэр түүрээгшэдэй мүрысөө Буряадай хүүхэлдэйн «Үльгэр» театрта үнгэргэбэ.
Мүрысөөнэй эрилтын ёһоор хабаадагшад наһанай илгаагаар хоёр бүлэг болгогдоо гэбэл:
бага наһатан – 7 наһанһаа 12 хүрэтэр;
аха наһатан – 13 наһанһаа 18 наһан хүрэтэр.
Шүүгшэдэй бүлэг тэдэниие «Үльгэр сооһоо хэһэг түүрээлгэ», тиихэдэ «Магтаал, соло дуудалга» гэһэн нэрлэгдэһэн заабаринуудай эрилтээр сэгнээ. Бага наһатанай дундаһаа хоёр нэрлэгдэһэн заабаринуудаар эгээл эрхим гэжэ Ахын аймагай Бүрэнголой С. Г. Дугаровай нэрэмжэтэ дунда һургуулиин һурагша Гүржаб Баторов шүүгшэдэй бүлэгөөр нэгэн дуугаар сэгнэгдээ. «Алтай Сүмбэр баатар» гэжэ үльгэрһөө хэһэг, тиихэдэ Арьяа Баалын магтаал гүйсэдхэһэн эдир гүйсэдхэгшын харагшын анхарал барижа, тайзанай талмай мэдэрхэ ушар гайхамаар байгаа гэжэ шүүгшэдэй бүлэг тон мэргэн анхарһан байна.
Аха наһатан сооһоо «Алтан Галуун ноён баатар» гэһэн үльгэрһөө хэһэг гүсэдхэжэ, Гүржабай аха Даша Баторов түрүүшын һуурида гараа.
Энэ мүрысөөндэ хабаадаха дүүрэн аргануудтай һургуулинууд хабаадабагүй гэжэ шүүгшэдэй бүлэг тэмдэглээ. Эндэһээл «Алтарганын» Ехэ нааданда Буряад Уласаа түлөөлхэ арга олгогдоно гэжэ мэдээжэ, гэбэшье үсөөн тоото хабаадагшад сооһоо мүртэй хүнүүд шэлэгдээгүй гэхээр бэшэл даа.
Нютаг нугадаа гүйсэдхэлгын арга шадабаринуудые заадаг багшанар өөһэдынгөө анхарал һэргээжэ, арадай аман зохёолой бүлгэмүүдтэ бэлигтэй хүүгэдые хабаадуулан, ажалаа эдэбхижүүлхэ бэзэ гэһэн найдал байна.
Үдэшэлэн хүүхэлдэйн «Үльгэр» театрай тайзан дээрэ илажа гарагшадай ехэ тоглоон боложо, Хүндэтэ үргэмжэлэл, Баярай бэшэгүүд болон тусхай шагналнууд барюулагдаа.
