Зүгөөр ямар эхи үндэһэтэй, хаанаһаа уг изагууртай хүгжэмтэ зэмсэг бэ гэжэ хүн бүхэнэй толгойдо хадуугдаһан ха гү, энээн тухай хэн бодомжолжо үзөө һэм?
Буряад-монголшуудай ажабайдалда онсо һуури эзэлдэг, эгээл хүндэтэй морин хуурай бии болоһон тухай домогоор "Амар сайн" театр шэнэ этно-мюзикл дурадхана.
Росси гүрэн дотор эгээ түрүүшынхеэ "Хүхөө Намжил" гэһэн этно-мюзикл Ага нютагта табигдажа, "Амар сайн" театр олониитын омогорхол, бахархалда хүртэхэл ёһоороо хүртэбэ.
Энэ ехэ хэмжээнэй ажал бүтээхэ хэрэгтэ Россиин болон Буряад Уласай соёлой габьяата хүдэлмэрилэгшэ нэрэ зэргэтэй Николай Шабаев тус үльгэрые баян бардам буряад хэлэн дээрэ шүлэглэмэл маягаар бэшэжэ, харагшадаймнай зүрхэ сэдьхэлдэ хадуугдамаар дамжуулжа шадаһандань "Амар сайн" театрай зүгһөө баярые хүргэхэ байнабди.
Мүн тиихэдэ олондо мэдээжэ болоһон, соёл урлалай һалбарида хүтэлбэрилэн эмхидхэхэ, зохёон найруулха талаар нэрэеэ бата бэхеэр алдаршуулһан, талаан бэлигтэй, баян дүй дүршэлтэй режиссёр Олег Юмовай оруулһан хубита нилээд ехэ. Буряад-монгол угсаатанай домог болохо "Хүхөө Намжил" үльгэрые тайзан дээрэ шадамар бэрхээр найруулан табижа, урдын түүхэһээ һабагшалан һэргээжэ, жэгтэй гоё хүгжэмтэ зүжэг бии болгоо!
Наһаар залууханшье һаа, эрмэлзэл зоригынь, һанаа хүсэлынь, түсэблэһэн хэрэгынь урагшатай бэелүүлэгдэһэндэнь үнэн зүрхэнһөө урмашанабди.
Энэ шэнэ маягаар табигдаһан хүгжэмтэ зүжэгэй шанар шэнжые мүн лэ суг хамта ажаллажа ябаһан уран зураашан Ася Лыгденова шэдитэ зурагуудаараа улам баяжуулһан байха юм, Уран зураашын онсо харасаар оршон тойронхиие зураглан шэмэглэхэ табисууртай, олоной нюдэ хужарлуулһан хүлэг эмниг болоһон шэдитэ зурагуудынь хүнэй сэдьхэлдэ эгээл һайханаар хадуугдан үлөө.
Буряад арадай хүгжэмтэ зэмсэгүүдэй оркестрэй бүридэлдэ хуур лимбэ, ятага йочинтой хамта саксофон, электрогитара, ударные - булта нэгэ доро, нэгэ амин болоод наадахадаа, ямар һүртэй, жэгүүртэй гоё хүгжэм дуулдана гээшэб?! Нэгэ үгөөр хэлэхын аргагүй, энээниие өөрөө нюдөөрөө хараха, шагнаха хэрэгтэй.
Буряад-монголшуудай хүндэлэн түшэглэдэг үндэр заяатай морин хуурайнгаа һүр һүлдые дээрэ үргэн, жэнхэни буряад хэлэн дээрэ найруулан табигдаһан зүжэг наадаяа Улаан-Үдэ хотодо Буряад театрай тайзан дээрэ мартын 2-то ба 3-ай үдэрнүүдтэ ерэжэ харахыетнай уринабди!
