“Буряад үнэн” сонин Лүдэб хүбүүнэй амжалтада үнэн зүрхэнһөө баясажа, ходол уншагшадтаа хөөрэжэ байдаг юм. Тиимэһээ Лүдэбэй зохёохы зам манай альган дээрэ бөөмэйлэгдэн байдаг гэжэ хэлэбэл, алдуугүй.
“Детская десятка с Яной Рудковской” гэһэн сэнхир дэлгэсэй харалганда Лүдэб “Онгосо” гэһэн дуугаа табиһан юм. Монголой найруулагша энэ дуундань зураг буулгабари зохёожо үгөө. Хүн бүхэн Лүдэбай түлөө сүлжээ холбооной аргаар дуугаа үгэхэ аргатай байгаа. Энэ харалганда ехэ олон бэлигтэй үхибүүд хабаадаа. Лүдэб һүүлшын шатада гарабашье, тон тэдээн сооһоонь илгаржа, илагша болохоб гэжэ хүлеэгээгүй байгаа.
Дуугаа дуулаад, хэн илаа хаб даа гэжэ мэдэхэеэ һонирхон, Лүдэбай тайзанай саагуур ябажа ябатарнь, энэ үедэ илагшын нэрэ соносхоһон байгаа. Теэд хүшэгын саагуур ябаһан Лүдэб тэрэ илагшын нэрэ дуулаагүй. Тиигээд гэнтэ Филипп Киркоров гурба дахин «Лүдэб Очиров» гэжэ хашхархыень дуулажа, тайзан руу гүйжэ гараа бшуу.
– Би гэнтэ диилээ һаа, юун гэжэ хэлэхэбиб гэжэ үгэнүүдые бэлдэһэн байгааб. Теэд өөрөөшье мэдэнгүй, тайзан дээрэ гарашоод байхадаа, хэлэхэ үгэнүүдни мартагдашоо. Тиихэдэнь “ Эта победа – поражение всех моих сомнений и моей неуверенности”, – гэжэ хэлээб. Халуун альга ташалгаар угтажа, үгөөрөө хэлэжэ дамжуулхын аргагүй ехэ баяр баясхалан болоо», – гэжэ Лүдэб сэдьхэлэйнгээ байдалаар хубаалдаба.
Хүн зон Лүдэбые амаршалжа, дурасхаалай фото-зурагуудаа удаан саг соо буулгуулаа.
Лүдэб энэ ээлжээтэ амжалтаяа тэрэниие дэмжэһэн бүхы хүн зоной бултанайнь амжалта гээшэ гэжэ хэлээд, бүгэдэндэ халуун баярые хүргэнэ.
Лүдэбэй хүн зондоо мэдээжэ болоһон хадань ехэ олон проект, наадануудта хабаадахыень дурадхалнууд орожол байдаг. Теэд Лүдэбнай оройдоол 13-тайхан гүб даа, тэрээндэ үшөө ехэ юумэндэ һураха, олон юумэ шудалха, эрдэм бэлигээ мүлихэ, шэнэ мэргэжэлнүүдтэ һураха хэрэгтэй ха юм.
