Хүнэй бэедэ аятай дулаан, домтой, зөөлэхэн ба үзэсхэлэнтэ гоё дараhан нооhоор урлаhан хубсаhан болон бусад хэрэгсэлнүүд ямаршье хүндэ үлзы жаргал бэлэглэдэг. Нооhон эдүүд жэлhээ жэлдэ олоной hайшаалда хүртэжэ, эршэмтэйгээр дэлгэрнэ. Хүдөөдэ ажаһуугшын юрын хубсаhанhаа эхилээд, үндэр тайзангууд дээрэ нооһон платинууд, пальтонууд мододо оробо.
Yлзытэ хэрэг эрхилhэн «Yлзы» хамтаралай гэшүүд Любовь Гомбоева, Цыцыгма Бадмажапова, Хандама Дамдинова гэгшэд эгээл түрүүн урлаhан нооhон оймhонуудаа нютагайнгаа эрэмдэг хүнүүдтэ бэлэглэжэ баярлуулhан байна. Мүнөө хүршэ сэрэгэй частиин харуулай албатанай захилаар дулаахан хубсаhа оёно.
Иимэ үйлэдбэрилгын мастерской нээхэ тушаа hанал зорилгонууд 2018 ондо бэелүүлэгдэжэ эхилhэн байна. Тэрэ жэлдэ Любовь Гомбоева Улаан-Yдэ хотодо Монгол гүрэнэй мэргэжэлтэдэй хүтэлбэри доро тусхай hуралсал гараhан юм. Мүнөө тэрэ нооhо даража урлалгын хэрэгтэ бусадые hурган хүтэлбэрилнэ.
