Һонин юуб гэхэдэ, энэ зүжэг шэнэшье бэшэ, мүндэлһэн түүхэнь өөрын онсо ушартай. Зүжэгэй жанр гэхэдэ – комеди, наадаха бүлгэм гэхэдэ - булта одото зүжэгшэд, тиимэһээ харагшадта ехэл һонин байха гэжэ һанагдана.
Энэ зүжэгэй уран найруулагша Саян Жамбаловта ба хабаадаха зүжэгшэдтэ асуудалнуудые табин хөөрэлдэбэбди. Юунһээ боложо нэгэ зүжэгые хоёр наһанай бүлгэм наадаха болооб, юундэ хуби заяан гээшэ чемодан соо багтаха болооб, юундэ дүй дүршэл ехэтэй, Буряад драмын театрай урдаа хараха зүжэгшэд уран зураашадай цех соо бэлдэлгэеэ үнгэргэхэ баатай болооб гэхэ мэтэ асуудалнуудта харюунуудые бэдэрээбди.
- Саян Цыдыпович, эндэ һая репетициин үедэ нэгэ хэды сториз буулгаад, сүүлжээ утаһанда табихадамнай, харагшаднай һанаагаа зобоо, энэ хаана бэлдэнэб, ямар зүдэрүүшэг гэр гээшэб гэжэ асуугаа.
- Энэ зүжэгэймнай бэлдэлгын ехэнхи хуби театрай дэргэдэ байгша мастерскойн байшан соо ябуулагдаа. Театрайнгаа нэгэ репетиционно танхимые бага тайзан болгохо хүсэлтэйбди, тиигээд тэндэ заһабарилгын ажалнууд үнгэржэ байна. Тиимэһээ мастерской соогоо гоёхон павильон түхеэрөөд, зүжэгэйнгөө ехэнхи хубииень тэндэ бэлдээбди. Байдалынь зандаа бараг, эгээл шухалань - дулаан, хүн һаалта хэхэ бэшэ. Аха заха зүжэгшэднай борохон байдалһаа гайхахагүй, шанга голтойнууд ха юм. Харин, мүнөөдэрһөө тайзан дээрээ гарахамнай.
- «Судьба в чемодане» гэһэн пьесэ Танай суг һураһан Леонид ба Ирина Ворон гээшэдэй бэшэһэн зохёол. Буряад драмын театрта пьесэмнай табигдана гэжэ авторнууд дуулаһан байна гээшэ гү?
- Ирина Воронтой бидэ Ленинградта театрай дээдэ һургуулида суг һураһанбди. Леонид нүхэртэеэ дүршэл ехэтэ зүжэгшэд, уран найруулагшанар гээшэ, тиигээд һүүлэй үедэ хоюулаа хамтаран пьесэнүүдые бэшэдэг болонхой. Тэдэ пьесэнүүдээрнь олон театрнууд зүжэгүүдые табидаг, хари гүрэнүүдээршье табигдадаг гэжэ мэдэнэб. Пьесэнь буряадшалагдажа, «Хуби заяанай чемодан» гэһэн зүжэг боложо табигдаа гэжэ һонин дуулгаа бэлэйбди.
- Энэ пьесэеэ наһаар аха артистнарта зорюулжа бэшэһэн гү?
- Тиигээ, наһажаал зүжэгшэдэй наадаха гэһэн пьесэ, тиимэһээ би зорюута хоёр жэлэй саана театрайнгаа одото аха захатанай наадалгатай энэ зүжэг түсэблөөд, пьесэтэе танилсаад, бэлдэжэ эхилээд байтарнай, үбшэ хабшан һүжэржэ, гэртээ һууха баатай болошоо һэмди. Тэрэ үедэ зум –аргаар уулзажа, түрүүшын репетицинүүднай онлайнаар үнгэрдэг болоо һэн. Тиигэһээр, 65 наһанһаа дээшэ ажалшад гэртээ һууха гэһэн засагай талаһаа зарлигай гарахада, дунда наһанай зүжэгшэдээрээ табиха гэжэ шиидхэбэри абаа бэлэйб. Тиигээд, 2020 оной декабрь соо тэрэ зүжэгшэдээрээ харагшадтаа премьерэеэ дурадхаабди.
- Мүнөө харахадамни, аха захатамнай ехэ дуратайгаар наадана, ажалаа ехээр һанаа, үгылөө гэжэ ойлгохоор. Ямар эдэбхитэйнүүд, сог залитайнууд гээшэб! Ганса репетицинүүдые ойр зуура хараад, энеэжэ эһээгээ гаргахаар…
Росси гүрэнэй арадай зүжэгшэн Марта Зориктуева: - Зинаидын роль нааданаб. Би юушье хөөрэхэгүйб, болоогүй юумэн тухай хөөрэхэ дурагүйб, харагшаднай ерээд хараг, хараад лэ, ямар болооб гэжэ хэлэг. Үнинэй иимэ составаар наадаагүй, ехэл һонирхожо булта шууялданабди, дууланабди, хатарнабди, шалюурнабди.
Олег Бабуев, Росси гүрэнэй габьяата зүжэгшэн: - Тус пьесын авторнууд зүжэгшэ ябаһан дүршэлтэй хадаа, зүжэгэйнгээ дүрэнүүдые тон һайнаар, тодоор зохёожо гаргаһан байна. Тэрэнь маанадта ехэ туһа боложо үгэнэ. Персонаж бүхэн өөрын хүгжэлтэтэй, тойроод байһан зонтоёо өөрын харилсаатай, зүрилдөөтэй, онсо зан абаритай, «нюрганайнь хойно» ямар ажабайдалай дүршэл, түүхэниинь танюуһатай байха ёһотой ха юм…
Росси гүрэнэй арадай зүжэгшэн Людмила Дугарова: - Иимэ гоё комедидэ нааданаб, наһаараа секретарша ябаһан эхэнэрэй дүрэ харуулхаб. Минии наадаха Татьяна тон һаруул сэдьхэлтэй эхэнэр гэжэ тоолоноб, найдал зоригоо алдаагүй, тиимэһээл хуби заяаниинь хэшэглэжэ, эгээл һайхан мэдэрэлдэ абтана, жаргалтай байдал үзэнэ.
Чингис Гуруев, Росси гүрэнэй габьяата зүжэгшэн: - Энэ зүжэг соо бүхы юумэн бии, тангошье хатарнабди, шог ёгто хадхуур дуунуудыешье дуулалданабди.
Дарима Сангажапова, Росси гүрэнэй габьяата зүжэгшэн: - Хуби заяан чемодан соо багтадаг юм гү? Энэмнай ехэ гүн удхатай, философско асуудал болоно. Татьянада теэд жаргалаа олохыень чемодан лэ хүрөө ха юм. Хэды баярлан жаргаха, хэды гуниглан уйдаха гээшэ бурханай үгэһэн хэмжүүрһээ бэзэ, тиигээшье һаа хэды жаргал эдлэхэ гээшэ хүнэй эрмэлзэлһээ дулдыдадаг, энэ минии һанамжа.
Зорикто Ринчинов, Буряад Уласай арадай зүжэгшэн: - Энэ пьесэ соо манай ажабайдал тон лэ тэрэ зандань, үнэн сэхээр харуулагданхай, эгээл шухала удхань хадаа – хүнүүдэй дундахи харилсаан. Би Строчилин гэжэ персонажые нааданаб, Должин Жаргаловнатаяа инаг дуранай шугамаар баһа уягдаба гээшэбди, хэды иимэ зүжэг болоһыень, тоолоогүйб, зандаа олон. Энэ зүжэгһээ ямар дүн гаргалтайб гэхэдэ, найдал этигэлээ хэзээдэшье алдажа болохогүй.
Должин Тангатова, Росси гүрэнэй габьяата зүжэгшэн: - Минии наададаг Татьяна хадаа ходо иигэжэ хэлэдэг, ажабайдалдамни жэгтэй нэгэ үйлэ болоо һаань, бүхы юумэн һайн байха. Наһанайнгаа ямаршье хаһада, хүн гээшэ хадаа, сэдьхэл соогоо гэрэл аһаагаад, һайн бодол, мэдэрэл сэдьхэжэ ябабалынь, тэрэ һайн юумэниинь харгыдань ходол дайралдаха аргатай. Бүхы зоноор тэмсэжэ, муу һанаа сэдьхэжэ, бури бухалдаа баригдажа байлтагүй, тулюур юумэ шэбшэнгүй, үргэн уужам сэдьхэлтэй байха байдал гээшэ хадаа – манай гарта, манай хүсэндэ бшуу. Харагшадтаа хэлэхэ байнаб, шог ёгто зүжэгүүдтэ дуратай зон февралиин 26, 27-ой үдэрнүүдтэ «Хуби заяанай чемодан» гэһэн зүжэгыемнай ерэжэ харыт, бидэ бултыетнай хүлеэн байхабди!
