П.И. Чайковскиин нэрэмжэтэ колледж дүүргээд, Эхэ оронойнгоо хүгжэмэй дээдэ һургуулинуудта һуража байһан залуу дуушад үбэлэйнгөө амаралтада гэртээ ерэхэдээ, иимэ концерт-наада нютагаархидтаа бэлэглэдэг юм. Аха үеын мэдээжэ дуушадай байгуулһан нангин заншал таһалдуулангүй, хүгжэмэй ёһотой һайндэр үнгэргэжэ байһан зондо баяр хүргэмөөр. Энэ үдэшэ театрай симфоническа оркестрэй хүгжэм доро залуу дуушад талаан бэлигээ үршөөгөө.
Залуу одо мүшэд» гэһэн түсэл П.И.Чайковскиин нэрэмжэтэ соёл уралигай колледж уласай Соёлой яаманай дэмжэлгээр эмхидхэдэг юм. Сагаан һарын үедэ дэмы үнгэргэгдэнэгүй, хүн бүхэн хирэгүй һайхан сагаан сэдьхэлһээ аялгата дуугаа үршөөнэ ха юм. Мэргэжэлээ дээшэлүүлжэ байһан оюутадта энэ тоглолто хүгжэлтэдэнь яаха аргагүй нүлөөлхэ болоно, - гэжэ соёлой сайд Соёлма Дагаева дуулгана.
Мэнэ иигэһээр залуу дуушад, хүгжэмшэд ялас гэмээр һуралсалаа түгэсхэжэ, түрэл нютагаа бусаад, Буряадайнгаа соёл уралигай хүгжэхэ хэрэгтэ тон ехээр оролдожо ажаллаха бэзэ гэжэ найдамаар.
