Арадайнгаа урда онсо габьяатай хүнүүд, арадай уран бэлигтэнэй бүлэгүүд Буряад Уласай Гүрэнэй шагнал олгохо тухай зууршалгада хүртэдэг. Тиихэдээ тэдэнэй онсо габьяа арадай уран һайханай соёл шэнжэлхэ, сахиха, хүгжөөхэ, энэ һалбариин эгээл эрхим заншал гуримуудые үргэхэ, дэлгэрүүлхэ хэрэгтэ тодорһон байха ёһотой.
Тэдэнэй уралал, байгуулга дээрэ соёл уралалай бүхы һалбаринуудта хожомоо шэнэ бүлэгүүд болон бүлгэмүүдые байгуулха арга байха ёһотой гэжэ эмхидхэн байгуулагшад тэмдэглэдэг.
Буряад Уласай соёлой, уралалай байгуулганууд, ниитын эмхинүүд, зохёохы ажалтанай Холбоонууд, һуралсалай эмхинүүд Буряад Уласай Гүрэнэй шагналда зууршалха эрхэтэй.
Энэ жэлдэ зууршалагдаад, Буряад театрта үнгрэхэ тоглолтодо хабаадаха нюурнууд болон бүлэгүүдые хараябди:
1. Ахын аймагай Орлигой арадай театр;
2. Хэжэнгын арадай театр;
3. Яруунын аймагай Мужыхын «Лёнхобо» гэжэ арадай аман зохёолой бүлэг;
4. Зэдын аймагай Булагай «Черёмушки» гэжэ арадай аман зохёолой бүлэг;
5. Түнхэнэй аймагай «Хэнгэргэ» гэжэ арадай аман зохёолой бүлэг;
6. Улаан-Үдэ хотын сүлөө саг үнгэргэлгын соёлой «Рассвет» түбэй «Станица» гэжэ хасагуудай арадай аман зохёолой шуулга;
Хубиин габьяа харуулһан уран бэлигтэн хэд бэ гэхэдэ:
1. Федотов Иван Иванович, Ивалгын аймагай «Сударушка» гэжэ найрал дуушадай хүтэлбэрилэгшэ;
2. Эрдынеев Юрий Чингисович, арадай уран дархан;
3. Гомбоин Ешин-Хорло Будуевна, Улаан-Үдэ хотын Вагжановай нэрэмжэтэ Соёлой байшангай арадай дуунуудые гүйсэдхэгшэдэй «Хадаг» гэжэ һургуули-студиин хүтэлбэрилэгшэ.
