Намарай һайхан энэл сагта, 1958 оной ноябриин 9-дэ Агын тойрогой Согто-Хангил нютагта олон дүүнэрые хойноо дахуулан энэ дэлхэйдэ ерэһэн байгаа.
Эрхүүгэй Гүрэнэй университедэй журналистикын факультет 1982 ондо дүүргэжэ ерэһээр Буряад үнэн һониндо ажалда орожо, тэрэ гэһээр журналистын хүнгэн бэшэ ажалда бүхы наһаяа һүүлшынгээ үдэр хүрэтэр зорюулаа. Буряадай радиодо хэдэн жэл ажаллаһанай удаа Буряадай телевидени ерэжэ, бултанда мэдээжэ боложо, республикын арад түмэндэ дурлуулһан «Буряад орон» дамжуулгые 1992 онһоо хүтэлжэ ябаа.
Энэ дамжуулгадаа арад зонойнгоо ажабайдал, ажал хэрэгүүдые харуулха, хүшэр хүндэ ажабайдалда байһан зоноо дэмжэжэ, этигэл найдалай үрэһэ тарижа, үргэлжэ һайн һайханда уряалжа, суг ажаллажа ябаһан нүхэдөө дэмжэжэ, залуу журналистнартайгаа нюусаараа хубаалдан, нэгэ үгөөр нээрээл зоной хүн байһан юм. Энээнһээ гадуур Буряадайнгаа соёл, уралал, тэндэ боложо байһан һонин һорьмой, амжалтанууд, наадан зугаа гээд лэ барагдашагүй олон хэмжээ ябуулгануудта үрдиһэн лэ, агаарай долгёор арад түмэндөө хүргөөд лэ байгша бэлэй.
Бэлигтэй зоноор айхабтар баян Агын дайдада мүндэлһэн хадаа, уран үгэдэ, соёлдо, буряад арадайнгаа бүхы хэрэгүүдтэ онсо анхаралтай, түрэл хэлэндээ дуратай, тэрэ мүртөө эхэ хэлэеэ дүүрэн хэмжээндэ мэдэхэ, тэрэл хэлэн дээрээ хөөрэлдэжэ, ажалаа бүтээжэ, заншал гуримуудаа гамтайгаар сахижа ябаа. Буряадаймнай соёл, уралал, гэгээрэл һүүлэй үедэ хараа байса хүгжэжэ байна гэжэ анхарагдадаг, тэрэ хүдэлөөн соо Баяр Дамбаринчинэвэй өөрын һуури ехэл байгаал даа. Энээнэйнь гэршэ болохо тэрэнэй хайра шагналнууд гэхэдэ: Буряад Уласай, Агын автономито тойрогой соёлой габьяата хүдэлмэрилэгшэ, Буряадай журналистнарай Холбооной Ярослав Гашегай нэрэмжэтэ шангай лауреат, уһан дээрэ аюулда орогшодые абарһанай түлөө Россиин гүрэнэй хэмжээнэй медаль, тиихэдэ Буряад арадай урда онсо габьяатай байһанай түлөө Бүгэдэ Буряадай үндэһэн соёлой эблэлэй медаль, Буряад Республикын Правительствын Хүндэлэлэй Грамота, Буряад Республикын Правительствын болон Буряад Республикын Арадай Хуралай Баярай бэшэгүүд. Тиихэдэ ажаллажа байһан «Буряад орон» дамжуулгатайгаа 2009 ондо арадууд хоорондын бэе бэеэ ойлголсожо, бэе бэеэ хүндэлжэ харилсалгые харуулжа, үргэжэ байһанайнгаа түлөө Буряад Уласай Толгойлогшын мүрысөөндэ илажа, шагнагдаһан, Бүгэдэй Буряадай 2012 оной «Алтаргана» нааданай мүрысөөндэ шалгаржа, Алтарганын Алтан дипломдо хүртөө бэлэй.
Энэ дэлхэйдэ мүндэлхэ ушар гээшые ехэл жаргал гэжэ сэгнэмээр, энээниие хаанаһаа хэн, ямар хүсэн үршөөдэг байгаа юм, хүнэй бэе оложо мүндэлһэн хүн бүхэндэ үршөөгдөөд лэ байна, теэд тэрэнэйнь хэмжүүр юунһээ дулдыдадаг байба гээшэ ааб?
Хүнэй ошоходо наһанайнь хэрэг хаягашаха бэшэ, үри бэеын байгаа сагта нэгэ хэдэн үе үргэлжэлдэг юм. Баяр Цыренжаповичта үри бэе байна, гуламтыень сахижа, алишье сагта аяга сайхантайгаа хүлеэжэ, угтажа байһан наhанайнь нүхэр!.. Үндэр наһатай эжынь…
Үшөө тиихэдэ хэжэ, бүтээжэ байһан ажал хэрэгынь дутуу орхигдобошье, тэрэнииень гамтайгаар үргэлжэлүүлхэ найдамтай нүхэдынь, омогорхожо, нэрлэжэ, дурсажа байха тоонто нютагайхидынь, түрэл гаралынь
Ноябриин 26-да 11 сагһаа 12:30 саг болотор Буряадай Гүрэнэй филармониин танхим соо хахасалгын ёһолол болохо.
