Түүхын номтой танилсуулгын баяр ёһололдо Агын Буряадай тойрогой Захиргаанай хүтэлбэрилэгшын орлогшо Билигма Будаева, Агын, Могойтын, Дулдаргын, «Ага тосхон» хотын тойрогой захиргаануудай түлөөлэгшэд, суг ажаллаһан, хүдэлдэгшье нүхэдынь, үетэниинь, Хойто-Ага нютагайхидынь ба хизаар ороноо шэнжэлэгшэд, наһатайшуул хабаадаа. Шэтэ хотоһоо намай хүтэлбэрилэгшэд ябаһан Александр Севостьянов, Доржи Тумунбаяров ба Гурожаб Бальжиров гэгшэд ерэжэ, хани халуунаар амаршалаа.
Угсаатанайнгаа түүхэ шэнжэлэгшэд Б-Д.Базаров, нэгэ ангида һураһан В.Цыцыков, уран шүлэгшэн Б.Гармажапов гэгшэд буряадай түүхын һонин һонин баримтануудые дурдажа, һанамжануудаа хэлэһэн байна. Түрүүн Хойто-Ага тоонто нютагайнь дууша хүбүүд Доржи Дондоков ба Александр Бороев гэгшэд ирагуу һайхан дуунуудые гүйсэдхэжэ баясуулаа, хүдөө һууринай зүблэлэй түрүүлэгшэ Цыпелма Базаржапова амаршалжа, бэлэг баряа.
Тус номой автор Цырендаши Цыбенович яагаад энэ ном бэшэһэн тухайгаа хөөрэжэ үгөөд, туһаламжа үзүүлһэн аймагайхидтаа, нютагайхидтаа, нүхэдтөө гүн сэдьхэлэй баярые хүргөө. Диссертационно ажалайнь хүтэлбэрилэгшэ, түүхын эрдэмүүдэй доктор Шираб Чимитдоржиевай дурадхалаар буряад арадай хүгжэлтын замаар, уг гарбалаар һонирхожо эхилээд, энэ номоо 2019 онһоо бэшэжэ, нёдондо шанартайгаар хэблүүлжэ шадаһан байна. Элдэб сагуудта гүрэнэй, намай ажалда шударгыгаар ажаллаһан Ц.Санданов буряад угсаатанай түүхын сэнтэй ном бүтээжэ, номой сангуудта, багшанар, һурагшадта, нютагайхидтаа бэлэглээ бшуу.
Хүндэтэ аха захатан Агын Буряадай тойрогой Түлөөлэгшэдэй Суглаанай гэшүүн, АБАО-гой гүрэнэй габьяата алба хаагша, Агын Буряадай тойрогой Наһатайшуулай зүблэлэй түрүүлэгшэ, хэдэн эрдэм шэнжэлэлгын ажалнуудай ба монографинуудай автор юм.
