Мүнөө театртаа ажаллажа байһан эгээл аха захатан гэхэдэ, Ленинград хотодо театрай уралалай ехэ һургуули дүүргэжэ гараад, 1969 ондо театртаа ерэһэн Михаил Елбонов, Дарима Сангажапова, Людмила Дугарова, Чингис Гуруев… Эдэ нүхэднай мүнөөдэр тайзан дээрээ…
Тэдэнэй дунда үшөө Владимир Кондратьев байһан. Зүжэгшэн, найруулагша, багша.
Эдэ суг дүүргэжэ ерэһэн бүлэг артистнар театртайгаа гайхалтай һонин, айхабтар гоё 46 жэлнүүдые суг үнгэргөө. Эдэл зоной, тиихэдэ тэдээнһээ ахашье, дүүшье бүлэгүүдэй ажаллажа байхада, манайл нюдэн дээрэ театр академическэ гэһэн үндэр нэрэ зэргэдэ хүртөө, тиихэдэ Ажалай Улаан тугай орденоор шагнагдаа. Энэ орден гээшэмнай Зүблэлтэ гүрэнэй айхабтар үндэр шагнал байһан юм шуу даа!
Владимир Кондратьев. Мэндэ ябаа һаа мүнөөдэр 70 наһанайнгаа алдарта ойе түрэл тайзан дээрээ үшөөл сарюун үбгэн тэмдэглэжэ байха бэлэй, теэд үтэлхын тухай һананшьегүй, эгээл хүсэн дундаа ябан гэһэйш, үбшэн хүрэхэ гэжэ гайтайхан табисуур амита юртэмсэһөө зайлашагүйл юм ха юм даа. Театрай хүгжэлтэдэ, тэрэнэй түүхэдэ Владимир Кондратьевай оруулһан хубита тон ехэ: энээхэн тайзан дээрээ 31 зүжэг найруулан табяа бшуу даа. Үшөө тиихэдэ аха дүү Монгол ороной Нацагдоржын нэрэмжэтэ театрай тайзан дээрэ табиһан 10 зүжэгыень нэрлэнгүй яажа орхихобши! Владимир Ильич мүнөөшье театртаа албаяа хэһэн зандаал, юуб гэхэдэ тэрэнэй найруулан табиһан зүжэгүүд тайзан дээрээ үшөөл ябажал байһаар. Тиихэдэ театраймнай тайзан дээрэ тэрэнэй һургажа гаргаһан шабинар – бэлигтэй шабинар багшынгаа үндэр нэрые үргэн, ажаллажа байһан зандаа…
Мүнөө үдэшэ Буряад театрай тайзан дээрэ Владимир Ильич Кодратьевай найруулан табиһан Дашзэвэгийн Мэндсайханай монгол зүжэг «Эхэ!» тэрэнэй дурасхаалда гэжэ табигдана.
Владимир Ильичые таниха хүн дурсаг лэ даа, танихагүй хүн энэ нэрэ дуулаг, мэдэхэ болог…
